Read Siyin Chin Matthew 10 Bible Online

Matthew 10 - Siyin Chin bible

Matthew 10

¹Jesus in nungzui sawm le niite khawmin, doai ngilo naw theina le, natna satna le ciluang natna theampo damsak thei natu thu neina pia hi.

²Nungzui sawm le nii teng sia hi teng ahi hi; a masa phit in Simon (Peter zongh kici) le a suapuipa Andrew, Zebedee ii tate James le a suapuipa John;

³Philip le Bartholomew; Thomas le shiadongpa Matthew; Alphaeus ii tapa James le Thaddaeus;

⁴Minam it pa Simon, le Judas Iscariot kici Jesus leeheakpa ahi hi.

⁵Hi sawm le nii teng hi bangin thupiakna taw Jesus in sawl hi: “Gentile mite ngamsung mun khat pawpo le Samaria te khuapi pawpo ah, pai heak vun.

⁶Tuu bangin a mangthang Israel mite kungah paizaw vun.

⁷Pai tavun a, ‘Vantung ngam hong nai zo hi!’ ci in thuhil tavun.

⁸Ciinate na damsak vun a, mithite na nungtasak kik vun, a lauhuai vun natna veite damsak vun a, doaite not vun. A thongin na saan uh bangma, man la ngawlin pia tavun.

⁹Na zaip sungah khamh, ngunn le taausan sumte pua heak vun.

¹⁰Nguai an keng heak vun a, puan laih natu le peangdap laih natu keng thua heak vun, ciangkhut zongh keng heak vun. Naseam khat sia a kitaangsap tu teng, kipia tu hi.

¹¹“Khuapi khat ahizong, khuano khat ahizong, na thet uh ciang, a sungah tum vun a, no zin hong do nuam khat po zong phot vun, tua mun pan na din kik uh dong, zin kheal heak vun.

¹²Inn khat sungah na tum uh ciangin, ‘Thupha na nga tavun,’ ci vun.

¹³Tua innteakte in, hong saang a, ahile, thupha nga tavun ci a, na paupui nate, tua munah kip tahen, ahizong, hong saang nuam bua ahile tua na piak thuphate dawk kik tavun.

¹⁴Tuaciang innkuan khat po khua khat po in hong saang nuam bua a, na thuson hong ngai nuam buale, tua mun taisan tavun a, na peang nuai leivuite thin vaset tavun.

¹⁵A tatak kong ci ciang thukhen ni ciangin tua khua mite sangin, Sodom le Gomorrah khua mite tungah Pathian in hesuakna lak zaw tu hi.

¹⁶“Ngai vun! Note tuu bangin ngiahon sungah kong tha hi. Ngul bangin pilvang vun a, ngam vakhu bangin cingh tavun.

¹⁷Kidawm tavun, banghang ziam cile mihingte in hong man tu a, zum ah hong then in, synagogue te ah hong vel tu hi.

¹⁸Kei hu in note sia ngamukte le kumpite mai ah hong kipuak tu a thu hong sit tu hi. Amate tung le Gentile te tungah Lungdamna Thupha huvau na son thei natu hi tu hi.

¹⁹Amate in note thu kisit tu in hong aap ciangin, na pau tu uh le na pauzia tu uhte tungtaang ah thinngim heak vun; a hun hong thet ciangin na pau tu uhte hong kipia tu hi.

²⁰Banghang ziam cile kammal na pau uhte sia no kammal hi ngawl tu hi; tuate sia na pa ii Thaa tung pan hong pai a, note tungtawnin hong pau ahi hi.

²¹“Mihingte in a suapuite thalup tu in aap tu a, pate zongh in tate tungah tuabang ma in ngamta tu hi; tate zongh in nute pate langpan tu a, thatlumsak tu uh hi.

²²Kei hangin a kuama theampo in, hong ensan tu hi. Ahihang a tawp dong a thuak zo sia kihun tu hi.

²³Khuapi khat sungah hong kivawtsiat ciangin, khuapi dang khat ah tai vun. A tatakin kong ci ciang, Mihing Tapa hong pai kik ma in, Israel te khuapi theampo ah na nasep, na khuangkhim zo buatu uh hi.

²⁴“Nungzui khat sia a syapa sangin lianzaw ngawl hi; sal khat sia a topa sangin lianzaw ngawl hi.

²⁵Tua ahikom, nungzui khat sia a syapa taw a kiban ciangin, lungkim tahen a, sal khat zongh in a topa taw a kiban ciangin, lungkim tahen. Baangkua pabel sia Beelzebul a kici le, a innkuan pui dangte zongh min a sia seseam taw kina tu hi.

²⁶“Tua ahikom, mihingte kiita heak vun. Tu laitakin a kiseal theampo kilangh tu a, thuku theampo kipualaak tu hi.

²⁷Khuazing sungah kong son theampo khuavak sungah na son kik tu uh hi. Tuaciang a thimtham a na zaak theampo, innkhum tung panin, na thangsak tu uh hi.

²⁸Pumpi that thei a, a thaa a that thei ngawlte na kiita heak vun; hell sungah thaa le pumpi a lalcip khawmsak thei Pathian kiita zaw vun.

²⁹Banghang ziam cile dangkasan pheak khat taw tonbawm nii kilei thei hi, ahitazong na Pa ii thukimna ngawl taw tonbawm khat zongh leitung ah taak thong ngawl hi.

³⁰Note na hi uh le na lu tungah na samzamte dongin hong kisimsak siat sa ahi hi.

³¹Tua ahikom lau heak vun; note sia tonbawm tam mamate sangin manpha zaw nu hi.

³²“Mihingte mai ah khat po in kei neisa a hina a pualaak le, vantung ka Pa mai ah, kei zongh in tuabang ma in ka pualaak tu hi.

³³Ahihang mihingte mai ah khat po in kei hong nial a ahile, vantung ka Pa mai ah kei zongh in ka nial tu hi.

³⁴“Leitung ah kilemna puak tu in hong pai hi, ci in ngaisun heak vun; kilemna puak tu in hong pai hi ngawl khi hi, namsau khat puak tu in hong pai khi hi.

³⁵Tapate in a pate langpan tu a, tanute in a nute langpan tu a, mote in a tonupite langpansak tu in hong pai ka hi hi;

³⁶mihing khat ii a thuak laakbel a ngal sia, ama innkuanpuite ma hi tu hi.

³⁷“Kei sangin a nu a pa a itzaw sia kei nungzui tu in kiphu ngawl hi; kei sangin a tapa ahibuale a tanu a it zaw te kei nungzui tu in kiphu ngawl hi;

³⁸a kuama po, a thinglamtee kisuanhin ka nung hong zui ngawlte, kei nungzui tu in kiphu ngawl hi.

³⁹A nuntakna a nga natu a hanciam khat pawpo sia a nuntakna taan tu hi; ahihang a kuama po kei hangin a nuntakna a taan le, nuntakna tatak nga tu hi.

⁴⁰“A kuama po no hong saangte sia, kei hong saang ahi hi; tuaciang kei hong saangte sia kei hong sawlpa saang ahi hi.

⁴¹A kuama po in mihing khat sia Pathian thupha puak a hina taw a saang le Pathian thupha puakte ii thaman kihawm tu hi. A kuama po in mihing khat sia mihing pha a hina taw a saang le mihing phate ii thaman ma kihawm tu hi.

⁴²Hi sung ka nungzuite sung pan, a nobel khat sia, keima nungzui ahi hu in, tuidam hai khat bek a pia zong a maan takin thaman saang tu hi,” ci hi.