Read Siyin Chin Matthew 14 Bible Online

Matthew 14 - Siyin Chin bible

Matthew 14

¹Tua hun laitakin Galilee ngamukpa Herod in Jesus thu za hi.

²A uliante munah, “Ama sia Tuiphumpa John hong nungta kik hi nanak tu hi, ci hi. Tua hu in, nalamdang lakna vawt theina vaang nei hi tu hi,” ci hi.

³Banghang ziam cile Herod in John a kimat natu thupia zo a, thong sungah khum hi. Hi bangin a vawt na sia Herod in a suapuipa Philip zi Herodias a teenpui hang ahi hi.

⁴Tuiphumpa John in Herod munah, “Herodias sia na teenpui tu hi ngawl hi,” ci ngei zo hi.

⁵Herod in ama thatlum nuam ahihang, Jew mite kiita hi, banghang ziam cile Jew mite in John sia kamsaang khat hi ci in ngaisun uh hi.

⁶Herod suani in a kikhawmte mai ah Herodias tanu laam hi. Herod lungkim mama a;

⁷“Nong nget pawpo kong pia tu hi, ci in ka kiciam hi!” ci in kamciam pia hi.

⁸A nu sawl bangin, “Hi sungah tu ma in, kuangdal khat sungah John ii lutang hong pia ta'n!” ci hi.

⁹Kumpipa sia khuangai hi, ahihang leangnate mai ah, kamciam a piaksa ahikom a nget bangin, a kivawt natu thupia hi.

¹⁰Tua ahikom thong inn sungah John ii ngawng tansak hi.

¹¹A lutang sia kuangdal tungah koi in, ngaknu nu kipia a, ama in a nu pia sawn hi.

¹²John nungzuite hong pai a, a luang pua in phum uh hi; tua zawkciang amate pai in Jesus munah son hi.

¹³Jesus in John thute a zaak ciangin, ngunkuang khat sungah to in, a ngamkhingna mun khat ah ama nguakin pai hi. Mipite in tua thu za ahikom a khuapi uh nusia in leilam panin ama zui uh hi.

¹⁴Jesus in a ngunkuang tung pan tuak a, mihonpite a mu ciangin, tua mite hesuakhuai sa in ciinate damsak hi.

¹⁵Tua nitakin a nungzuite in ama kungah hong pai uh a, “Tu in ni zongh niam mama zo hi. Hi mun sia ngamkhing mun ahi hi. Mihonpite paisak in a, khuano sungah amate le amate neak tu an leisak lete pha hi,” ci uh hi.

¹⁶“Amate paisak kul bo, amate neak tu an note in pia vun,” ci hi.

¹⁷“Hi sungah ih nei theampo kingawm in anluum nga le ngasa nii hi,” ci in zo uh hi.

¹⁸“Tua ahile tuate keima kungah hong paipui tavun,” Jesus in ci hi.

¹⁹Ama in mipite sia lopa tung a to siat natu in thupia hi; tua zawkciangin anluum nga le ngasa nii te la in, van ento a, Pathian munah lungdamko hi. Ama in anluumte baltham in nungzuite pia a, nungzuite in mipite pia sawn uh hi.

²⁰mi sim in ne in kham tek uh hi. Tua zawkciangin nungzuite in, a kham vaal uh khum sawm le khum nii dim in seng uh hi.

²¹Numei le patang simngawl, pasal an ne sia tulnga bang pha uh hi.

²²Mipite a inn tek ah cia in a sawl zawkciang, tuili ngal ah paikhol tu in, Jesus in a nungzuite ngunkuang sungah tosak hi.

²³Mipite a ciasak siat zawkciang, ama nguakin mual tungah thungen tu in kaato hi. Nitak khuaniam hun dongin Jesus in tua munah ama nguakin om hi;

²⁴tua hun laitakin ngunkuang sia tuili sungah khuala ma theng zo a, vui va ahikom ngunkuang sia tuihual in lok zazaan hi.

²⁵Zingsang nai thum le nai luk kilaklaw in, Jesus in tui tung nungzuite sangah hong pai hi.

²⁶Tui tungah a pai a mu ciangin, amate patau mama uh hi. “Thithaa hi tu hi!” ci in lau in ciik au uh hi.

²⁷Jesus in amate tungah thakhatin, “Na thin uh kiliansak vun! Lau heak vun! Keima khi hi,” ci in paupui hi.

²⁸Tuasia ciangin Peter in, “Topa na hi takpi le nangma kung tui tungah kong pai thei natu in thu hong pia ta'n,” ci hi.

²⁹“Hong pai ta'n!” Jesus in ci hi. Tua ahikom Peter sia ngunkuang sung pan pusuak a, tui tung Jesus kungah lampai tu in kipan hi.

³⁰Ahihang vui va ngawp sia a mu ciangin lau in tui sungah taaksuk tu in kithoai hi. “Topa hong hun ta'n!” ci in au hi.

³¹Thakhatin Jesus in ama zamh in, “Upna no pa awng, banghangin muang la ni ziam?” ci hi.

³²Amate nii sia ngunkuang sungah hong thengin vui zongh thim hi.

³³Tuasia ciangin ngunkuang sung a om nungzuite in Jesus bia uh hi. “Pathian Tapa takpi ma na hi hi!” ci in au uh hi.

³⁴Amate sia tuili kaantan in Gennesaret vaalbo ah kaa uh hi,

³⁵Tua munah mihonte in Jesus ahi hunlam he uh hi. Tua ahikom kiimkot ngamte ah ciinate vaitha in, Jesus kungah paipui uh hi.

³⁶A puanmong beak ahizong ciinate a thamsak natu in, ama tungah ngen uh hi. Tuaciang a puanmong a tham theampo damsak hi.