Read Siyin Chin Matthew 19 Bible Online

Matthew 19 - Siyin Chin bible

Matthew 19

¹Jesus in hi teng a ci zawkciang, Galilee ngam nusia in Jordan ngun ngalkhat Judea ngam ah pai hi.

²Mihonpi in zui a, tua munah amate damsak hi.

³Pharisee te pawlkhat in, ama aitaa nuam ahikom hi bangin dongh uh hi. “Pasal khat in a zi sia bang thu po taw ahizong a khul nuam le khul thei hi ci thu, ih thukham in a oai ziam?” ci uh hi.

⁴“A kipatciil in Bitphuapa in mihing sia pa khat le numei khat vawt hi, ci in a ki at laithiangtho sia sim ngeingawl nu ziam?

⁵Tuaciangin hi thu hangin, ‘Pasal in a pa le a nu nusia tu a, a zi taw kingawm in, amate ngeal sia khat suak tu hi,’ Pathian in ci hi.

⁶“Tua ahikom amate sia nii hi nawn ngawlin khat suak hi. Tua ahikom Pathian ii ngawmsa sia mihing in khen thei ngawl tu hi,” ci hi.

⁷Pharisee te in, “Tua ahile banghang Moses in, Pasal in a zi a khul le kikhulna lai pia tahen, ci in thukham vawt ziam?” ci in dongh uh hi.

⁸Jesus in, “Moses in zi khul thei natu thu hong pia hi, banghang ziam cile noma sia hil hak mama nu hi. Ahihang bitphua ciil hunin tuabang thu om ngawl hi.

⁹A tatakin kong ci ciang, pasal khat in a zi sia, vaang kitan ngawlna simngawl, thudang taw a khul a, numei dang a teenpui le ama in palngul mawna vawt ahi hi,” ci hi.

¹⁰A nungzuite in ama tungah, “Pasal le zi kilaklaw ah ngamtat natu sia tu a bang ahi thong le kiteang bualeang phazaw hi,” ci uh hi.

¹¹Jesus in, “Hi kihilna sia mihing theampo atu kici ngawl a, Pathian ii piakte atu bek hi:

¹²Banghang ziam cile pate ii zi a nei thei ngawl natu thu tam mama om hi; pawlkhat sia a nei thei ngawl tu in piang hi; pawlkhat sia ngual in tuabang tu ma in vawt hi; tuaciang pawlkhat in Vantung ngam thu hangin nei ngawl hi. Hi kihilna a saang theite in, tuabangin ngamta tahen,” ci hi.

¹³Mihing pawlkhat in patangte tungah khut nga a, thungetsak tu in Jesus kungah paipui uh hi; ahihang nungzuite in tua mihingte teih hi.

¹⁴Jesus in, “Patangte ka kungah hong pai tahen, khaam heak vun, banghang ziam cile Vantung ngam sia tuabangte atu ahi hi,” ci hi.

¹⁵Amate tungah a khut nga a tua zawkciangin paisan hi.

¹⁶Khatvei lai in Jesus kungah pasal khat hong pai hi. “Sya awng, tawntung nuntakna nga natu in, bang nasep pha ka seam tu ziam?” ci in Jesus dongh hi.

¹⁷“A banghangin naphate huvau kei tungah hong dongh ni ziam? A pha khat bekma om hi. Nuntakna sungah na tum nuam le thupiakte tang in,” Jesus in ci hi.

¹⁸Ama in “A bang thupiakte ziam?” ci in dongh hi. Jesus in “Mihing that heak in, palngul mawna vawt heak in, ngu heak in, leilot thu taw ngual suanhkhial heak in;

¹⁹na pa le na nu zakta in, nangma le nangma na ki it bangin na innpaamte zongh it in,” ci in zo kik hi.

²⁰“Hi thupiakte theampo ka zui siat sa hi,” khangnopa in ci hi. “A dang bang ka sep tu kul lai ziam?” ci hi.

²¹Jesus in ama munah, “Na cialcing nuam le, va pai ta'n a, na neisa theampo zuak in, sum na nga teng a zawngte pia ta'n, tua hile vantung ah na hau tu hi; tua zawkciang ka nung hong zui ta'n,” ci hi.

²²Khangnopa in hi thu teng a zaak ciangin khuangai in paisan hi, banghang ziam cile ama hau mama hi.

²³Jesus in a nungzuite munah “A tatakin ka ci ciang sumhaute Vantung ngamsung a thet tu sia haksa mama tu hi.

²⁴Kong ci kik hi: kalaoh khat phin bilvang sungah a tum tu sangin sumhaute Pathian Ngam sungah a tum tu sia haksa zaw lai hi,” ci hi.

²⁵Nungzuite in hi thu a zaak uh ciangin, amate lungmang mama uh hi. “Tuabang hi thong le akua peuma ngupna nga thei tu ziam?” ci uh hi.

²⁶Jesus in amate tangtan in en a, “Mihing atu in suak thei ngawl ahihang Pathian atu na khat pawpo suak thei hi,” ci hi.

²⁷Tuaciang Peter in, “En in, na theampo nusia in nang hong zui khu hi, bang ka nga tu uh ziam?” ci hi.

²⁸Jesus in, “A maan takin kong ci hi. Mihing Tapa sia hong pai tu Khang Thak hun sungah minthanna kumpi tokhum tungah hong to ciangin, no kei hong zui sawm le niite zongh kumpi tokhum tungah to in Israel minam sawm le niite na uk tu uh hi.

²⁹Tuaciang a kuama po kei hu in, a inn, a suapuipate, a suapuinute, a pa, a nu, a tate, a leitang khat pawpo a nusiate in, a see zakhat sangin tamzaw in saang tu a, tawntung nuntakna kipia tu hi.

³⁰Ahihang tu laitak a masate hong nungkhak tu a, tu laitak a nungkhakte hong masa tu hi,” ci hi.