Read Siyin Chin Habakkuk 1 Bible Online

Habakkuk 1 - Siyin Chin bible

Habakkuk 1

¹Hi thu sia TOPA in kamsaangpa Habakkuk tungah a pualaak thu ahi hi.

²TOPA awng, ngongtatna pan nong ngup natu, nong zaak ma in bang tanvei hu ngenin, kong biakpui kul tu ziam?

³Tuabang ngimnate banghangin hong musak ni ziam? Tuabang tatkhialnate en in bangbangin thuak zo ni ziam? Siatna le ngongtatnate ka kiimkot ah om a, kihauna le kidona mun theampo ah om hi.

⁴Upadi in thu nei zo ngawlin a luithawthong suak a, thutangin thu a kikhen bua hi. Thutang khenna thute kileekai in misia te in thutang mite zo zawsap hi.

⁵Tuasia ciang TOPA in a mite tungah, “Na kiim na paam a minamte encik vun, tua hile na mu uh thu hangin lamdang na sa tu uh hi. Tuasia na zaak ciang zong na up ngawl natu in bang khat po kong vawt tu hi.

⁶Tua a kiitakhuai a om thong thei ngawl Babylon te tungah vaangletna ka pia tu hi. Amate in ngamdangte a zawthal natu in leitung theampo ah kuan tu hi.

⁷Amate in kiitakna le patauna kizelsak a, amate ii kiphasakna taw amate ma in upadi khat suaksakin a dei bang thukhen hi.

⁸“A siphute pawlbeam sangin manlang zaw a, ngia ngilkialte sangin kiitakhuai zaw hi. A siphu ngalkapte ngam khuala pan hong pai a; a siphute in lei khuat uh hi. Muvanlaite suktun in a mat tute a zap bangin amate hong pai uh hi.

⁹“A ngalkaphonpite ngongtat a, zawna taw hong kuanin, amate hong nai ciang a kuama po patau hi. A ngal matte, senvui za in tam hi.

¹⁰Amate in kumpipate zawnsak vawt a, zanei uliante nuisan zazaan lel uh hi. Amate a khaktan zo tu kulh om peuma ngawl a — amate in tua kulh sia lei sunnel in la hi.

¹¹Tua zawkciang a thahatna sia amate ii pathian ahi, hi mite, sia vuiva bangin paisuak a bo uh hi,” ci hi.

¹²TOPA awng, a kipatciil a kipan nangma in Pathian na hi hi. Nangma in ka Pathian na hi a, thiangtho in, a tawntungin na om hi. TOPA ka Pathian le hong dal pa awng, nangma in Babylon te na teal zo a, ko daan hong piak thei natu in na hatsak hi.

¹³Ahizong banghangin hi a thumaan ngawl misiate koithong thei ni ziam? Na mittangte siatna et natu in thiangtho leih a, khialna a vawt mite na mu thei bua hi. Tua ahikom amate sangin a thutangzawte a suksiat ciangin banghangin thim om thei ni ziam?

¹⁴Bangbangin tua mite sia lamlak tu ukpa nei ngawl ngasa le lungno honkhat bangin vawt thei ni ziam?

¹⁵Babylon te in ngasa tangthaak bang keakin mite man uh hi. Amate in tua ngeente taw kaikeak in a mat hu in lungdam in au ngawp lai hi!

¹⁶Amate in a ngeente ngawngawn bia in tuate atu sangaw biakpiakna vawt hi, banghang ziam cile na theampo sung pan a pha belte tua ngeente in ngasak hi.

¹⁷Amate in a tawntungin namsau zangh a, hesuakna nei ngawlin minamte susia tawntung tu ziam?