Read Siyin Chin Micah 5 Bible Online

Micah 5 - Siyin Chin bible

Micah 5

¹Jerusalem mite awng, na ngalkapte khawm vun! Eite hong uumci hi! Amate in Israel lampuipa sim uh hi!

²TOPA in, “Bethlehem Ephrathah khua awng, nang in Judah ngam sungah khuanobel khat na hi a, ahizong nang sung pan Israel a ukpa tu khat ka piangsak tu hi. Ama khang ngui in taangh tawngh pek taw kizom hi,” ci hi.

³Tua ahikom nau nei tu numei nu ii a tapa a pian mateng TOPA in a mite sia a ngalte khut sungah a nusia tu hi. Tua zawkciang ngamdang ah saltaang a mipuite sia a mite taw kingawm kik tu hi.

⁴Ama hong pai ciang, ama in a mite TOPA tung pan hong pai thahatna le TOPA Pathian mama ii vaang neina taw uk tu hi. A mite ngammuang takin teang tu uh hi, banghang ziam cile leitung bup mihingte in ama ii letna saang thei tu a,

⁵ama in kilemna puak tu hi. Assyria te in ih ngam hong sim a, ih ngalnanna kulh le taapte hong kaantan ciang, amate do tu in a hatbel ih lampuite ih puak tu hi.

⁶Ngalhiam tha hatna taw amate in Nimrod ii leitang Assyria sia zothal tu hi, tuaciang Assyria te in ih ngam hong sim ciang amate in eite hong hun tu hi.

⁷Israel mi a suakta laite sia minam tam atu in TOPA piak tha thak nga kikna daaitui bang hi tu a, thingno suante tung a nguazu vapeak bang hi tu hi. Amate in Pathian bealh tu a, mihing suang ngawl tu hi.

⁸Minamte sungah a taanglai mite sia duisung ahibuale, ngamsa tatna mun ah, an zong tawpi savai khat bang hi tu hi: ama in tuuhon sungah tum a, tuute manin a bek a bekin laai a — tuaciang suatak natu lametna om ngawl hi.

⁹Israel in a ngalte zothalin susia siat tu hi.

¹⁰TOPA in, “Tua hun ciang, na siphute la in na ngalleangte ka susia tu hi.

¹¹Na ngam sungah khuapite ka susia tu a, na kidalna theampo ka balkeak tu hi.

¹²Na zak uh bum le ai theampo ka susia tu a, khutlam en aisaan thei khat zongh ka khoaikhe buatu hi.

¹³Na milimte le na biak suangkhuam thiangthote ka susia tu hi; note in na vawt tawm nate na bia nawn buatu uh hi.

¹⁴Na ngam sungah a om numeipathian Asherah milimte ka kaivawk tu a, na khuapite ka susia tu hi.

¹⁵Ka thu a ni ngawl minamte theampo tungah thin uukna lianpi taw ka thuk tu hi,” ci hi.