Read Siyin Chin Matthew 22 Bible Online

Matthew 22 - Siyin Chin bible

Matthew 22

¹Jesus in mihingte munah thusonteenate zangh kikin thu son hi.

²“Vantung ngam thu sia hi bang ahi hi. Khatvei lai in kumpipa khat in a tapa atu mopoai anneakna khat vawt tu in kipan hi.

³Ama in a naseamte sawl a mopoai hong siim natu in, khualhilsak hi. Ahihang amate pai nuam ngawl hi.

⁴Tua ahikom naseam dangte paisak a, khual a kihilte munah hi bang sawl hi. ‘Ka poai sia tu in a kipan thei tu hi zo hi; ka khuital le ka khuino thaute kingo zo hi, na theampo kinging sa in om zo hi. Mopoai ah hong pai tavun!’

⁵Ahihang khual a kihilte in awlmawk ngawlin amate nasep tek ma sep san uh hi: khat in a lokuan a, a dang khat in a sumbuk ah pai in,

⁶a dangte in kumpipa naseamte pummat a, velin thatlum uh hi.

⁷Kumpipa thin uuk mama ahikom a ngalkapte paisak a, mihing that te thatlum in a khuapi halthapsak hi.

⁸Ama in a naseamte sam a, ‘Ka mopoai kipat thei lian tu in, om zo ahihang ka khualhil sate mopoai taw kiphu ngawl hi.

⁹Tu in lam ziikpite ah pai tavun a, mihing na mu zaza uh sam tavun,’ ci hi.

¹⁰Tua ahikom naseamte in lam ziikpite ah pai in a mu theampo le mihing pha mihing sia a kibangin khawmtua uh hi; tuaciang in mopoai vawtna inn dim hi.

¹¹“Kumpipa sungtang in a leangnate a et ciang, mopoai puan silh ngawlpa khat mu hi.

¹²‘Lawm awng, mopoai puan silh ngawlin hi sungah bangbangin hong tum thei ni ziam?’ ci in dongh hi. Ahihang tua pa in a zo natu a he bua hi.

¹³Tuasia ciang kumpipa in naseamte munah, ‘Hisia pa a khut a peang sawmcip vun a, doipua khuazingna ah vawk tavun. Tua munah ama kapin ha ngoai tu hi,’ ” ci hi.

¹⁴Jesus in a thukhupna ah, “Tam mama kisam tu a tawm bek kiteal tu hi,” ci hi.

¹⁵Pharisee te pai a, kam doknate taw Jesus aitaa sawm uh hi.

¹⁶Tua zawkciang amate in, a nungzuite pawlkhat le Herod mihingte pawlkhat paisak uh hi. “Sya awng, thumaan na son hi ci in hong he khu hi. Pathian ii mihingte atu a deisak thutakte, mihingte in bang ngaisun ci patau ngawlin na hil hi. Banghang ziam cile mihingte maitang na zakta bua hi.

¹⁷Bangbang ngaisun ni ziam?, Rome Kumpilianpa shia ih piak tu sia, ih Thukham taw kisi ziam, kisi ngawl ziam? hong son tan?” ci uh hi.

¹⁸Ahihang Jesus in amate thinsung ah, thusia a sawmna, he ahikom, “A kihitheamsakte awng! banghangin hong aitaa nu ziam?

¹⁹Shia piak tu sumtang sia hong lak tavun,” ci hi. Amate in sumtang a kungah paipui uh hi,

²⁰Jesus in, “Hite akua lim le akua min ziam?” ci in dongh hi.

²¹“Kumpilianpa aa hi” ci in zo uh hi. Tua ahikom Jesus in, “Pha hi, Kumpilianpa sum sia Kumpilianpa na pia vun a, Pathian sum sia Pathian na pia vun,” ci hi.

²²Hi thu a zaak uh ciangin amate in lamdang sa uh hi; tua ciangin ama nusia in paisan uh hi.

²³Tua ni in Sadducee te pawlkhat Jesus kungah hong pai uh a, “Mihingte in thina pan tho kik ngawl tu hi,” ci uh hi.

²⁴“Syapa awng, Moses ii cina panin, pasal khat sia ta nei ngawlin a thi le a suapuipa in meingongnu sia teenpui tahen, tua hile ta a nei uh ciang, mithipa ta bangin, kingaisun tu hi.

²⁵Tu in hi sungah unau pa sali om ngei hi. A lianbel sia in zi nei in ta nei ngawlin thi a meingongnu sia, a suapuipa in lua hi.

²⁶Tuabang ma in a niina a thumna panin kipan a salina dongin ta nei ngawlin thi uh a, meingongnu lua susuk uh hi.

²⁷A khakbel ciangin meingongnu zongh thi hi.

²⁸Tu in mithite thaw kik ni ciangin tua numei sia akua ii zi hi tu ziam? A vekpi in ama teenpui ngei tek hi,” ci uh hi.

²⁹Jesus in, “Pathian ii vaangletna le Laithiangtho na heak ngawl uh hu in bangza in khial nu ziam!

³⁰Banghang ziam cile mithite a thaw kik ciang, vantung ah a om vantunglalangte bang hi tu a, kiteenna om ngawl tu hi.

³¹Tu in mithite thaw kikna thu, Pathian hong son thute sim ngeingawl nu ziam? Ama in,

³²‘Keima in Abraham ii Pathian, Isaac ii Pathian, Jacob ii Pathian ka hi hi,’ ci hi. Ama in a nungtate Pathian hi a, a thisate Pathian ahi bua hi,” ci hi.

³³Mihonte in hi thu a zaak uh ciangin, a hilnate lamdang sa uh hi.

³⁴Sadducee te a pau natu a heak ngawl dongin, Jesus in a koi zawkciang, Pharisee te hong kikhawmtua uh a,

³⁵amate sung panin, Thukham hil sya khat in, Jesus sia thudokna khat taw aitaa sawm hi.

³⁶“Sya awng, Thukham sung teng pan a lianbel le a thupibel thupiak sia koisia ziam?” ci in dongh hi.

³⁷Jesus in, “ ‘Na Topa Pathian sia na thin theampo, na thaa theampo le na ngaisutna theampo taw it in.’

³⁸Hisia in a lianbel le a thupibel Thupiak ahi hi.

³⁹A niina a thupibel Thupiak sia tuasia taw ma in kibang hi: ‘Nangma le nangma na ki it bangin midangte zongh na it in.’

⁴⁰Moses Thukham buppi le kamsaangte hilna theampo sia hi thu niite kibulphu hi,” ci hi.

⁴¹Pharisee te pawlkhat a kikhop uh ciangin Jesus in,

⁴²“Messiah huvau bangbangin ngaisun nu ziam? Ama akua ii suan ziam?” ci in dongh hi. “Ama sia David suan hi,” ci uh hi.

⁴³Jesus in “Tua ahile banghangin Thaa in David munah, ‘Topa’ cisak ziam?” ci in dongh hi. David in,

⁴⁴‘Topa in ka Topa munah: Na ngalte na peang nuai ah ka koi dong, hi sung ka ziatsang ah hong to ta'n,’ ci hi.

⁴⁵“David in ama sia ‘Topa’ ci ahile Messiah sia bangbangin, David ii suan hi thei tu ziam?” ci in Jesus in zo kik hi.

⁴⁶Jesus dokna kuama in a zo thei bua uh a, tua ni pan kipan kuama in ama thu a dongh ngam nawn bua uh hi.