Read Siyin Chin Matthew 28 Bible Online

Matthew 28 - Siyin Chin bible

Matthew 28

¹Sabbath zawkciang, Nipi ni khua hong vak ciangin, Mary Magdalene le Mary dangkhat thaan vil tu in pai uh hi.

²Thakhatin nasia tak zinliing hi. Topa vantunglalang khat van pan hong tuaksuk a, thaan kong hukna suangtum liikkeak in a tungah to hi.

³Ama meal sia khualeng taw kibangin, a puansilh sia vuuk bangin paak hi.

⁴A cingte lau mama ahikom, liingin mithi sate taw kibang uh hi.

⁵Vantunglalang in numeite paupui hi. “Lau heak vun. Thinglamtee tungah a kithat Jesus sia zong nu hi ci in kong he hi.

⁶Ama in hi sungah om ngawl hi! Ama hong sonsa bangma in kitho kiksak zo hi. Hi sungah hong pai tavun a, a lupna hong en tavun.

⁷Tu in manlangin pai tavun a, a nungzuite munah, ‘Ama sia thina pan kithosak zo a, tu in ama in note mai Galilee ah pai tu hi; tua munah ama na mu tu uh hi!’ ci tavun. Kong son sate ciamtee tavun,” ci hi.

⁸Tua ahikom amate in, thaan sia manlang takin nusia a, lau kawm si lungdamna taw kidim si in, nungzuite kungah thupuak tu in tai uh hi.

⁹Thakhatin Jesus in amate taw kisi a, “Thinnopna na nga tavun,” ci hi. Amate in ama kungah hong neak uh a, a peang koai in bia uh hi.

¹⁰Jesus in, “Lau heak vun; Pai tavun a, ka suapuite tungah, Galilee ah pai tu in sawl tavun, tua munah amate in kei hong mu tu hi,” ci hi.

¹¹Numeite sia amate pai natu ah a pai laanin, thaancing ngalkapte pawlkhat khuapi sungah heak kikin, thiampi liante tungah thupiang theampo ko uh hi.

¹²Thiampi liante in upate taw kisi in, kikupna khat nei uh hi. A ngalkapte sum tam mama pia uh a,

¹³tuaciangin, “Zan ka mut lanin nungzuite hong pai a, a luang hong ngu hi, na ci tu uh hi.

¹⁴Tuaciangin ngamuk mangpa in hi thu a za tha le, note mawna a hi ngawl hunlam ka na son tu uh hi, bangma thinngim natu om ngawl hi,” ci uh hi.

¹⁵Ngalkapte in sum la in, a kisawl na bangin vawt uh hi. Tua hi a, tua thupuakna sia tuni dong Jew te sungah kizel hi.

¹⁶Nungzui sawm le khat te in Galilee ngam mual tungah Jesus sawl bangin pai uh hi.

¹⁷Ama a mu ciangin, pawlkhat in um tak ngawl ahitazong, amate in bia uh hi.

¹⁸Jesus in amate kung nai neakin, “Vantung le leitung ah thunei theina theampo a vekpi in kei hong kipia zo hi.

¹⁹Tua ahiciang pai tavun, mun theampo ah mihing theampo ka nungzui suaksak tavun: Pa, Tapa le Thaa Thiangtho min taw tui na phum tavun,

²⁰tuaciang ka thu piakte theampo a zui natu hil tavun. Tuaciang hun bo dongin note taw kong omkhawm tawntung tu hi,” ci hi.