Read Siyin Chin Zechariah 12 Bible Online

Zechariah 12 - Siyin Chin bible

Zechariah 12

¹Hi thupuak in Israel taw kisai vante a phalh, lei a bitphua, mihing nuntakna a pia TOPA tung pan ahi hi. Ama in,

²“Jerusalem sia sapittui hai khat bangin ka vawt tu hi; a kiimkot a minam tuatuamte in ne tu a, zu kham bangin hoi vatut tu uh hi. Amate in Jerusalem a uumci uh ciangin, Judah khuapi dangte zongh ki uumci tu hi.

³Ahihang tua hun hong thet ciang, Jerusalem sia a ngit suangtum pui khat bangin ka vawt tu a — tuasia laamto tu a kipan minam pawpo liam tu hi. Leitung minam theampo kipawlin ama sim tu uh hi.

⁴Tua hun ciang a siphute theampo ka lausak tu a, a tung to teng ka mawmawsak tu hi. Judah mite ka encik tu hi, ahihang a ngalte ii siphute a mit ka tawsak tu hi.

⁵Tuasia ciang Judah bee le phungte in amate le amate tungah, ‘Vaanglianbelpa TOPA in Jerusalem ah a teang a mite thahatna pia hi’ kici tu hi.

⁶“Tua hun ciang Judah bee le phungte duisung ahibuale, thaw an min lak pha lo sung a meikaang bangin ka vawt tu hi — amate in a kiimkot minamte theampo susia tu uh hi. Jerusalem mite ahile khuapi sungah ngammuangin om tu uh hi.

⁷“Keima, TOPA in Judah ngalkaphonpite zawna ka pia masa tu hi, tua hile David suan le paalte le Jerusalem mite ii a nga tu patoaina sia a taanglai Judah mite nga tu patoaina sangin lian zaw ngawl tu hi.

⁸Tua hun ciang TOPA in Jerusalem a teangte dal tu a, amate sungah a thazawm belte ngawngawn David bangin hat tu uh hi. David suan le paalte in TOPA ii vantunglalang bang ahizong Pathian mama bang ahizong amate lampui tu uh hi.

⁹Tua hun ciang Jerusalem sim tu a kipan minam theampo ka susia tu hi.

¹⁰“Keima in David suan le paalte le Jerusalem a teang a dangte sia hesuakna thin le thungetna thin taw ka dimh tu hi. Amate in nam taw a tuplup pa en tu uh a, ta khat bek a nei a thisuate khuangai bangin khuangai tu uh hi. Amate in a tapaciil a khuaite bangin nasia tak khuangai tu uh hi.

¹¹Tua laitakin Jerusalem ah heena kaana sia Megiddo zaangtam a Hadad-rimmon atu heena le kaana za in nasia tu hi.

¹²Ngamsung innkuan simin khuangai in om tek tu hi: David suante innkuan, Nathan suante innkuan, Levi suante innkuan, Shimei suante innkuan, a dang innkuante hi siat tu hi. Ngamsung innkuan simin khuangai tek in a om ciang, pate ahile numeite taw kihel ngawlin a tuamin khuangai tu uh hi.