Read Siyin Chin Matthew 2 Bible Online

Matthew 2 - Siyin Chin bible

Matthew 2

¹Jesus sia Herod Kumpipa maan lai in, Judea ngam Bethlehem khua ah suak hi. Tua zawk hai ngawlin aksi huvau a kante in nisuana sang pan Jerusalem ah hong pai uh a,

²“Jew te Kumpipa tu in a piang nausen sia koisung a suak ziam,” ci in dongh hi. “Nisuana sang panin ama ii aksi hong suak ka mu uh a, ama bia tu in kong pai uh hi,” ci uh hi.

³Herod Kumpipa in hi thu a zaak ciang, Jerusalem a om midangte bangma in liinglawng hi.

⁴Ama in thiampi liante theampo le Thukham hil sya theampo kaikhawm in, “Messiah koisungah suak tu ziam?” ci in dongh hi.

⁵“Judea ngam Bethlehem khua ah suak tu hi, banghang ziam cile kamsaang khat in hi bangin at zo hi:

⁶‘Judah ngam Bethlehem khua awng Judah ngam khuapi thupite sungah, nang sia a nobel na hi bua hi, banghang ziam cile nang sung panin, ka Israel mite lam a lak tu lampuipa khat, hong piang tu hi.’ ”

⁷Tua ahikom Herod in nisuana sang pan hong pai leangnate sam ku a, aksi a kilangh bang hun tatak ziam, ci in dongh hi.

⁸Tuaciang, hi bang sawlna taw Bethlehem ah paisak hi. “Pai tavun a, patangno sia pha tak hong zong tavun. Na mu zawk uh ciang hong zasak kik tavun, kei zongh pai in ka bia tu hi,” ci hi.

⁹Tuaciang amate ding kik a, nisuana sang pan a mu sa uh aksi sia ma a pai kawmin mu uh hi. Amate in tua aksi a mu ciangin, a thinnopna le a lungdamna kison zo ngawl hi! Aksi sia amate mai ah pai a patangno omna tung san a thet ciang tawlnga hi.

¹¹Amate inn sungah tum a patangno le a nu Mary a mu uh ciang khupdin in bia uh hi. Amate in a ken uh a letsongte khamh, frankincense paaknamtui le myrrh thil namtuite sua in pia uh hi.

¹²Pathian in amate Herod kungah, a heak kik ngawl natu in, a mang sungah hilkhol ahikom lampi dang khat tawn in, a ngam ah cia kik uh hi.

¹³Amate a pai zawkciang, Topa vantunglalang khat Joseph mang sungah kilangh a, “Herod in patangno sia that tu in zong tu hi. Tua ahikom patangno le a nu Egypt ngam ah taipui ta'n, cia kik a kong sawl dong, tua munah om tavun,” ci hi.

¹⁴Joseph tho a patangno le a nu Egypt ngam ah zan lai in, taipui hi.

¹⁵Tua munah Herod thi dong taam uh hi. “Egypt ngam pan ka Tapa ka sam hi,” ci thu kamsaangpa ii sonkholnate a taangtunna ahi hi.

¹⁶Nisuana sang pan hong pai mihing pilte in theam ahi hunlam Herod in a phaw ciangin a thin uuk mama hi. Bethlehem khua sung le a kiim a paam a om, kum nii le a nuaisia patangno theampo thalup tu in thupia hi. Mipilte ii aksi a mu hun taw tuatin tuabangin ngamta hi.

¹⁷Kamsaangpa Jeremiah ii a sonkholna teng hi bangin taangtung a:

¹⁸“Ramah ngam ah nasia tak kaana awnging khat kiza hi. Rachel sia a tate a thi siat hu in kiheneam zo ngawlin kap hi.”

¹⁹Herod thi zawkciang Egypt ngam a om Joseph mang sungah Topa vantunglalang khat kilangh a,

²⁰“Tho in nauno le a nu, Israel ngam ah ciapui kik ta'n. Banghang ziam cile patang a that nuam sia thi zo hi,” ci hi.

²¹Tua ahikom Joseph tho a, nauno le a nu taw Israel ngam ah cia kik uh hi.

²²Ahihang Judea ngam ah Herod za a laih sia Archelaus hi, ci in Joseph in a zaak ciang tua ngam a pai tu lau hi. A mang sungah a ngamtat natu kihil thua ahikom Galilee ngam ah pai in Nazareth khua ah teang hi.

²³Kamsaangte sonkhol bangin, “Ama sia Nazareth mi kici tu hi,” a cina thu taangtung hi.