Read Siyin Chin Zephaniah 3 Bible Online

Zephaniah 3 - Siyin Chin bible

Zephaniah 3

¹A mite a zothaw, tatsia in ngalphuang nuam Jerusalem khuapi a lal hi zo hi.

²Tua sia in TOPA thu ngai ngawl a, a kiteknate zongh saang ngawl hi. TOPA muang ngawlin, huna zongh ngen ngawl hi.

³A uliante sia tawpi hawk bang hi a; a thukhenmangte sia, duhop leih kisa in a zing ciang dong sangu khat zongh a khe ngam ngawl ngiapui ngilkialte bang ahi uh hi.

⁴Kamsaangte in sep nop vacin nei ngawl a, thimthel uh hi; thiampite in a thiangtho nate ninsak in, Pathian thukhamte amate phattuam natu in deikai uh hi.

⁵Ahihang khuapi sungah TOPA om lai hi; ama in a maan bang seam a, a hi ngawlte vawt ngeingawl hi. Zing sim a pealmaw in a mite tungah thutang lak hi. Tua hi napi thutang ngawl mite in a maan ngawlte ma vawt tan viuveu a, a mai uh zum ngawl hi.

⁶TOPA in “Minam theampo ka maaimot zo hi; a khuapite ka susia a, a luphungte le a tausaangte a siacip sa in ka nusia hi. A khuapite kitaisan a; lampite a tawn om ngawl a — mihingte kuama om nawn ngawl hi.

⁷Ka ngaisutna ah tuasia ciang ka mite in kei hong thasia tu a, tuaciang ka tek nate hong saang tu hi, ka hilnate mangil ngeingawl tu hi ci in ka tuat hi. Ahihang hai ngawlin a ngamtat siat ngei ma in, a sia ngamta veve uh hi.

⁸TOPA in, “Ngak zi vun, ka minamte ka mawsak tu ni ngak vun. Ka thin uukna ii thahatna ka heaksak nopna in minamte le kumpi ngamte khoptua tu in ka thin ka khensat zo hi. Ka thinsona meikuang in simlei bup ka kaanghthamsak tu hi.

⁹“Tua sia ciang ngam tuatuamte sungah mihingte ka kikhealsak tu a, amate in kei tung bek ah thu hong ngen in pathian dangte tungah thungen nawn ngawl tu hi. Amate a vekpi in keima thu hong ni tu uh hi.

¹⁰Ngam khuala Ethiopia pan ngawngawnin a kithethaang ka mite in kei tungah biakpiakna hong pia tu uh hi.

¹¹Tua hun ciang, kei nong langpan huvau in no ka mite in na maizum tu kul nawn ngawl tu uh hi. A kiphasak le a kisathei theampo ka heam tu a, ka mual thiangtho tungah kei nong do kik ngei nawn buatu uh hi.

¹²A kiniamkhiak, a thinnip mite tualai ah ka nusia tu a, kei kungah hu ngenin hong pai tu hi.

¹³A taanglai Israel mite in kuama tungah khial ngawl tu a, leilot thu son ngawlin ngual a theam buatu uh hi. Amate ma vang daupai in ngammuang tu a, kuama a kiita buatu uh hi,” ci hi.

¹⁴Israel mite awng, Lungdamna taw lasa in au vun! Jerusalem awng, na thin theampo taw lungdam vun!

¹⁵TOPA in na daan thuakna bosak zo hi; Na ngalte theampo hong hepsak hi. TOPA, Israel kumpipa sia note taw omkhawm hi; tu in bangma lau natu thu om ngawl hi.

¹⁶Jerusalem tungah amate ii hi bangin a ci tu hun hong theng tu hi, “Lau heak in, Zion khuapi awng! Na khutte zawsak in khia vanuang heak in!

¹⁷TOPA na Pathian in nang taw omkhawm hi; ama ii thahatna in zawna hong pia hi; TOPA in nang tungah lungdam tu hi, tuaciang ama ii itna sungah nuntakna thak hong pia tu hi. Ama in lasa tu a, na tungah lungdam tu hi.

¹⁸Mihingte poai khat sungah a lungdam bangma hi tu hi.” TOPA in “Lal natu hong tawnnate ka vengsak zo hi; tuaciang na min daina teng kong laaksak zo hi.

¹⁹A hun hong theng tu hi! Nang hong zothawte daan ka pia tu hi; a peangbai theampo ka suatak tu a tuaciang saltaangte inn ah ka ciapui tu hi. Amate ii maizumna sia patoaina taw ka laih tu hi; tuaciang leitung theampo in amate pok tu uh hi.

²⁰A hun hong tung tu hi! A kithethaang na mite inn ah kong ciapui tu hi; Simleitung bup ah na min kong thangsak tu a, tuaciang khatvei a khangto a nuamsa in kong vawt kik tu hi,” ci hi. TOPA in ci zo hi.