Read Siyin Chin Matthew 27 Bible Online

Matthew 27 - Siyin Chin bible

Matthew 27

¹Zingsang tuungin thiampi lian theampo le upate in Jesus a thalup natu vaihawm uh hi.

²Amate in Jesus thikkhau taw khi in, paipui a, Romete ii ngamuk mangpa Pilate kungah aap uh hi.

³Ngual leeheakpa Judas in Jesus sia thidaan kipia tu hi, ci in a heak ciangin, ama kisiik kikin, a ngunn dangka sawmthum teng thiampi liante, upate kungah paipui hi.

⁴“Mihing mawna nei ngawl khat a thi tu in, leeheak ka hikom ka maw zo hi!” ci hi. Amate in, “Tua thu ko taw bang kisai nawn ziam? Tua thu sia nangma taw kisai bek hi!” ci in zo kik uh hi.

⁵Judas in a dangka teng Biakinn sungah vawk in nusia a, tua zawkciang ama pusuak in ama le ama awklum hi.

⁶Thiampi liante in dangkatangte tawmin, “Hisia in chisan ii man hi a, ih Thukham in chisan man sia Biakinn sumkholna ah khol tu khaam hi,” ci uh hi.

⁷Amate teng tua sum tungtaang ah thukimna a nei zawkciang, Bealseakpa Lo a kici sia, ngamdangmite thaan tu in, tua sum taw lei uh hi.

⁸Tua hu in tua lo sia “Chisan Lo” tu dong ma in kici hi.

⁹Tuasia ciang kamsaangpa Jeremiah ii sonkhol teng taangtung hi. “Amate in, Israel mite ii ama man tu a, a thukim uh ngunn dangka sawmthum la in,

¹⁰Topa ii keima hong sawl bangin bealseakpa ii lo sia lei uh hi.”

¹¹Jesus sia Romete ii ngamuk mangpa mai ah ding a, tua pa in, “Nang sia Jew te ii kumpipa na hi ziam?” ci in dongh hi. “Nangma ci bang ahi hi,” ci in Jesus in zo hi.

¹²Ahihang thiampi liante le upate ii mawsiatnate huvau sia bangma zona a nei bua hi.

¹³Tua ahiciang Pilate in, “Hi thute taw hong mawsak nate za ngawl ni ziam?” ci hi.

¹⁴Ahihang Jesus in kammal khat zongh a zo bua hi, tuasia ciangin ngamuk mangpa in lamdang sa mama hi.

¹⁵Paisan Poai a tun simin, Romete ngamuk mangpa in mipite ii ngetna bangin, thongtaak khat veu suataksak tu ngeina nei hi.

¹⁶Tua laitakin Jesus Barabbas a kici a minthang thongtaak pa khat om hi. [2]

¹⁷Tua ahikom mipite hong kikhop ciang, Pilate in amate tungah, “Jesus Barabbas hong suatak leng deizaw nu ziam maw, Messiah a kici Jesus hong suatak leng deizaw nu ziam?” ci in dongh hi.

¹⁸Jew mi thuneite in, Jesus eang ahikom ama ii khut sungah aap ahi hunlam sia Pilate in tel hi.

¹⁹Pilate sia thukhenna inn sung a to laitakin a zi in kamtaisak a: “Mawna nei ngawl tua pa tungtaang ah kihel heak in. Tu zan in ama huvau ka mang sungah nasia takin thuak khi hi,” ci hi.

²⁰Thiampi liante le upate in Pilate ii Barabbas suatak a piak natu le, Jesus a thalup tu a nget natu in mipite hol uh hi.

²¹Ahihang Pilate in mipite munah, “Hite nii sung pan koisia hong tha leng na deizaw uh ziam?” ci in dongh hi. “Barabbas,” ci in zo uh hi.

²²“Tua ahile Messiah a kici Jesus sia bang law tu khi ziam?” ci in Pilate in dongh hi. “Thinglamtee tungah thatlum in,” ci tek uh hi.

²³Ahizong Pilate in, “Ahihang ama in bang khialna vawt na ziam?” ci in dongh hi. Tuasia ciangin, amate in a aw neiza uh taw au in, “Thinglamtee tungah thatlum in,” ci uh hi.

²⁴Pilate in tubang taw kinga zo ngawl tu hi ci a mu ciangin, ngamlumna piang thei tu hi, ci a mu manin tuidam tawm la in, mipite mai ah a khut sil a, “Hisia ii thina taw kisai kei hang hi ngawl hi! Hisia in noma ngamtatna hang ahi hi!” ci hi.

²⁵“ama ii thina hangin thuak tu a om babang koma le ka suan ka paalte tungah hong tu tahen!” ci in mipi bup in zo hi.

²⁶Tua zawkciang Pilate in, amate dei bangin Barabbas tha hi; Jesus sia a velsak zawkciang thinglamtee tungah thalup tu in aap hi.

²⁷Tua zawkciang Pilate ii ngalkapte in Jesus sia ngamuk mangpa inn ah paipui uh a, ngalkap hon bup sia ama kim ah kikhawm hi.

²⁸Amate in a puansilhte suukeaksak a, puantual san khat silhsak hi.

²⁹Tua zawkciang lingngui taw kumpilukhu khat vawtin a lu ah khusak hi, tuaciangin ciangkang khat a khut ziatsang ah koi uh a; tua zawkciang a mai ah khupdin in nunau uh hi. “Jew te ii kumpipa a khansau tahen!” ci uh hi.

³⁰Amate in ama cilphii in, a ciangkang sut kik a, a lutang saatna in nei uh hi.

³¹Amate in a ciammui vawt zazaan zawk uh ciang, a puantual sia suusak kikin, ama ii a silh ngei teng silhsak kik hi. Tua zawkciang thinglamtee tungah thatlum tu in paipui uh hi.

³²Amate a pusua uh ciang, Cyrene mi Simon a kici khat taw kisi uh a, ngalkapte in zawthawk thu taw Jesus thinglamtee puasak uh hi.

³³Amate in Golgotha a kici “Lungu Mun” theng uh hi.

³⁴Tua munah amate in sapittui le tuikhaa nam khat hel in, Jesus pia uh hi; ahihang ama in tep bek in a ne bua hi.

³⁵Amate in Jesus sia thinglamtee tungah kilh uh a, nuangtang lotna taw in a puan teng hawm uh hi.

³⁶Tua zawkciang tua munah to in ama en uh hi.

³⁷A lu tung san ah ama kimawsakna laimal teng taak uh hi. “Hisia in Jesus hi. Jew te Kumpipa hi,” ci in at uh hi.

³⁸Tua zawkciangin phalakte nii zongh Jesus ziatsang ah khat veisang ah khat khaikhawm uh hi.

³⁹Tua mun kaantan a hong pai mihingte in Jesus sia lupei sanin nunau zazaan uh hi.

⁴⁰“Biakinn baltham in ni thum zawkciang a sa kik tu pa, Pathian Tapa na hile, nangma le nangma kihun in! Thinglamtee tung pan hong tuaksuk ta'n,” ci uh hi.

⁴¹Tuabang tatak ma in thiampi liante, Thukham hil syate le upate in selno uh hi.

⁴²“Ngualdangte hun zo ahihang ama le ama kihun thei ngawl hi. Ama sia Israel te Kumpipa hi ka na ngawl ziam! Thinglamtee tung pan hong tuaksuk le, tuasia ciang ama ki um tu hi!

⁴³Ama in Pathian muang a, Pathian Tapa ka hi ci hi. Tua ahile Pathian in tu in a hunnuam ziam en tawng!” ci uh hi.

⁴⁴Thinglamtee tungah ama bangin a kikhai phalakte ngawngawn in, ama sia tuabang ma in selno uh hi.

⁴⁵Nisun ciangin ngam bup sia khuazing in siin cip a, nai thum sung khuazing hi.

⁴⁶Nai thum saat tu bang ciangin Jesus in aw nging tatak taw, “Eli, Eli, lema sabachthani?” ci in au hi. A khiakna sia “Ka Pathian, Ka Pathian awng! Banghang hong nusia ni ziam?” a cina hi.

⁴⁷Tua munah a ding mihing pawlkhatte in za a, “Ama in Elijah sam hi!” ci uh hi.

⁴⁸Amate sung pan khat tai in, sapittui haau sungah puansia pap in, ciangkang tungah sawm in a neak tu in, ama kam ah taa to hi.

⁴⁹Ahihang pawlkhatte in, “Ngak vun! Elijah in ama hun tu in hong pai ziam, en tawng!” ci uh hi.

⁵⁰Tuaciang Jesus a nging takin a au kik zawkciang a hui tat hi.

⁵¹Tuaciangin Biakinn sungah kidalna puan a kikhai sia a lu pan a taw dong khen nii in kizensuk hi. Zinliing a suangpite kikhentham in,

⁵²thaante kihong in, Pathian ii mihing a thisate tam ma kitho kiksak hi.

⁵³Amate in thaan nusia in, Jesus ii thina pan a thaw kik zawkciang, Khuapi Thiangtho sungah tum uh a, tua munah mihing tam mama in amate mu uh hi.

⁵⁴Ngalkap hon ukpa le Jesus a cing ngalkapte in zinliing le thupiang dang theampo a mu uh ciang, lau mama a, “Ama sia Pathian Tapa tatak hi!” ci uh hi.

⁵⁵Galilee pan a zui, ama a hu numei tam mamate a khuala na ah ding in Jesus en uh hi.

⁵⁶Tuate sungah Mary Magdalene, James le Joseph nu Mary, Zebedee ii zi kihel hi.

⁵⁷Nitak ciangin, Arimathea panin sumhau khat hong theng hi. A min Joseph hi a, ama zongh Jesus ii nungzui khat ahi hi.

⁵⁸Ama in Pilate omna ah pai in Jesus luang ngen hi. Pilate in Jesus luang sia Joseph piak natu in thupia hi.

⁵⁹Tua ahikom Joseph in la a, puanneal kaang thak taw a tun zawkciang,

⁶⁰ama ii thaankuul sungah koi hi. Tua thaankuul sia suangpi a khuak thak ahi hi. Tua zawkciang, ama in suangtumpui khat thaan kuavang mai ah liik in a kha zawkciang cia hi.

⁶¹Mary Magdalene le Mary dang khat sia thaan maingat in to uh hi.

⁶²A khuavak ni sia Sabbath ni hi a, thiampi liante le Pharisee te in Pilate taw kimu uh a,

⁶³“Topa awng, mihing leilot pa in a nuntak lai in, ‘Ni thum zawkciang, nuntakna sungah hong kitho kiksak tu hi,’ a ci ngei sia ka phawk uh hi.

⁶⁴A nungzuite hong pai in, a luang ngu a, mihingte munah thina pan thosak zo hi a ci thei ngawl natu in, a ni thum ni ciang dong thaan sia pha takpi a kicin natu thupia in. A leilot thu son khak zaw sia in, a masa sia sangin sia zawlai tu hi,” ci uh hi.

⁶⁵Pilate in, “Ngalkap pawlkhat paipui vun a, thaan sia a muanhuai theiza in cingsak tavun,” ci hi.

⁶⁶Tua ahikom amate pai in, thaan kongvang sia a bit thei natu in, suang tungah tepteena khen in ngalkapte ii cin tu in nusia uh hi.