Read Siyin Chin Habakkuk 3 Bible Online

Habakkuk 3 - Siyin Chin bible

Habakkuk 3

¹Hisia in kamsaangpa Habakkuk thungetna ahi hi.

²TOPA awng, na sep na vawtte ka za zo a, zakta in lamdang ka sa mama hi. Tu in ko hun sung zongh ah nasep lianpi na sep ngeite hong seam kik ta'n. Na thin uuk ciang zong hesuakna hong nei ta'n.

³Edom panin Pathian hong pai kik tu hi; Paran mualte pan a thiangtho Pathian hong pai tu hi. A hoina in vantungte siin a; leitung in ama pokna taw kidim hi.

⁴Ama khualeng taanna taw hong pai tu a; a khut pan khuavak tee keak a, tualai ah a vaangletna kiseal hi.

⁵Ama in natnate a mai ah puak a, thina ii a zui tu in thupia hi.

⁶Ama a tawlngak ciang, leitung kithing a; Ama ii a et ciang minamte liinglawng hi. A tawntungin a om mualte kektham a; taanghlai hunin, a va ngeina mualte, a kip tawntung mualte kiasuk hi.

⁷Cushan mite launa ka mu a, Median mite liinglawng uh hi.

⁸TOPA awng, ngunte in hong thin uuksak ziam? Nang hong thinsosak sia tuipi ahi ziam? Meeite tungah na to hi; na mite zawna na puak ciang vuipi suangval meeikaai sia na leang ahi hi.

⁹Na thal zangh tu in na kinging zo hi, thaltangte kap tu in na kithoai hi. Na khualeng in simlei khentham hi.

¹⁰Mualte in nang hong mu ciangin liing uh a, van panin tui hong buasuk hi. Leinuai a tuite hawk vabuat a, a tuihualte khangin saangto hi.

¹¹A manlang na thaltangte a teet vazal ciang le na teitee te a taan ciang ni le tha te a omna ah tawlnga hi.

¹²Thin uuk sa in leitung na kaantan a; thinsona taw minamte na tuanhcil hi.

¹³Na mite le na teal kumpipa hun tu in na kuan hi. Mi ngilote lampui pa na vaatvawk a, a nungzuite na lalcipsak hi.

¹⁴A zawngkhalte a zawthawk uh ciang a oaiaam mite bangin kote hong thethaang tu in a ngalkapte vuipi bangin hong pai ciang na thaltangte in a ngalkaphonpi ukpa kaaplet hi.

¹⁵Na siphute taw tuipi na tuanhcil a, tuaciang a thahat tuite phuan hi.

¹⁶Hite theampo ka za a, lau in ka liing hi; ka muk zongh liing hi. Ka pumpi zaw vaneal hi, ka nuai ah ka peang sui tha in ka liik hi. Keima in ko hong simte Pathian ii daan piak hun hong tun tu thim dide in ka ngak tu hi.

¹⁷Theikungte nga ngawl a, sapitkungte a nga bua zong, olive kungte nga ngawl a, lote sungah an a piang bua zong, tuute thi siat a, khuibukte a hawm zong,

¹⁸ka lungdamin ka thinnuam veve lai tu hi. Banghang ziam cile TOPA Pathian in ka ngumpa ahi hi.

¹⁹Vaanglianpipa TOPA in thahatna hong pia hi. Ama in sangai bangin ka peang hong khosak a, mualte tungah hong keamcing hi.