Read Siyin Chin Matthew 11 Bible Online

Matthew 11 - Siyin Chin bible

Matthew 11

¹Jesus in a nungzui sawm le niite tungah hi hilnate a nei zawkciang, tua mun nusia in tua mun taw a kinai khuapite ah hilna le thuhilnate nei tu in pai uh hi.

²Tuiphumpa John in a thongtaakna mun panin, Christ nasepnate a zaak ciangin, a nungzuite pawlkhat kamtai in ama kungah paisak hi.

³Amate in Jesus tungah, “Hong son ta'n, John ii ‘Hong pai lai tu hi,’ a ci sia nangma ni ziam maw, ngualdang khat muangmaw lai tu khu ziam?” ci in dongh hi.

⁴Jesus in, “Heak kik tavun a, John munah na mu na zaak uh teng son kik tavun:

⁵mittawte khuamu in, peangbaite lampai thei a, a lauhuai vun natnate kidamsak in, nangongte khuaza thei a, a thisate kinungtasak kik in, a zawngte tungah Lungdamna Thupha kihil hi.

⁶Kei tungtaang ah a lungmang ngawlte bangza in lungdam ziam!” ci hi.

⁷John nungzuite a cia kik laitakin, Jesus in John ii thu teng mihonte tungah son hi: “Sennealngam sungah om John kungah na pai uh ciang, bang teng mu tu in kimuangmaw nu ziam? Vui ii a kuaikhum lopate khat po ziam?

⁸A bangbel mu nuamin kuan nu ziam? Puansilh hoi nawno a silh pasal khat mu nuam na hi uh ziam? Mihing tuabang a, a kizeamte kumpite teenna innpite huang sungah teang bek hi!

⁹Hong son tavun; bang mu tu in pai nu ziam? Kamsaang khat ahi ziam? Hi tatak hi, na mu uh sia kamsaang thawthong bek hi ngawl hi.

¹⁰Banghang ziam cile John sia laithiangtho ii: ‘Pathian in, ka kamtaipa na mai ah na lampi hong honsak khol tu in ka paisak tu hi,’ a ci sia pa hi.

¹¹A tatak ka ci ciangin tuiphumpa John sia a piang ngei mihing khat pawpo sangin lianzaw hi. Ahihang Vantung ngam sungah a om a nobel khat sia John sangin lianzaw hi.

¹²John ii thuhil a kipat pan tuni dong tatak ma Vantung ngam in nasia takin zawthawk thu taw sutolna thuak hi, a ngoltol mihingte in laak tu in hanciam uh hi.

¹³John khang dong ma in, kamsaang theampo le Moses thukhamte in, Kumpingam thu huvau son uh hi;

¹⁴tuaciang amate thuhilte na um nuam uh le John sia Elijah hi a, hong pai tu a kisonkhol sa sia ahi hi.

¹⁵Tua ahiciang bil na nei uh le ngai vun.

¹⁶“Tu in, tu hun a mihingte bang taw teengat tu khi ziam? Amate sum zuakna phual a to, patangte taw kibang hi. Pawl khat in pawldang khat te oksan a;

¹⁷‘Mo kiteenna music kong tum uh a, laam nuam ngawl nu hi! Mithi vuina la kong sak uh a, kap nuam ngawl nu hi!’ kici uh hi.

¹⁸John in an tang a sapittui ne ngawlin hong pai ciang, ‘Ama ii sungah doai om hi,’ mihing theampo in ci uh hi.

¹⁹Mihing Tapa hong pai a, ama in ne in dawnin a om leleau ciang, ‘Hisia pa en vun! Antuangpa, zutuangpa, shiadongte le pawlsung pan a kipuavawkte ii lawmpa!,’ mihing theampo in ci uh hi. Ahitazong Pathian ii ciimna sia maan tatak hi ci in a piang thute panin kilak hi.”

²⁰Jesus ii nalamdang lakna a tamzaw a vawtna khuapite sungah a teang mihingte in, a mawna uh panin, kisiik kik tuan ngawl ahikom, ama in tua khuapite teih hi.

²¹“Nang atu in bangza in lauhuai ziam, Chorazin awng! Nang atu in bangza in lauhuai ziam, Bethsaida awng! Tyre le Sidon khuate tungah note sungah hong kivawt nalamdang laknate kivawt thong le, a mihingte in khau-ip puan silh in, amate tungah vut kithe in, mawna kisiik kikna a lak zawk ngei zo tu hi.

²²A tatakin ka ciciang, Pathian thukhenna Ni hong thet ciang, note tung sangin Tyre le Sidon khua mite tungah Pathian in hesuakna tam lak zaw tu hi.

²³Tuaciangin, Capernaum, nang na hile, nangma le nangma vantung dongin kilapto sawm na hi ziam? Hell khuk sungah na kisepsuk tu hi. Nang sungah a kiseam nalamdang laknate Sodom khua ah kiseam thong le tua khua sia tuni dongin kip lai tu hi.

²⁴A tatakin kong ci ciang, Pathian thukhen ni hong thet ciangin, note sangin Sodom khua tungah Pathian in hesuakna tamzaw lak tu hi.”

²⁵Tua hun laitakin Jesus in, “Simlei le vantung ii Topa, Pa awng hi thute mihing ciim mihing thiamte tung panin, na sealcip a, bangma he ngawl lai mihingte tungah lak na hikom na tungah ka lungdam hi.

²⁶Hi hi, Pa, hi bangin a pian tu sia na deina ahi hi,” ci hi.

²⁷“Ka Pa in na theampo kei hong pia zo hi. Pa simngawl kuama in Tapa a tel zo bua a, Tapa le Tapa ii a telsak nop a teal mihingte simngawl kuama in Pa a tel bua hi.

²⁸“Vanhngit pua in, a toite theampo awng, kei kungah hong pai tavun, tawlngakna kong pia tu hi.

²⁹Ka hakkol la in kisuanh vun, kei tung pan hong kisin tavun, banghang ziam cile keima in cingh in a kiniamkhiak pa ka hi hi; tua ahikom toithaina na nga tu uh hi.

³⁰Banghang ziam cile, hakkol kong sot tu sia puak nop a, vanh kong sot tu sia zaang hi,” ci hi.