Read Siyin Chin Haggai 1 Bible Online

Haggai 1 - Siyin Chin bible

Haggai 1

¹Darius ii Persia kumpilian a sep zawk a kum niina kum, a tha luk tha, ni masabel ni in TOPA in kamsaangpa Haggai tungtawnin thu son hi. Shealtiel tapa Judah ngamukmangpa Zerubbabel atu le Jehozadak ii tapa Thiampi Lianbel Joshua atu in thupuak ahi hi.

²Vaanglianbel TOPA in Haggai tungah a cina pan, “Hi mite in tu hun sia Biakinnpi sakkik natu hunpha hi ngawl hi, ci uh hi.”

³Tua zawkciang TOPA in kamsaangpa Haggai tungtawnin hi thu teng mite tungah pia hi:

⁴“Ka mite awng, ka Biakinnpi a siacip sa in a om laitakin pha tak a kisa innte sungah banghang teang tu nu ziam?

⁵No tungah bang thupiang cisia mu ngawl nu ziam?

⁶Thaicii tam mama na tu uh a, ahizong an tawm bek na la uh hi. Anneak tawm tu na nei uh a, ahizong na khamkhop tu na nei bua uh hi. Sapittui neak tu na nei uh a, ahizong na kham tham tu na nei bua uh hi. Puansilh na nei uh a, ahizong a lum tham tu na nei bua uh hi. Tuaciang naseam khat in a nuntak khom natu thalaw zo ngawl hi.

⁷Hisia a pian theina thu he ngawl nu ziam?

⁸Tu in mual tungah kaato tavun a, inn thingte la in Biakinnpi sa kik vun; tuasia ciang kei ka lungkim tu a, a kilawm bangin kei hong kibia tu hi.

⁹“Anlaak tu tam mama na lamen uh a, ahizong tawm bek piang hi. Tuaciang an laakte na ciapui uh ciang kong muutkeaksak hi. Banghang tuabang vawt khi ziam? Banghang ziam cile note mi sim in ama inn vawtin a komlaak laitakin ka Biakinnpi a siacip sa in om hi.

¹⁰Tua hu in nguazu ngawl a, bangma po thei ngawl hi.

¹¹Keima in leitang tung — a mualte, anciinna lote, sapithuante, olive ciinnate tung — lei pan a piang an namcin tung, mihingte le ngannote tung, na ciin sa theampo tungah nguatui kong hangsak hi,” ci hi.

¹²Tua zawkciang Zerubbabel, Joshua le Babylon ngam saltanna pan hong cia kik theampo in TOPA a Pathian sawl bangin vawt uh hi. Amate lau ahiciang, TOPA ii kamtaipa, kamsaang Haggai thu ni uh hi.

¹³Tuasia ciang Haggai in hi TOPA thupuak sia mipite tungah son hi: “Note taw kei kong omkhawm tu hi, ci in kong kamciam hi,” ci hi.

¹⁴TOPA in Biakinnpi sak tu vai mi theampo thawn hi: Judah ngamuk mangpa Zerubbabel; Thiampi Lianbel Joshua, le saltanna pan hong ciakik mite theampo ahi hi. Amate ii Vaanglianbel TOPA, a Pathian Biakinnpi ah a nasep kipat ni sia,

¹⁵Darius kumpilianpa maan zawk a kum nii kum, tha luk tha, 24 ni ahi hi.