Read Siyin Chin Matthew 12 Bible Online

Matthew 12 - Siyin Chin bible

Matthew 12

¹Tua zawk khuangeingawlin Jesus in Sabbath ni khat zungtaang lo sungah vak hi. A nungzuite a ngilkial ahikom zungtaang huite hiat in a humte ne uh hi.

²Pharisee te in hi bang a ngamtat uh a mu ciangin Jesus munah, “En in, Sabbath ni in na nungzuite hi bangin a ngamtat sia ih thukham taw kileebul hi,” ci hi.

³Jesus in, “David le a mite a ngilkial uh laitak a ngamtatna thu a ki atte sim ngeingawl nu ziam?

⁴Ama in Pathian inn sungah a mite taw tum in, amate neak tu a kilawm ngawl thiampite bek neak tu kilawm anluum thiangtho a neakna thu sim ngeingawl nu ziam?

⁵Tua ahibuale thiampite in Sabbath sim ma in Biakinn sungah Sabbath thukham khial napi in, mawsakna a nga tuan ngawlna thu Moses thukham sungah sim ngeingawl nu ziam?

⁶A tatakin kong ci ciang, hi sungah Biakinnpi sangin a lianzaw khat om nginge hi.

⁷Laithiangtho in, ‘Thuthiamna ka dei a, sangaw biaknate ka dei bua hi,’ a ci sia he tatak hi le uhte, a maw ngawl khat sia mawsak lalai ngawl tu nu hi.

⁸Banghang ziam cile Mihing Tapa sia Sabbath ii Topa ahi hi,” ci hi.

⁹Jesus in tua mun nusia in Synagogue inn khat ah pai hi.

¹⁰Tua munah pasal khat sia khut langkhat zaw in om hi. Mihing pawlkhat in, Jesus ii ngamtat khialna encik in, a maw natu zong nuam ahikom hi bangin dongh uh hi, “Sabbath ni in ciina damsak tu sia ih thukham taw kileebul ziam?” ci uh hi.

¹¹Jesus in, “Note sungah mihing khat in tuu khat nei le a, tua tuu sia Sabbath ni in dum sungah taaksuk le ama in dum sungah zamh suk in pusua ngawl tu ziam?

¹²Mihing sia tuu khat sangin manh neizaw pek hi! Tua ahiciang ih thukham in, Sabbath ni in mihing khat pawpo ih hu tu sia hong oai hi,” ci hi.

¹³Tua zawkciang a khutzawpa ii munah, “Na khut vaan in,” ci hi. Ama in a khut vaan a, a khut langkhat sang bangma in, a khut dam thiang hi.

¹⁴Tuasia ciangin Pharisee te pusuak in Jesus a thalup thei natu vaihawm uh hi.

¹⁵Jesus in ama a kithasawmna thu a zaak ciangin, tua mun panin ama mundang zuan a, mihon tam mama in zui uh hi. Ama in ciina theampo damsak hi.

¹⁶Tuaciangin, kei thu kuama munah son heak vun, ci in thupia hi.

¹⁷Hi bangin a vawtna sia kamsaangpa Isaiah ii a sonkhol sa teng a taangtut natu ahi hi.

¹⁸“Hi sungah ka tealsa ka naseampa om hi. Ka lung hong kimsak ka itpa ahi hi. ama tungah ka Thaa ka pia suk tu a, tuaciang ama in, ka thukhenna minam tuatuamte tungah thangsak tu hi.

¹⁹Ama in thu nial ngawl tu a, a au buatu hi. Lampi lian tungah au vazakin thu a son buatu hi.

²⁰Ama in a kikuaikhum sa pumpa a thiaktan buatu a, a mit dek tak meiinn zongh a mit buatu hi. Ama in thutang khenna ii zawna a ngasak dong hanciam tu hi.

²¹Tuaciang ama ii tungah minam theampo in lametna nei tu hi”.

²²Tua zawkciang mihing pawlkhat in Jesus kungah doai a vei hu in mittaw a, a pau thei ngawl pasal khat hong paipui uh hi. Khuamu thei a, a pau thei natu in, Jesus in damsak hi.

²³Jesus sep teng a mu uh ciang mipite in lamdang sa uh hi. Amate in, “David tapa hi takpi tu ziam?” ci in dongh uh hi.

²⁴Pharisee te in hi thu a zaak uh ciang “Doaite a ukpa Beelzebul in ama ii vaangletna pia a tua hu in doaite notkeak thei hi thong zam,” ci uh hi.

²⁵Jesus in amate khua ngaisutnate tel ahikom amate tungah, “Ngam khat pawpo pawl tuatuamin kikhen hen a, kidawdo le tua ngam a kip ngei buatu hi. Khuapi khat ahizong innkuan khat ahizong, pawl tuatuamin kikhenin, kihau siasua le a kitamhtham tu hi.

²⁶Tua ahikom Satan ngamsung zongh ah pawl tuam khat in, a dang pawltuam dangkhatte do in a om uh le Satan ngam a kikhen tham hi zo a, hai ngawlin zaantham tu hi.

²⁷Beelzebul hong piak vaangletna taw doaite notkeak hi hong ci nu hi. Pha hi, tua ahile na nungzuite akua in doai nawkeak theina vaang pia ziam? Na nungzuite ngamtatna panin, na khial hunlam kitel hi!

²⁸Hi ngawl hi. Doai nawkeak natu vaangletna hong pia sia Beelzebul hi ngawl a Pathian Thaa ahi hi. Tua ahikom hi thu mama in, Pathian Ngam sia note tungah hong theng zo hi,” ci in kitelsak hi.

²⁹“Kuama in mihing thahatpa inn sungah tumin, a neisa ol takin a laaksak thei bua hi, tua mihing a thahatpa sia a letheen cip phot kul hi. A letheen zawkciang bekma in, a inn kiphuul thei pheang tu hi.

³⁰“Khat pawpo kei sang a hong pang ngawl sia in kei hong langpan pa ahi hi; khat pawpo hong kaikhawm pui ngawl sia in, a thezau tatak pa ahi hi.

³¹Hi thu hangin kong ci in ah, mihingte mawna le kamsia paunate kimaisak thei hi; ahizong Thaa Thiangtho sonsiate kimaisak zo ngawl tu hi.

³²Mihing Tapa a sonsiate kimaisak thei hi; ahihang Thaa Thiangtho a sonsiate tu hun ahizong, maisang a tawntung ahizong kimaisak ngawl tu hi.

³³“Thingnga pha a pian natu in, thingkung ciidam kul hi; thingkung ciidam ngawlte panin thingnga mannung ngawlte piang hi. Thingkungte a nga panin kihe hi.

³⁴No ngul ngilo suante awng — mihing ngilote na hi uh ciang, bangbangin thupha son thei tu nu ziam? Banghang ziam cile thinsung pan a, a dimleet teng sia kam panin kipau ahi hi.

³⁵Mihing phate in a thinsung a ngaisutna pha a kholsa te sung panin pau uh a; mihing ngilote in a thinsung thusia a kholte panin kamsia pau hi.

³⁶“A tatakin kong ci ciang, Thukhenna Ni ciangin, mihing sim in, phattuamna hong pia ngawl kammal khat a paute tungtawnin, thusitna thuak tu hi.

³⁷Noma kammalte mama in, na maw uh le na tan uh thu hong khen tu hi.”

³⁸Tua zawkciangin Thukham hil syate le Pharisee te pawlkhat in, “Syapa awng, nalamdang lakna na vawt ka mu nuam uh hi,” ci hi.

³⁹Jesus in, “Tu hun mihingte sia, bangzata in sia a, Pathian nei ngawl ziam! Nalamdang lakna hong ngen na hi uh ziam? Hong pia ngawl tu khi hi! No tung a hong kipia tu nalamdang lakna in kamsaangpa Jonah, nalamdang lakna sia bek hi tu hi.

⁴⁰Jonah in sun thum le zan thum ngasa lian ii ngil sungah a om bangin, Mihing Tapa zongh sun thum le zan thum leithukna sungah om tu hi.

⁴¹Thukhenna Ni ciangin Nineveh khua mite hong ding tu a, note hong mawsak tu hi, banghang ziam cile amate in Jonah thuhilna a zaak uh ciangin a mawna uh pan kisiik kik hi; a maan tak kong ci ciang in hi sungah Jonah sangin a lianzaw khat om hi.

⁴²Thukhenna Ni ciangin, Sheba kumpinu zongh hong ding tu a, note hong mawsak tu hi, banghang ziam cile, ama in a khuala mama ngam pek pan in, Solomon kumpipa ciimna taw thuhilna ngai tu in khual hong haw hi; a maan tak kong ci ciangin, hi lai ah Solomon kumpipa sangin a lianzaw khat om hi.

⁴³“Mihing khat sung pan doai ngilo khat sia a pusua ciang a tawlngak natu zongin, munko ngawtaakna ngam ah vak kawkoai hi.

⁴⁴A mu ngawl ciang, ‘Ka inn zuan kik ka heu tong,’ ama le ama kici a, a inn ah a cia kik le a inn awng a, kipua thiang sa in a om mu hi.

⁴⁵Tuasia ciangin ama pusuak in, ama sangin a siazaw lai doai a dang sali hong tumpui a, tua munah teang uh hi. A tawpna ah tua doai ii teenna mihing sia a kipat lai sangin lawmawk zaw hi. Tu lai mihing siate tungah hi bangma piang tu hi,” ci hi.

⁴⁶Jesus in mihonpite thu a hil laitakin, A nu le a suapuipate hong theng hi. Amate in paupui nuam in doipua ah ding uh hi.

⁴⁷Tua munah a om mihing khat in ama munah “En in! Na nu le na suapuipate in hong paupui nuamin doipua panin hong ngak hi,” ci hi.

⁴⁸Jesus in, “Ka nu akua ziam? Ka suapuite akua teng ziam?” ci hi.

⁴⁹Tuaciang, a nungzuite kawkin, “En vun! hite sia ka nu le ka suapuipate ahi uh hi.

⁵⁰Vantung ah ka Pa deina bang a ngamtate sia ka suapuipa, ka suapuinu le ka nu ahi hi,” ci hi.