Read Siyin Chin Nahum 3 Bible Online

Nahum 3 - Siyin Chin bible

Nahum 3

¹Kitheamna, mi kithalupna, sutol tu le phuul tu bek ahi hauna taw a kidim khuapi a lal hi zo hi!

²Nganno saatna a nging, leangmui nging, Siphu kitawte khuasuan nging, siphu ngalleang kithinna awnging te ngai vun!

³Siphu ngalkapte kidel a, namsaute tee vazal in, teite nizang la vazial hi! Mithiluangte vum vinvun in kiseng a, mithiluangte sim zawk ngawlin om a — tuate tungah mihingte lutu uh hi.

⁴Pumpi zuak ahi Nineveh sia daan kipia hi. Dei huai in thina piangsak thei ai taw kidim a, ama in minamte ai taw zol in sal suaksak hi.

⁵TOPA Vaanglianbelpa in, “Daan kong pia tu hi, Nineveh awng! Na pumnguak kong koi tu a, ngam tuatuamte in kong musak tu hi, na maizum huaina theampo hong mu tu uh hi.

⁶Nang kong zawnsak vawt tu a, a kiihuai ninteak taw kong siin tu hi. Mihingte lau in nang hong salh tu uh hi.

⁷Nang hong mu po nungkin kik tu hi, Amate in, ‘Nineveh sia zaancip zo hi! Akua in ama hesuakhuai sa ziam? Akua in ama heeneam nuam tu ziam?’ ci tu uh hi” ci hi.

⁸Nineveh awng, nang sia Egypt khuapi Thebes, sangin phazaw ni ziam? Ama zongh pang bangin a dal tu ngun khat nei hi — Nile ngun sia ama kidalna hi.

⁹Ama in Ethiopia le Egypt uk hi, ama ii vaangletna ciangtan om ngawl hi; Libya sia ama kipawlpui ahi hi.

¹⁰Ahitazong Thebes mite salin kipaipui veve hi. Lampi king sim ah a patangte kivellum hi. A lampuite thikkol bul sa in kipaipui a, a mante kihawmhsak hi.

¹¹Nineveh awng, nang zongh zu khamin na puk tu hi: Nang zongh na ngalte kung pan suatak natu na hanciam tu hi.

¹²Na kulhte theampo sia thei min kungte bang hi tu a: theikungte thing vun, tua hile a nga na kam sung tatak ah taak tu hi!

¹³Na ngalkapte sia numeite bang hi a, na ngalte mai ah na ngam sia ngalnanna sel hi. Na kongpi kilhnate meikuang in lalsak tu hi.

¹⁴Ngalte hong uumci tu kingin kholna in tui toai vun a, na kulhpite ciangthua in khosak vun! Uksuang seak natu in buan cil vun a, uksuang bekna kuang a kinging sa in koi vun!

¹⁵Bangpo na vawt zong hong kihallum veve tu hi, ahibuale ngal sungah hong kithatlum veve tu hi. Khaumaw te ii lo ante a khawn tum bangin note hong kimaimot tu hi. Khaumawte bangin na pung uh hi!

¹⁶Van a aksite sangin a tamzaw sumvawtte na piangsak hi! Ahizong tu in tuate a tha phalhin a leang khaumawte bangin thot zo hi.

¹⁷Na uliante sia khuatuap ni in pang tung a bok khaumaw honkhat bang ahi uh hi. Ahizong ni hong sua ciang amate leang vingveng in, a zotna mun kuama in he ngawl hi!

¹⁸Assyria kumpilianpa awng, na ngamuk mangte thi uh hi, na kumpi uliante a tawntung mutthip uh hi! Na mite mualtung tengah kithethaang a, a inn ah a ciapui kik tu kuama om ngawl hi.

¹⁹Na liam nate bawl natu bangma om ngawl a, na liammate kidamsak thei ngawl hi. Na lalna thu a za theampo in lungdam in a khutbeang uh hi. Na khealmawk ngitlona uh pan, a suakta akua om na ziam?