Read Siyin Chin Matthew 13 Bible Online

Matthew 13 - Siyin Chin bible

Matthew 13

¹Tua ni ma in Jesus inn pan pusuak in, tuili hui ah to a, thuhilna nei hi.

²A kiim ah hong kikhawm mihonpite tam mama ahikom, hilna nei tu in ama ngunkuang tungah to a, mipite vaalbo ah ding uh hi.

³Ama in thu tam mama a son natu in, thusonteenate zangh hi. “Khatvei lai in, pasal khat sia thaicii poai tu in kuan hi.

⁴Lo sungah thaiciite a poai ciangin, thaicii pawlkhat sia lamzin tungah taakin, vacimte pai a, ne siat uh hi.

⁵Thaicii pawlkhat suang tam, lei daina ah taak hi. Tawmvei sungin thaicii po hi, banghang ziam cile lei thuk ngawl hi.

⁶Ahihang ni a sat ciangin ankung note kaanghlum hi; zung thuk tha ngawl ahikom, ankungte ko ngawtaak cip hi.

⁷Thaicii pawlkhat lingphung sungah taak a, tua lingte khangin ankungte deapcip hi.

⁸Ahihang thaicii pawlkhat lei phana ah taakin, ankungte hui a; a kung pawlkhat ii tung pan a zaa zakhat, pawlkhat a zaa sawmluk, pawlkhat a zaa sawmthum in nga hi.”

⁹“Bil nei po in za tavun!” ci in Jesus in a thuson khup hi.

¹⁰Tuaciangin nungzuite Jesus kungah pai a, “Mihingte tungah thu na son ciangin, banghangin thusonteena veu taw thuson ni ziam?” ci in dongh uh hi.

¹¹Jesus in, “Vantung ngam thuku sia note tungah hong kipia hi; ahihang amate tungah kipia ngawl hi.

¹²Banghang ziam cile neisa khat po a nei kholte tungah kipia thua tu hi, tam seseam a nei natu in, kipia thua tu hi; ahihang bangma a nei ngawl khat tung panin a nei sun teng zongh, kilaaksak tu hi.

¹³Amate tungah thusonteena taw thu ka son sia, banghang ziam cile, amate in en ahihang mu ngawl a, ngai ahihang za ngawlin tel ngawl uh hi.

¹⁴Tua ahikom, Isaiah sonkholna sia amate tungah kibul thei hi; ‘Hi mihingte in ngangai ahihang tel ngawl tu hi. Amate in e en ahihang mu ngawl tu hi.

¹⁵Banghang ziam cile amate thin bulthu zo a, a bil uh kihu cip zo in, a mit uh si cip zo uh hi. Tua ahibuale a mittang uh taw mu tu a, a bil uh taw za tu a, a thinsung taw tel tu uh hi. Tuaciang kei kungah hong zuan tu uh hi. Tuasia ciangin amate ka damsak tu hi, Pathian in ci hi.’

¹⁶“Note na hi uh le bangza in hampha nu ziam! Na mittangte khuamu uh a, na bilte in khuaza uh hi.

¹⁷A tatak ka ci ciang, kamsaang tam mama le Pathian mi thiangtho tam mamate in, no ii mu teng mu nuam mama a, no ii zaak teng za nuam ahihang amate in mu ngawlin za ngawl uh hi.

¹⁸“Tua ahile ngai vun, thaicii poaipa thusonteena sia hi bang ahi hi.

¹⁹Kumpingam thu huvau thu kisonte za napi a tel ngawlte sia lampi tungah a taak thaiciite taw kibang hi. Ngilopa hong pai a amate ii sungah a kituu thute laaksak hi.

²⁰Suang tungah a taak thaiciite sia a thu a zaak uh po ciang, lungdam takin a saangte ahi uh hi.

²¹Ahihang a thu in amate sungah a thuk in tum ngawl a, khuangei khom ngawl uh hi. Tua ahikom haksatna le vawtsiatna hong pai ciangin amate puk uh hi.

²²Lingphung sung a thaicii taakte sia a thu a zate ma hi a, ahihang nuntak natu thinngim in, hau tu a uukte hi a, tuate in khulup ahikom a nga a hui a nei bua uh hi.

²³Tuaciangin lei phana ah a taak thaiciite ahile a thu za in a telte ahi uh hi: amate in a zaa zakhat, pawlkhat in a zaa sawmluk, pawlkhat in a za sawmthum in a nga uh hi.”

²⁴Jesus in thusonteena dang khat son a: “Vantung ngam thu sia hi bang ahi hi. Pasal khat in a lo sungah thaicii pha poai hi.

²⁵Zan khat ciang, ngual theampo ii mut laanin, a ngalte khat hong pai a, taangkungte ii kawmah mimphei cii tuu in nusia hi.

²⁶A kungte po in a huite lua tu in a kipat ciangin, mimpheite kilangh hi.

²⁷Lo neipa ii naseamte hong pai a, ‘Topa awng, lo sungah na poai thaiciite thaicii pha veu hi kana ngawl ziam?, koisung pan mimpheite hong piang ziam?’ ci uh hi.

²⁸Ama in, ‘Ngalte pawlkhat ii ngamtatna hi,’ ci in zo hi. ‘Mimpheite, kuan in botkeak le ung nong oai ziam?’ ci in dongh uh hi.

²⁹‘Oai ngawl khi hi; mimphei na baw uh ciangin taang zongh na botkeak tha tu uh hi.

³⁰Anlaak hun dongin mimphei le taangte na po khawmsak lel vun. Tuasia ciangin anlate munah, mimphei teng bot phot vun a, lomsawm in hal vun, tuasia zawkciang taang teng la in ka saal sungah khum vun,’ ” ka ci tu hi, ci hi.

³¹Jesus in thusonteena dang khat ma son hi: “Vantung ngam thu sia hi bang hi. Pasal khat in ankamh cii la in lo sungah poai hi.

³²Ama sia thaicii a minpiang a nobel ahi hi, ahihang hong let ciang, ankung lianbel suak hi. Ama sia thingkung suak ahikom vacimte in a baakte kawm ah bu hong vawt uh hi.”

³³Jesus in thusonteena dang khat ma son lai hi: “Vantung ngam thu hi bang hi. Numei khat in tol tawm la in anvui khum khat dim taw hel a, a vekpi in hong pawm hi.”

³⁴Jesus in mipite tungah hi thute a son ciangin thusonteena zangh hi; thusonteena ngawl peuma taw thu khat zongh son ngawl hi.

³⁵Hi bangin ahi sia kamsaangpa pauna a taangtut natu ahi hi, “Amate tungah ka pau ciangin thusonteena ka zangh tu hi; Simlei a kibitphua pan kipan a kihe ngeingawl thute amate tungah ka son tu hi.”

³⁶Jesus in mipite nusia in innsung sangah a tum ciangin, a nungzuite ama kungah hong pai a, “Lo sungah mimphei thu thusonteena sia ii khiakna hong son ta'n,” ci uh hi.

³⁷“Thaicii pha a tuu pasalpa sia Mihing Tapa ahi hi; lo sia hi leitung ahi hi.

³⁸Thaicii pha sia Kumpingammite ahi hi; mimphei sia a ngilopa ii neisa mihingte ahi uh hi.

³⁹Tuaciangin mimphei leisung a tuu ngalpa sia Doaimangpa ahi hi. Anlaak hun sia hun bona ahi hi, anlate sia vantunglalangte ahi hi.

⁴⁰Mimpheite kitawm in meikuang sungah a kihal bangma in, hun bo ciang, tuabang ma a hi tu hi:

⁴¹Mihing Tapa in, midangte a khialsakte le a sia vawt theampo khawm tu in, a vantunglalangte sawl tu a,

⁴²tuaciangin amate in tua mite meiphual sungah sep tu hi, tua munah amate kapin ha ngoai tu uh hi.

⁴³Tuaciangin Pathian ii mihingte ahile Pa ii Ngam sungah ni bangin taang tu uh hi. Bil nei po in za tavun!

⁴⁴“Vantung ngam thu hi bang ahi hi. Pasal khat in lo khat sungah sum kiphual khat mu hi. Ama in lei huk kikin, lungdam mama ahikom a neisa theampo zuak a, tua zawkciang pai kikin, tua lo lei hi.

⁴⁵“Vantung ngam thu in hi bang hi si hi. Pasal khat in suangmanpha zong a,

⁴⁶a hoi tangtuam mama khat a mu ciangin, a neisa theampo zuak in, tua suangmanpha lei hi.

⁴⁷“Vantung ngam thu in hi bang hi si hi. Ngasa man pawlkhat in a ngeen uh tuili sungah paai in ngasa namcin man uh hi.

⁴⁸A ngeen uh a dim ciangin, vaalbo ah ngasate hawm tu in kaito a, ngasa phate pheal sungah kikoi in, ngasa manpha ngawlte kivawk hi.

⁴⁹Hun bo ciangin hi bangin kingamta tu hi: vantunglalangte pai in mihing phate kawm panin mihing ngilote khawmtua in,

⁵⁰meiphual sungah amate vawk tu a, tua munah ha ngoai in kap tu uh hi.

⁵¹Jesus in, “Hi thute na tel uh ziam?” ci in dongh hi. “Tel khu hi,” ci uh hi.

⁵²“Tua ahikom, Thukham hil syate khat pawpo sia Vantung ngam sungah nungzui a sua ciangin bang taw kibang ziam cile vanh kholna inndoi sung pan, vanh thak le vanh lui te a pusua inn neipa taw kibang hi,” ci hi.

⁵³Jesus in hi thusonteena thute a son zawkciang tua mun nusia a,

⁵⁴ama ii khua ah cia hi. Ama in Synagogue ah hilna nei a, a zate in lamdang sa uh hi. “Koisung panin ciimna hi bangte nga ziam? A nalamdang vawtte bangbangziam?

⁵⁵Ama sia lettama pa tapa ma hi kana ngawl ziam? A nu sia Mary ma hi a, a suapuite sia James, Joseph, Simon le Judas te hi kana ngawl ziam?

⁵⁶A suapuinumeite zongh hi lai ma ah teang hon kana ngawl ziam? Koisung panin hite theampo ka nga ci ziam?” ci uh hi.

⁵⁷Tua hi a amate in a saang thei bua uh hi. Jesus in amate munah, “Kamsaangpa khat sia ama khua le ama innkuan sung ngawl buang mundang theampo ah kizatak vawt hi,” ci hi.

⁵⁸Amate in upna nei ngawl ahikom, tua munah nalamdang lakna tam a vawt bua hi.