Read Siyin Chin Micah 6 Bible Online

Micah 6 - Siyin Chin bible

Micah 6

¹TOPA ii Israel te a mawsakna thu ngai vun. TOPA awng tho in, na thu sung in; mualpite le mualnote in na son teng zasak in.

²No mualte le a tawntung a kip no simlei tawdapte awng, TOPA thu ngai vun! TOPA in a mite mawsak tu hi. Ama in Israel tungah mawsakna khat nei tu hi.

³TOPA in, “Ka mite awng, note tungah bang hong vawt zo khi ziam? Note atu bangbangin vanh ngit khat suak zo khi ziam? Hong zo tavun.

⁴Egypt ngam pan kong pusuaksak hi; saltanna pan kong suatak hi; note lam hong pui tu in Moses, Aaron le Miriam kong puak hi.

⁵Ka mite awng, Moab kumpi Balak in note bang law hong sawm a, Beor tapa Balaam in bangbang zo kik ziam cisia phawk kik vun. Acacia ngiaphual pan Gilgal paina lampi ah a piang teng phawk kik vun. Hite phawk kik vun, tua hile note kong ngup natu in ka septe phawk tu nu hi,” ci hi.

⁶Vantung Pathian TOPA bia tu in ka pai ciang ama atu bang puak tu khi ziam? Biakpiakna a hal tu khuino phabelte paipui tu khi ziam?

⁷Tuu a tul sim ahizong, a bomaw lui bang in a luang Olive thaute ahizong puak leng TOPA a lungkim tu ziam? Ka mawphel natu in ka taciil ka pia tu ziam?

⁸Hi ngawl hi TOPA in thupha hong son zo hi. Ama ii ei tung pan bang hong tangkal thu in hisia hi: a maan sia seam tu, ki itna kip lak tu le, kiniamkhiak in ih Pathian taw kipawl khawmin nuntak tu ahi hi.

⁹TOPA kiitakna in ciimna hi. Ama in tua khuapi sam a, “No khuapi sung a kikhawm mite awng, na ngai vun!

¹⁰Mihing tatsiate ii inn sungah thumaan ngawlna taw a nga sumngumte om hi. Amate in ka ngaimawk khaikhin maan ngawlte zangh uh hi.

¹¹Bangbangin khaikhin le toaisuang maan ngawl a zanghte a khialna maisak thei tu khi ziam?

¹²Na mihaute in mizawngte duupkang a, note theampo leilot thusonte na hi uh hi.

¹³Tua ahikom, na mawnate hangin a lalsak le a siasak tu in kong kipan zo hi.

¹⁴An na neak uh hang na lungkim buatu uh a — a tatakin na ngil uh kial veve lai tu hi. Vanhte pua in, nate paipui tu na hi uh hang na keamcing zo buatu uh hi. Na top uh vanh pawpo ngal sungah ka susia tu hi.

¹⁵Lo an na ciing tu uh a, ahihang an na la buatu uh hi. Olive ngate sathau suak tu in na ngoai tu uh a, ahihang na zangh ngei buatu uh hi. Sapittui na vawt tu uh a, ahihang na ne ngei buatu uh hi.

¹⁶Hi bang hong piang tu hi, note in Omri kumpipa le a tapa Ahab kumpipa ii ngamtat siate na zui uh hang ahi hi. Amate ngamtat ziate zomto na hi uh ciang kong siacipsak tu a, a kuama po in note hong zawngsak tu hi. Mite in mun theampo ah note hong zawnsak vawt tu uh hi,” ci hi.