Read Siyin Chin Zephaniah 1 Bible Online

Zephaniah 1 - Siyin Chin bible

Zephaniah 1

¹Hi thu in Amon tapa Josiah ii Judah kumpi a sep laitak, TOPA ii Zephaniah tungah a piak thu ahi hi- (Zephaniah pa Cushi, Cushi pa Gedaliah, Gedaliah pa Amariah hi a, Amariah pa sia Kumpi Hezekiah ahi hi.)

²TOPA in, “Keima in leitung na theampo ka lalsak tu hi,

³mihing le nganhing, vacim le ngasa dongin ka susia tu hi. Mi ngilote bo natu ka vawt tu hi. Mihing nam buppi ka susia tu a, kuama taang ngawl tu hi. Keima TOPA in ka son zo hi.

⁴“Jerusalem mite le Judah mite theampo daan ka pia tu hi. Baal biakna a khakbel te dongin ka bosak siat tu a, tua nasep a seam lawki thiampite zongh kuama in phawk ngawl tu hi.

⁵Innkhum tungah kaato in, ni, tha, aksite a bia pawpo ka susia tu hi. Kei hong bia hong paai in, a thumaan tu in kiciam pia zo napi, a zawk ciang Molech pathian min suangin a kiciam theampo ka susia tu hi.

⁶Kei hong nungngat in, kei hong zui nawn ngawlte, kei tungah lamlak natu ngen ngawl a, hong zuan ngawlte ka susia tu hi,” ci hi.

⁷TOPA thukhen tu ni hong nai zo hi; tua ahikom ama mai ah thim dide in om vun. TOPA in a mite pum aap siat tu in kithoai a, Judah a suttol tu in ngalte sam hi.

⁸TOPA in, “Tua kingawlup ni in, uliante, kumpi tapate le ngamdang ngeinate a zui theampo daan ka pia tu hi.

⁹Lawkite bangin biakna a vawt theampo le sutol vanh taw a tote inn sung a kidim natu in, a ngute le a thatte theampo daan ka pia tu hi,” ci hi.

¹⁰TOPA in, “Tua ni ciang, Jerusalem Ngasa Kongpi ah kaana aw na za tu uh hi. Khuapi khen a thak zawna munah tauna aw le mual tungah sukthapna awnging lian khat na za tu uh hi.

¹¹No, khuapi taw sangah a teangte awng, hi thu na zaak uh ciang tau in kap vun, banghang ziam cile sumvawtte theampo thi siat tu uh hi!

¹²“Tua hun ciang in meiinn khat la in, Jerusalem ka zong tu hi. Amate le amate tumtakin lungkim a, a kimuang mite in, ‘TOPA in a pha, a sia bangma vawt nei ngei bo’ a cite daan ka pia tu hi.

¹³Amate nei le lamh kisuttol in, a innte kisusia tu hi. Amate in a sak tu innte sungah teang ngeingawl tu a, a ciin tu sapitkungte pan sapittui ne ngeingawl tu uh hi,” ci hi.

¹⁴TOPA ii Ni a thupi sia hong nai zo hi — hong nai mama zo a, manlang takin hong theng tu hi! Tua ni in a thuak hak ni hi tu hi, banghang ziam cile, ngalkap hangsan belte zongh thinkiamin kap tu hi!

¹⁵Tua ni sia thinso ni khat, ngim nga ni le thinkiam ni khat hi tu a, siatna le lalna ni khat, khuazing le khuasia ni khat, meeikaai a, khuatuap ni khat hi tu hi.

¹⁶Luphungte taw a kidal khuapite le tausaangte a sim ngalkapte ii ngal kisimna awnging le ngal lemle aw taw a kidim ni hi tu hi.

¹⁷TOPA in, “Mihingte tungah tuabang tuasiatna ka tungsak tu a, a vekpi in mittawte bangin lei a zawt tu uh hi. Amate in kei tungah hong maw zo ahikom tu in a chisan uh tui bang in luang tu a, a mithi luangte lei ah kisial in a muat tu hi,” ci hi.

¹⁸Tua ni in TOPA in a thinsona hong lak ciang a ngunn a khamh te theampo zongin amate a hun zo buatu hi. Leitung bup sia a thin uukna meikuang in susia tu hi. Leitung a teang mihing theampo bona — thakhat thu in a bona — ama in tungsak tu hi.