Read Siyin Chin Malachi 1 Bible Online

Malachi 1 - Siyin Chin bible

Malachi 1

¹Hisia in Malachi ii Israel mite tungah a son tu TOPA ii a piak thupuak ahi hi.

²TOPA in a mite tungah, “No kong it tawntung hi,” ci hi. Ahihang amate in, “Bangbangin nong itna hong lak kana ni ziam?” ci in zo kik hi. TOPA in, “Esau le Jacob te sia unau laipee ahihang Jacob le a suan a paalte ka it a,

³tuaciang Esau le a suan a paalte ka ngaimaw hi. Esau ii mualtung ngam ka susia a, a leitang sia ngiate atu in ka nusiat hi,” ci in zo hi.

⁴Esau suan le paal Edom te in, “Ka khuate hong suksiatsak hi, ahihang tua khuate ka sa kik tu uh hi,” a ci ciang TOPA in, “Khua sa kik ma hen — ka nuaitham kik tu hi. Mipite in tuate tungah, ‘Siatna ngam’ le ‘TOPA ii a tawntung a thin uukna ngam’ a ci tu hi,” ci in zo kik tu hi.

⁵Israel mite in hite a mittang uh taw mu tu a, tuaciang amate in, “Israel ngam puasia ngawngawn ah TOPA thahat hi,” ci tu uh hi.

⁶Vaanglianbelpa TOPA in thiampite tungah, “Tapa khat in a pa thasia a, innteang khat in a topa zakta hi. Keima sia na pa ka hi a — banghangin hong patoai ngawl nu ziam? Keima sia na topa khi hi — banghang hong zakta ngawl nu ziam? Note in kei hong zawngsak napi, ‘Bangbangin hong zawngsak khu ziam?’ na ci lai uh hi.

⁷Bangbang ziam cile hi bang hi — ka biaknatau tungah a man nei ngawl ante nong pia uh hi. Tua zawkciang note in, “Bangbangin hong zakta ngawl khu ziam, ci in nong dongh uh hi. Hong son tong — ka biaknatau na zawnsak vawtna, na thusim ngawlna taw nong zatak ngawlna uh kilangh hi.

⁸A mittaw, a ciina, ahibuale a peangbai nganno taw sangaw biakpiakna nong nei uh ciang, tuabangte phamaw sa ngawl na hi uh ziam? Ngamukmangpa tungah tuabang ngannote pia ka sin vun. Note tungah ama lungkimin maipha hong pia tu ziam?” ci hi.

⁹Tu in no thiampite awng, ei tungah Pathian hong dik natu in hong ngen ka sin vun. Ama in na thungetna hong zo ngawl tu a, tua in noma mawna hi tu hi.

¹⁰Vaanglianbelpa TOPA in, “Ka biaknatau tungah a kimang ngawl meite na hal ngawl natu in note khat in biakinn kongkhate khak le uh teh kong oai hi. No tungah ka lungkim ngawl a; kei kung nong paipui biakpiaknate kong saang buatu hi.

¹¹Leimong khat pan mong khat ah a om mihingte in kei hong patoai uh hi. Amate in mun theampo ah ngimnamtui hong hal a, tuaciang a saan thamman sangaw biakpiaknate hong pia hi. Amate theampo in kei hong patoai uh hi!

¹²Ahizong note in keima biaknatau sia bangma man nei ngawlin na son uh ciang le tua biaknatau tungah na nialnamh ante na piak uh ciangin, keima hong simmaw na hi uh hi.

¹³Noma in, ‘Hite bangza in cimtak huai ziam!’ ci in nong mukmen uh hi. Nong biakpiak natu in a kingu nganno ahibuale a peangbai, a nanghno khat nong paipui uh hi. Note tung pan tuabangte hong saang tu in hong um nu ziam?

¹⁴A nganhon sung pan keima piak tu in hong kamciam a limci khat nei napi, a man nei ngawl nganno khat taw sangaw biakpiakna nei tu in hong theampa in haamsiatna thuak tahen! Banghang ziam cile keima kumpi lian khat ka hi a, ngam theampo pan mihingte in kei hong kiita uh hi,” ci hi.