Read Siyin Chin Zechariah 14 Bible Online

Zechariah 14 - Siyin Chin bible

Zechariah 14

¹TOPA sia thukhenin a to tu ni nai zo hi. Tuaciang Jerusalem kiphuul tu a, na mu tangin a vanh laakte kihawm tu hi.

²TOPA in Jerusalem sim tu in minam theampo khawmtua tu hi. Khuapi kila in, innte kiphuul tu a, numeite buan in khialpui tu hi. Khua mite a lang sia sal in kipaipui tu a, a taanglai teng ahile khuapi pan kipaipui ngawl tu hi.

³Tua zawkciang, nidang lai in a sim ngei bangma in TOPA kuanin tua minamte sim tu hi.

⁴Tua hun ciang Jerusalem nisuana sang Olive mual tungah ama ding tu hi. Tuaciang Olive Mual sia nisuana sang pan nitumna sangah phel nii in kikhen a kuam lian khat om tu hi. Mual a lang sia saksangah kikhiin tu a, a lang sia thang sangah kikhiin tu hi.

⁵Mual khen nii in a khen, tua kuam kaantanin no na suakta tu uh hi. Judah kumpipa Uzziah hunsung zinliin lai in, na taanghpupite tai bangin na tai tu uh hi. TOPA ka Pathian in vantunglalang theampo hong pai pui tu hi.

⁶Tua hun hong thet ciang, khuasik, ahibuale thuamluak

⁷le khuazing cite om nawn ngawl tu hi. Zan ngawngawn in khuavak top tu hi. TOPA bekin hisia a pian tu hun he hi.

⁸Tua ni hong thet ciang, Jerusalem pan tui thiang hong luang tu a, a lang sia Tuipi Thi ah, a lang sia Mediterranean tuipi ah luang tu hi. Tua tui sia tuk taw khaal taw kum tawntungin, luang tu hi.

⁹Tua zawkciang TOPA sia leitung theampo ii kumpipa in hong mang tu a; ama ii Pathian sia a kuama po in bia tu a, tua min taw ma in ama he tu uh hi.

¹⁰Saksang Geba panin thangsang Rimmon dong ngamkuam buppi leitam kisua tu hi. Jerusalem sia kiim le paamte sangin saangzaw tu hi; khuapi in Benjamin kongpi pan nidang kongpi omna ngei Kiing Kongpi dong, tuaciang Hananel Tausaang pan kumpite sapittui suuknate dongin kithung tu hi.

¹¹Mihingte tua munah ngam muangin teang tu a, siatna in a lauthawn nawn buatu uh hi.

¹²TOPA in Jerusalem a sim minamte theampo tungah a kiitak huai mama natna tungsak tu hi. Amate nungta nginge lai in a sa uh muat tu hi; a mitte le a leeite muatcip tu hi.

¹³Tua hun ciang TOPA in amate lungmangsak biaibuai in lausak tu a, a kuama po in a kungah a om khat pawpo zamhin ngal vawt tu hi.

¹⁴Judah mite in Jerusalem a huu tu in ngaldo tu uh hi. Amate in minam theampo ii nei le lamh — khamh, ngunn le puan tam mamate laaksak tu hi.

¹⁵A kiitak huai mama natna khat sia ngalte ngiaphual a om nganhingte theampo — siphute, laate, kalaohte, laano namte tung zongh ah tung tu hi.

¹⁶Tua zawkciang Jerusalem khua a sim minamte sung pan a nungta laite theampo sia Vaanglianbelpa TOPA bia tu le Buk Poai khaam tu in kum simin Jerusalem ah pai tu uh hi.

¹⁷Minam khat pawpo in Vaanglianbelpa TOPA sia kumpi bangin biak tu a nial le amate ngam ah nguazu ngawl tu hi.

¹⁸Egypt te in tua Buk Poai khaam tu a nial le, tua poai khaam tu a nial pawpo tung ah TOPA ii puak tua natna sia ma taw daan thuak tu hi.

¹⁹Tua Buk Poai a khaam nuam ngawl Egypt te le minam dangte tungah hi natna daan tung tu hi.

²⁰Tua hun ciangin siphu ngawlokte tung ngawngawn ah “TOPA atu Kitavaw” ci kammalte ki at lai tu hi. Biakinn sung a an huanna bealte zongh biaknatau mai a kuangte bangma in thiangtho tu hi.

²¹Jerusalem le Judah ngam bup sung a an huanna beal theampo sia Vaanglianbelpa TOPA biakna a zak tu in kituam koi tu hi. Sangaw biakpiakna a pia mite in tua bealte biakpiakna sate huanna in zangh tu hi. Tua hun hong thet ciang Vaanglianbelpa TOPA Biakinnpi sungah sumvawtte khat zong om nawn ngawl tu hi.