Read Siyin Chin Nahum 1 Bible Online

Nahum 1 - Siyin Chin bible

Nahum 1

¹Hi thu in Nineveh taw kisai thu hi a, Elkosh khua mi Nahum ii mukholna thu khat tepteena ahi hi.

²TOPA Pathian in ama a demte kuama dual ngawl hi; ama in ama a nalhte daan pia hi. A thin uukna taw amate thuk kik hi.

³TOPA thin uuk papaih ngawl a, ahihang ama vaanglian in a maw a khial te daan pia ngawlin tha thong ngeingawl hi. TOPA paina munah vuipi suangval va a; meeite sia a peang taw a sina pan a leang leivui khute ahi hi!

⁴Ama in tuipi thupia a, tuasia kang hi! Ama in ngunte kosak ngiungeu hi. Bashan lote vulin, Carmel mual sia ang a, tuaciang Lebanon paakte vul hi.

⁵TOPA mai ah mualpite liingin kektham a; ama mai ah mualnote tuitham hi. TOPA a kilangh ciang leitung kilok a; leitung le a mite theampo liing hi.

⁶Ama a thin uuk ciang akua nungta zo lai tu ziam? A lauhuai mama a thinsona ah akua nungta zo nawn tu ziam? A thin uukna meikuang tha suk a; suangte tamhthamin ama ii mai ah leivui suak hi.

⁷TOPA pha hi; ngimna hun sungah a mite sungsia hi; Ama kung a zuante ama in keamthiam hi.

⁸Tuipawm lian khat bangin a ngalte sucip a; ama a nalhte thina thuaksak hi.

⁹TOPA langpan in bang vawt sawm nu ziam? Ama in no hong susia tu hi. Kuama in khatvei kaan ama nalh ngawl hi.

¹⁰Lingngui kivialte le taangphaw ko bangin no zukhamte hong kihaltum tu hi!

¹¹Nineveh awng, ngitlo vai vive a tum, TOPA langpan a sawm khat na kung pan hong pai hi.

¹²Hisia in Israel a mite tungah TOPA ii cina hi; “Assyria te hat in mihing tam napi amate kisusia a bo tu hi. Ka mite awng, note kong thuaksak a, ahizong tuabangin kong vawt kik buatu hi.

¹³Tu in note tungah Assyria vaangletna ka bosak tu a, hong heenna thikkhaute ka sutan tu hi,” ci hi.

¹⁴Hisia in Assyria te taw kisai TOPA thutanna hi: “Amate min a zomto tu in suan le paal nei ngawl tu hi. Amate ii pathiante biakinnte sungah a om milimte ka susia tu hi. Assyria te atu in thaankuul khat ka vawtkhol tu hi — amate a nungta tu in kilawm ngawl uh hi,” ci hi.

¹⁵En vun, thupha puak kamtai khat mualtung tawnin hong pai hi! Ama in zawna taangko tu in hong pai ahi hi! Judah mite awng, na poaipi khaam vun a, Pathian tungah ciliap huai takin, na kamciam sate pia vun. Mi ngilote in na ngam uh hong sim ngei nawn ngawl tu hi. Amate kisusia diipdeap zo hi!