Read Siyin Chin Matthew 25 Bible Online

Matthew 25 - Siyin Chin bible

Matthew 25

¹“Tua hun ciangin Vantung ngam sia hi bang hi tu hi. Khatvei lai in ngaknu sawm sia a meivak uh la in, zineipa muak tu in pai uh hi.

²Ngaknu ngate mawmaw a, a dang ngate ciim hi.

³A mawmaw nga teng in meiinn keng ahihang meitui keng thua ngawl uh hi,

⁴a ciimte ahile meiinn atu meitui bung dimin keng thua uh hi.

⁵Zineipa theng hak ahikom, ngaknute lusu in mu uh hi.

⁶“Zankim zawkciangin taangkona aw khat hong nging a, ‘Hi sungah zineipa hong pai hi. Hong pai tavun a muak vun,’ ci hi.

⁷Ngaknu sawmte khanglo in a meiinnte puua tek uh hi.

⁸A mawmawte in a ciimte munah, ‘Na meitui uh tawm hong hawm tavun, banghang ziam cile ka meiinnte mit tu hi’ ci uh hi.

⁹A ciimte in, ‘hi thei mama ngawl hi; no atu le ko atu in kicing ngawl hi. Sumbuk ah pai in lei tavun;’ ci uh hi.

¹⁰Tua ahikom a mawmaw ngaknute sia meitui lei tu in pai uh hi; tuaciang amate pai lanin zineipa hong theng hi. A kinging sa a om ngaknu nga teng sia ama taw kiteenna poai ah sungtang uh a, tuaciang kongkha kikhak hi.

¹¹“Tua zawkciangin ngaknu dangte hong theng hi. ‘Topa, topa! Hong tumsak ta'n!’ ci in au uh hi.

¹²‘Hong tumsak mama ngawl tu khi hi! No hong he ngawl khi hi,’ ci in zineipa in zo hi.”

¹³“Tua ahikom kikeam khol vun, banghang ziam cile, a ni tu le a nai tu na he bua uh hi,” ci in Jesus in thukhup hi.

¹⁴“Tua hun ciangin Vantung ngam sia hi bang hi tu hi. Khatvei lai in pasal khat in khualhaw sawm hi; a naseamte samin a neisa teng aap hi.

¹⁵Mihing simin amate thiamna om bangin, ama in pia hi: khat ii tungah khamh dangka tulnga pia hi; a dang khat ii tungah tulnii, a dang khat ii tungah tulkhat pia hi. Tua zawkciang ama sia khualhaw tu in ding hi.

¹⁶Dangka tulnga a kipia naseampa in, thakhat ma in sumvawt in, a dang tulnga ma nga thua hi.

¹⁷Tuasia bangma in dangka tulnii a nga sia zongh in, a dang tulnii ma nga thua hi.

¹⁸Ahihang dangka tulkhat a nga naseampa in pai a, leidum to in, a topa dangka teng phual hi.

¹⁹“A khuangei zawkciang naseamte ii topa hong cia kik a, amate sum tepteena tek sit hi.

²⁰Dangka tulnga a saang naseampa hong pai a, a dang tulnga ama tungah aap hi. ‘Topa, dangka tulnga hong pia ni hi. En in! Hi sungah dangka tulnga ka meetsak hi,’ ci hi.

²¹‘Pha hi, a thumaan naseam pha pa awng, tawmno na zeakna tungah thumaan na hikom, tampi zeakna ah a uk tu in kong koi tu hi. Kei taw lungdam khawm tu in hong pai ta'n!’ ci hi.

²²“Tuaciang tulnii a kipia naseampa hong pai a, ‘Topa, dangka tulnii hong pia ni hi. En in! Hi sungah ka thalaw dangka tulnii om hi,’ ci hi.

²³‘Pha hi, a thumaan naseam pha pa awng! Na tawmno tungah thumaan na hikom, na tampite uk tu in, kong koi tu hi. Kei taw lungdam khawm tu in hong pai ta'n!’ ci hi.

²⁴“Tuaciang in dangka tulkhat a saang naseampa hong pai a, ‘Topa, nang sia mihing sonham khat na hi hunlam kong he hi; na tuu ngawlna munah a at pa, na poai ngawlna munah anla pa na hi sia kong he hi.

²⁵Lau ka hikom pai in, lei sungah na sum teng ka phual hi. En in, hi sungah na neisa teng om hi,’ ci hi.

²⁶“ ‘A datham misia naseampa awng! Ka tu ngawlna munah at a, ka poai ngawlna munah anlapa hi, ci in hong he na hi ziam?’ a topa in ci hi.

²⁷‘Tua ahile pha hi; ka sum teng sia sum kholna munah na koisak po lete, kong cia kik ciang a meet taw a vekpi nga kik tu hi ngawl khi ziam?

²⁸Tu in a sum laaksak vun a, tulsawm a neipa piaksak tavun.

²⁹Banghang ziam cile, a neisate tungah a tamzaw kipia thua tu a hau seseam tu hi; ahihang bangma a nei ngawlpa tung pan a nei susun kila tu hi.

³⁰Hi naseam ngina ngawlpa ahile — doipua khuazing sungah not tavun; tua munah kap in ha ngoai tu hi,’ ci hi.

³¹“Mihing Tapa sia Kumpi bangin vantunglalangte taw hong pai ciangin, a kumpi tokhum tungah to tu a,

³²tuaciangin minam theampo ama mai ah kikhawm tu hi. Tua zawkciangin ama in tuu cing khat ii tuu le keal a khen bangin pawl nii in khen tu hi.

³³Ama in thumaan thutang mite sia a ziatsang ah koi tu a, a dang teng sia a veisang ah koi tu hi.

³⁴Tuaciang Kumpipa in ziatsang a om mihingte munah, ‘Hong pai tavun; Ka pa ii thupha piakte awng! Simlei a kibitphua ciil panin no atu a kipua khol sate lua tu in hong pai tavun.

³⁵Ka ngilkial laitakin an nong vaak uh hi, ka dangko laitakin tui nong pia uh hi; zin in ka vak laitakin na inn uh ah zin nong do uh a,

³⁶puansilh ka sel laitakin puan nong khu uh hi; ka ciinat laitakin nong ou uh a, thong sungah nong ve uh hi’ ci hi.

³⁷“A thumaan thutang mihingte in, ‘Topa, bang hun in ngilkial a na om hong mu a, an hong vaak ka na khu ziam?, ahibuale na dangko a tui neak tu, bang hun in hong pia kana khu ziam?

³⁸Khualmi in bang hunin nong vaak a, ka inn uh ah zin hong do ngei khu ziam? ahibuale puansilh sel in bang hunin na om a puan hong khu ngei kana khu ziam?

³⁹Bang hunin na ciinat ahizong, na thongtaak lai ahizong, hong mu ngei a hong ve kana khu ziam?’ ci uh hi.

⁴⁰Kumpipa in, ‘A maan tak ka ci ciang, hi ka suapuite a nobel khat tungah na vawt uh sia kei tung a hong vawt na hi uh hi!’ ci in zo tu hi.

⁴¹“Tuaciangin a veisang a tote munah, ‘Kei kung pan tai vun, no Pathian ii haamsiat sate awng! Doaimangpa le a lalangte atu a kivawt kholsa tawntung meikuang sungah pai tavun.

⁴²Ka ngilkial laitakin hong vaak ngawl nu hi, ka dangko laitakin ka neak tu bangma nong pia bua uh hi;

⁴³khualmi in ka om a na inn sungah nong saang bua uh hi, puansilh ka sel laitak puan taw nong khu bua uh hi; ka ci a na zong thong ka taak zong, nong ou nong khoi bua uh hi,’ ci hi.

⁴⁴“Tuasia ciang amate in, ‘Topa, ngilkial dangtaak a, khualmi in, puansilh sel a ciina le na thongtaak, bang hun hong mu ngei a, hong hu ngawl kana khu ziam?’ ci in zo tu uh hi.

⁴⁵Kumpipa in, ‘Kei kong cina pan, hi lai ah mihing thupi ngawlbelte khat na hu nop ngawl uh ciang, keima hong hu nuam ngawl na hi uh hi.’

⁴⁶Tua ahikom hite sia tawntung daan thuak natu sungah kipuak tu a, ahizong a thumaan thutangte sia tawntung nuntakna sungah pai tu hi,” ci hi.