Read Siyin Chin Zephaniah 2 Bible Online

Zephaniah 2 - Siyin Chin bible

Zephaniah 2

¹A maizum maw minam awng,

²note vui ii muut taangvai bangin hong kibet ma, TOPA thin uukna a kuang sia hong thet ma, ama thinsona hong lak ma in khua hong phawk tavun.

³Ama ii thupiakte a ni, ngam sungah a kiniamkhiak note theampo awng, TOPA sangah hong kiheak tavun. A maan sia vawt vun a, TOPA mai ah noma le noma kiniamkhiak vun. Tua hile TOPA ii a thin uukna hong lak ni ciangin daan khak natu pan suakta tha tu nu hi.

⁴Gaza khuapi ah a kinusia kuama om ngawl tu hi. Ashkelon kitaisan tu hi. Ni lang sungah Ashdod mite kihawlkeak tu hi, tuaciang Ekron mite sia amate khuapi pan kihawlkeak tu hi.

⁵Tuipi hui ah a teang no Philistine mite awng, a lal hi zo nu hi. TOPA in no tungah thukhen zo hi. Ama in hong susia tu a, khat zongh na taang buatu uh hi.

⁶Tuipi hui na ngam uh sia tuucingte bukte le tuukhawkte omna lozau suak tu hi.

⁷Judah mi a nungta laiteng in na leitang uh la tu hi. Amate in a ngan honte thana in nei tu a, Ashkelon innte ah ngiak tu uh hi. TOPA a Pathian in amate taw omkhawm tu a, amate nuamsasak kik tu hi.

⁸TOPA Vaanglianbelpa in, “Moab le Ammon mite in ka mite a zawnsakna, a nomuna le, a ngam ka sut tu hi ci in a kiphatsakna zongh ka za zo hi.

⁹Israel te ii Pathian, a nungta TOPA ka hi bangma in Moab le Ammon sia Sodom le Gomorrah bangin kisusia tu hi, ci in ka kiciam hi. Tuate sia cikhukte le a laltham top, lopa bek pona mun suak tu hi. Ka mi a nungta laite in amate vanh suttol tu a, a ngam laaksak tu uh hi,” ci hi.

¹⁰Moab le Ammon mite kiphatsakna, a kisaktheina le vaanglianbelpa TOPA ii mite a selno hu in daan a piak tu zia sia tuabang ahi hi.

¹¹TOPA in amate lausak tu hi. Ama in leitung pathiante sia bangma ngawl suaksak tu a, tua zawkciang minam theampo in amate ngam tek ah ama bia tu hi.

¹²TOPA in Ethiopia mite zongh thisak tu hi.

¹³TOPA in Assyria suksiat natu in a vaangletna zangh tu hi. Ama in Nineveh khuapi sia a lalsa a kinusia sa, tui om ngawl sennealngam suaksak tu hi.

¹⁴Tua mun in tuuhon, khuihon le nganhing namcin tatna mun hi tu hi. Tua a lalsa munah simbute teangin khelkite panin haam tu hi. Kongkha saamkiil tungah va-akte haam tu hi. A inn sakna thingkal ahi cedar thingte kilakeak tu hi.

¹⁵Khuapi kiphasak mama, a thahatna suangin, ngam muang a kisa khat tungah tuabangin piang tu hi. A mite in amate khuapi sia simleitung ah khuapi lianbelin ngaisun uh hi. Bangza a ngamtongta mun, ngamsate tawl omna mun suak tu ziam! A kaantan in a pai pawpo in a mu ciang patau in ton tu hi.