Read Siyin Chin Zechariah 11 Bible Online

Zechariah 11 - Siyin Chin bible

Zechariah 11

¹Lebanon awng, mei in na cedar thingkungte a kaktum thei natu in na kongkhate hong in.

²Cypress thingkungte awng, kapin tau vun — cedar thingte puk zo hi; tua thingkung minthangte kisusia zo hi! Bashan oak thingkungte awng, kapin tau vun — taamthing zingte kiphuk zo hi!

³Ngam ukte khuangai in kap hi; amate minthanna bo zo hi! Tawpite hawk ngai vun: Jordan ngundung, amate ii teenna duithuk sia kisusia zo hi!

⁴TOPA ka Pathian in kei tungah, “Ngaw tu a kikoi tuu honte a cingpa bang hi in.

⁵Tua tuute sia a tote in that a, a thatte daan kipia ngawl hi. Amate in a sa zuakin, ‘TOPA pok vun! Ei hau zo hing!’ ci hi. A tuucingte ngawngawn in hesuakna nei ngawl uh hi,” hong ci hi.

⁶(TOPA in, “Leitung ah kuama hesuak nawn ngawl tu khi hi. Keima mama in a ukte khut sungah mi theampo ka koi tu hi. Hi ngamukte in leitung siacipsak tu a, amate thahatna panin tua leitung ka suatak buatu hi,” ci hi.)

⁷Tuu a lei, a zuakte in kei hong cial a, kei sia a kingo tu tuute a cingpa ka suak hi. Ciangkang nii ka la a: khat sia “Maipha piakna” ka ci a, a dang khat sia ‘Kilomkhatna’ ka ci hi. Tuaciang tuuhonte ka cing hi.

⁸Kei hong ensan tuucing dang thumte tungah ka thin a sau zo bua hi, amate teng sia tha khat sungin ka tawpsak hi.

⁹Tua zawkciang tuuhonte tungah, “No ii tuucing pa hi nawn ngawl tu khi hi. A thi tu teng thi vun a, a kisusia tu teng kisusia hen. A taanglai teng in amate khat le khat kisucip ta uh hen,” ka ci hi.

¹⁰Tua zawkciang ‘Maipha piakna’ a kici ciangkang la in, TOPA ii minam theampo taw a vawt thuciamna phiat na tu in tuasia ka thiaktan hi.

¹¹Tua ahikom tua thuciamna sia, tua ni in kiphiat hi, tuu a zuak le a leite in kei hong en nginge a, ka sep ka vawtte tungtawnin TOPA in thuson ahi hunlam he uh hi.

¹²Amate tungah, “Na uuk uh le ka thaman hong pia tavun. Na uuk bua uh le noma tang vun,” ka ci hi. Tua ahikom amate in ka thaman tu in ngunntang sawmthum hong pia hi.

¹³TOPA in, keima tungah “Tua sumte biakinn sumkholna ah koi ta'n hong ci hi. Tua ahikom ngunntang 30 — kei taw kiphu a sak a tam mama sum — tua teng la in biakinn sumkholna ah ka koi hi.

¹⁴Tua zawkciang ‘Kilomkhatna’ a kici ciangkang niina sia ka thiaktan a, Judah le Israel kilomkhatna kitamhtham hi.

¹⁵Tua zawkciang TOPA in keima tungah, “Khatvei ma tuucingpa heang leleau in a, tutung sia a mannung ngawl tuucingpa in, kiheang in.

¹⁶Ka tuuhonte uk tu in tuucing khat ka koi hi, ahihang ama in lalna a thuak tu tuute le huu ngawl a; a bote le zong ngawl, a liamte le bawl ngawl, a ciidamte zongh anvaak ngawl hi. Tuabang a sep tu luangin ama in tuu a thaubelte ii sa ne in a peangcinte khok keak hi.

¹⁷Tua a mannung ngawl tuucingpa a lal hi zo hi! Ama in a tuuhonte nusia zo hi. Ama thahatna sia ngalte in lalcipsak tu hi. A baan ngawtaak tu a, a mit ziatsang taw tu hi,” hong ci hi.