Read Siyin Chin Matthew 24 Bible Online

Matthew 24 - Siyin Chin bible

Matthew 24

¹Biakinn pan Jesus a pusua zawkciang a nungzuite in Biakinn huang sung a inn dangte lak nuam in neak uh hi.

²Jesus in, “Hi hi, en tek vun. A tatakin kong ci ciang, hi sungah suangte khat zongh a omna ngei san ah om nawn ngawl tu hi; a vekpi kilawn keak siat tu hi,” ci hi.

³Jesus in Olive Mual tungah a to laitakin, a nungzuite ama kungah hong pai tuam uh hi. “Hi thu sia bang hun ciangin hong tung tu a, tuaciang nong pai kik tu hun le hun bo tu hun, a lak tu in bang hong piang tu ziam?” ci in dongh uh hi.

⁴Jesus in, “Kidawm tavun, kuama in theamsak heak vun.

⁵Banghang ziam cile mihing tam mamate kei min zanghin hong pai tu a, ‘Keima in Messiah ka hi hi’ ci tu a mihing tam mama theam tu hi.

⁶A naina ah ngal kidona aw na za tu uh a, a khualana ah ngal kidona thu hong kison tu hi; ahihang patau heak vun. Tuabangte hong piang nanak tu a, ahihang hun bona hong theng zo hi, cina hi ngawl hi.

⁷Ngam khat le ngam khat kisim tu hi; kumpi khat le khat kido tu hi. Mun theampo ah kialpi tung tu a, zinliing tu hi.

⁸Hite theampo sia nautut kipat ciang, a nat bang ahi hi.

⁹“Tua zawkciang note hong kiman tu a, daan piak tu le thalup tu in hong ki aap tu hi. Keima hu in mihing theampo in note hong ngaimaw tu hi.

¹⁰Mihing tam mama in tua hun ciangin, a upna uh nusia tu hi; amate khat le khat kileeheak tu a, khat le khat kingaimaw tu hi.

¹¹Tua zawkciang leilot kamsaang tam mama piang tu a, mihing tam mama theam tu hi.

¹²Tuabangin siatna hong kizel tu a, mihing tam mamate ki itna kiam tu hi.

¹³Ahihang a tawp dong a thumaante kingum tu hi.

¹⁴Tuaciangin, hi Kumpingam Lungdamna Thupha sia, leitung theampo ah tetti tu in minam theampo tungah kihil kawkoai tu hi; tua zawkciang hun bona hong theng tu hi.

¹⁵“Kamsaangpa Daniel ii son ‘A kiitakhuai mama sia’ na mu tu uh hi. Tua in a thiangthona munah ding tu hi.” (Hi lai a sim sia in tel tahen!)

¹⁶“Tuaciang Judea a omte in mual tungah tai tahen.

¹⁷Innkhum tung a om mihing khat in ama ii vanhte la tu in tuaksuk nawn heak hen.

¹⁸Lo sungah a om mihing khat in a laktong puasilh la tu in, heak kik nawn heak hen.

¹⁹Tua hun sungah a om numei naupaaite le nau noailuaite atu in bangza he huai tu ziam?

²⁰Na tai tu uh hun sia phalbi lai le Sabbath ni ahi ngawl natu in Pathian tungah thungen vun.

²¹Banghang ziam cile tua hun ah ngimna sia leitung a kipat pan kipan, tuni dong a piang ngei ngimnate theampo sangin nasia zaw pek tu hi. Tuabang ngimna sia maisang zongh ah om kik ngei nawn ngawl tu hi.

²²Ahihang Pathian in a ni sia khiamsuk zo hi; tua hi buale kuama a suakta buatu hi. Ahitazong a tealtuam mihingte atu in Pathian in a ni khiam tu hi.

²³“Tuasia ciang khat po in, ‘En in, hi sungah Messiah om hi!’ ci in ahizong, ‘Zia sungah om hi!’ ci in ahizong hong cile um heak vun.

²⁴Banghang ziam cile Messiah theam le kamsaang theamte hong piang tu hi; hi thei hile Pathian tealsa mihingte ngawngawn a theam natu in, amate in nalamdang lakna liante le a tumdang nate tam mama hong vawt tu hi.

²⁵Ngai vun! a hun hong thet ma in hong sonkhol zo khi hi.

²⁶“Tua ahibuale mihingte in, ‘En vun, ama sia sennealngam sungah om hi!’ hong cile zong, tua munah pai heak vun; tua ahibuale ‘En vun, ama sia hi sungah buu hi,’ hong cile zong na um heak vun.

²⁷Banghang ziam cile Mihing Tapa sia van buppi ah nisuana pan nitumna dong a kaantan khualeng taang bangin hong pai tu hi.

²⁸“Mithi luang omna mun po ah vaciikte kikhawmtua tu hi.

²⁹“Tua hun ngimnate zawk a hai ngawlin, ni hong taang nawn ngawl tu a, tha zongh taang nawn ngawl tu hi, aksite van panin taaksuk tu a, van ah a om nate sia amate ii zin tek panin kipialsak siat tu hi.

³⁰Tuasia ciang Mihing Tapa ii lim sia van ah hong kilangh tu hi; Mihing Tapa sia van ah meeikaai tung pan vaangletna le minthanna lianpi taw hong pai a mu uh ciangin, leitung mihing theampo kap tu uh hi.

³¹Lemlepui aw hong nging tu a, tuaciang ama in leimong king lite ah a vantunglalangte sawl in, amate in ama tealsa mite leimong khat pan mong khat dongin khawmtua tu hi.

³²“Theikung in hilsak tavun. A baakte zongh hingin hong moisua ciangin, a teeno meang tu in kithoai a, tuasia ciang khuakhaal hun hong nai hi ci in na he uh hi.

³³Tuasia bangma in, hite theampo na mu uh ciangin, a hun hong nai a, hong kipapan zo hi, ci in na he tu uh hi.

³⁴Tu laitak a nungta mihingte a thi siat ma in, hi thu sia hong piang tu hi ci in phawk tavun.

³⁵Vantung le simlei a bo tu hi, ahihang ka kammalte a bo ngei buatu hi.

³⁶“Ahitazong tua a ni le a nai tu sia kuama in he ngawl hi — vantung ah vantung mite ahizong, Tapa ahizong, he ngawl hi; Pa bek in he hi.

³⁷Mihing Tapa hong pai natu sia Noah hun lai thupiang bang hi tu hi.

³⁸Tuipi liim ma in mihingte an ne tui dawnin om a, numei le pa kiteangin, Noah ii teambaw sungah a tum tatak ni dong sia tuabangin om uh hi.

³⁹Tua hi napi tuiliim a, tui ii a taikeak dongin, bang thu piang ziam ci in amate in a phawk bua uh hi. Mihing Tapa hong pai ciang zong tuabang ma hi tu hi.

⁴⁰Tua hun laitakin pasal nii sia lo sungah naseam khawm tu hi: khat kila tu a khat kikhe tu hi.

⁴¹Numei nii an ngoaina ah diang tu hi: khat kila tu a, khat kikhe tu hi.

⁴²“A kingingta sa in om vun, banghang ziam cile Topa hong pai tu ni sia na he bua uh hi.

⁴³Inn neipa khat in ngutate ii hong pai hun tu he le, mu ngawlin om tu a, ngutate in inn a phuulsak buatu hi, ci in na heak uh ahi hi.

⁴⁴Tua ahiciang no zongh, a tawntung kinging sa in om vun, banghang ziam cile Mihing Tapa in na muanmawk ngawl hun laitakin hong pai tu hi.

⁴⁵“Thumaan a, a ciim naseampa sia akua bangte ziam? Ama sia naseam dangte a uk tu le a hun a hun in an a pia tu in a kikoipa ahi hi.

⁴⁶A topa hong cia laitakin a kisawl bang a naseam hi ci in a topa ii mu naseampa sia bangza in lungdam tu ziam?

⁴⁷A tatakin kong ci ciang, a topa in tua naseampa sia a neisa theampo uk tu in koi tu hi.

⁴⁸Ahihang tua naseampa sia a ngina ngawl khat ahile, a topa sia hong cia hak lai vak, ci in ama le ama kitheam tu a,

⁴⁹tuaciangin a nasep khoppui naseam dangte saatin, zukham theite taw, an ne zu ne in om tu hi.

⁵⁰Tuaciangin tua naseampa ii topa sia a muanmawk ngawl hun le a heak ngawl ni hun khat ciang hong cia tu hi.

⁵¹A topa in ama sia nasia takin ngim pia tu a, a kihitheamsakte ii thuak tu teng thuaksak tu hi. Tua munah ama sia kap in ha ngoai tu hi,” ci hi.