Read Siyin Chin Zechariah 5 Bible Online

Zechariah 5 - Siyin Chin bible

Zechariah 5

¹Khua ka et kik le vui sungah laizial leang khat ka mu hi.

²Vantunglalang in ka mu sia hong dongh hi. “Laizial khat vui sungah leang hi; tuasia metre kua sau a, metre li le lang zai hi,” ka ci hi.

³Tuaciang ama in kei tungah, “Tuasia tungah ngam bup sungah a tung tu haamsiatna ki at hi. A laizial langkhat ah ngamsung panin nguta a minpiang kinotkeak tu hi; a langkhat ah kiciamna taw leilot thu a son theampo zongh kikaikeak tu hi, ci in ki at hi.

⁴Vaanglianbelpa TOPA in tua haamsiatna ka tungsak tu a, tuasia in nguta pawpo ii inn le, kiciamna taw leilot thuson pawpo ii inn te sungah tum tu hi ci hi. Tua haamsiatna sia amate inn sungah teang tu a, tua innte a lalcipsa in kinusia tu hi,” hong ci hi.

⁵Vantunglalang kilangh kik a, “En in! Na dang khat hong pai hi!” hong ci hi.

⁶“Bang ziam?” ci in ka dongh hi. Ama in, “Tuasia khum khat hi a, ngam bup ii mawna a lakna hi,” ci in hong zo hi.

⁷Khum sitna sia haak taw kivawt hi. Ka et le, a sitna hong kilaamto a, tua khum sungah numei khat to hi!

⁸Vantunglalang in, “Hi numei in ngitlona lak hi,” ci hi. Tuaciang ama in tua numei sia khum sungah hensuk in, a sitna taw sin kik hi.

⁹Ka etto ciang hilniang vacimlian ii thate bangin, a hat thate taw keima sangah hong leang numei nii ka mu hi. Amate in khum hong zamh a, lenpui vingveng hi.

¹⁰Vantunglalang tungah, “Amate in tuasia koisungah paipui tu ziam?” ci in ka dongh hi.

¹¹Ama in, “Tuasia atu in biakinn khat a saksak natu mun Babylon ah kipaipui tu hi. Biakinn sak a kiman ciang, a biak tu in a sungah tua khum kikoi tu hi,” hong ci hi.