Read Siyin Chin Nahum 2 Bible Online

Nahum 2 - Siyin Chin bible

Nahum 2

¹Nineveh awng, nang hong kisim hi! Nang hong vaat tham tu vaangletna hong pai zo hi. Ngalnan natu te kinging vun! Lampi cing vun! Ngalsim tu in kithoai vun!

²(A ngalte ii sutol ma hun lai bangin TOPA in Israel mite ii a minthanna pia kik dektak hi.)

³Ngalte ii ngalkapte in lumsante toai a, a kibang puansante silh hi. Amate ngalsim tu in kithoai hi! a ngalleangte meikuang bangin tee vazak hi! A siphute pai nuamin a peang laam zo hi!

⁴Lampite kaantanin siphu ngalleangte tai kheukho a, khuapi khawlmunte kaantan in kinuntaw kawkoai hi. Amate mei lomsawm det te bangin taang vazak a, khualeng bangin peak kawkoai hi.

⁵Ngalkap bute kisam a; maisang a phul ciang amate lutu uh hi. A simte in khuapi uumna luphung sangah tai a lumte taw kidalin, kulh sukthapna moltumte bul hi.

⁶Ngunhui a kongpite kihong keak a; kumpi inn sia launa taw kidim hi.

⁷Kumpinu kiman a; a naseamte vakhu kuul bangin kap uh hi; khuangai in a awm beang uh hi.

⁸A cimhtham tui cimna khat pan tuiluang bangin Nineveh pan mihingte taikeak uh hi! “Tawlnga vun! Tawlnga vun!” ci in khuapi pan aw nging hi — ahizong kuama heak kik ngawl hi.

⁹Ngunnte phuul vun! Khamhte phuul vun! Khuapi sia sumngum taw kidim hi!

¹⁰Nineveh sia kisusia in, kinusia a, ngamkhing hi! Launa taw thin tamhtham a; khupte liingin, a thahatna bo hi; maitangte daang hi.

¹¹Tawpite ii kua khat taw a kibang, tawpi note kivaakna mun, tawpital le tawpipui vana, a note ngammuangin a omna tua khuapi sia tu in koi sungah om ziam?

¹²Tawpi in a neak tu sa manin a pui le a note atu balneen a; ama in akua sia sabekte taw dimh hi.

¹³TOPA Vaanglianbelpa in, “Keima in na ngalpa ka hi hi! Na siphu leangte haltum tu khi hi. Na ngalkapte ngal sungah kithatlum tu a, midangte tung pan na laakte theampo hong laaksak tu khi hi. Na palaite ii ngetnate kiza nawn ngawl tu hi,” ci hi.