Read Siyin Chin Matthew 3 Bible Online

Matthew 3 - Siyin Chin bible

Matthew 3

¹Tua hun laitakin Tuiphumpa John sia Judea sennealngam ah hong pai a, thuhil kipan hi.

²“Na mawna uh pan kisiik kik vun, banghang ziam cile Vantung ngam hong nai zo hi!” ci hi.

³Kamsaangpa Isaiah kammal sia John huvau a sonkholna hi a, “Sennealngam sungah mihing khat hong taangko a, ‘Topa atu in lampi pua khol vun; Ama ii khualhaw natu in lamzin tang khat vawtsak vun!’ ” ci hi.

⁴John ii puansilh sia kalaoh mul taw kitak a, ama in savun kawngkhau thua in, ama an sia khaumaw le ngam khuaitui ahi hi.

⁵Mihingte in Jerusalem pan, Judea ngamkhen bup le Jordan ngunhui ngam theampo panin hong pai uh hi.

⁶Amate in a mawna uh pualaak a, tuaciangin Jordan ngun sungah ama in tuiphum hi.

⁷Pharisee te le Sadducee te tam ma ama kungah tui kiphum tu in, hong pai a mu ciangin, amate tungah, “No ngul ngilote awng — Pathian ii daan hong piak natu panin suakta tu nu hi ci in akua in hong son ziam?

⁸Mawna pan kisii kikna lim kilanghsak vun.

⁹Na taanghpupi Abraham suan le paalte na hi uh hu in, daan thuak natu pan suakta tu in, kimuangmaw heak vun. No tungah hong ci khi hi, Pathian in hi suangte zongh la in Abraham suan le paalte suaksak thei hi!

¹⁰Thingkungte phuk tu in a bul ah, heimai kingat zo hi, ngapha a nga ngawl thingkung theampo kiphuk tu a, meimang sungah kisep tu hi.

¹¹Na kisii kikna uh a kitel natu in tui kong phum hi, ahihang kei nung pan hong pai lai tu pa in no sia Thaa Thiangtho le meikuang taw hong baptize tu hi. Kei sangin ama lian zaw pek a, a peangdap toai tu zonghin ka kilawm bua hi.

¹²Ama in taangkheaplaw a khut sungah toai zo hi. Zungtaangte hong kheap tu a taangtang teng taangsaal sungah khawmtua in, taangsi taangvai teng a mit ngeingawl meikuang sungah hal tu hi,” ci hi.

¹³Tua hun laitakin Galilee pan Jesus hong theng a, John ii tuiphum tu in, Jordan ngun, John kungah hong pai hi.

¹⁴Ahihang John in ama tho tu in kithoai a, “Kei sia nangma ii nong tuiphum tu hizaw napi, kei kungah nang hong paizaw ni ziam?” ci hi.

¹⁵Ahihang Jesus in zo kik a “Pathian ii deina theampo a kicin natu in, tu in hong seam ta'n,” ci hi. Tuaciang John zongh thukim hi.

¹⁶Jesus tui a kiphum zawk po ciang tui sung pan hong pusuak to hi. Tuaciang ama atu van kihong a, Pathian ii Thaa ngam vakhu bangin hong tuaksuk in, ama tungah hong tusuk a mu hi.

¹⁷Tuaciang van panin aw khat in, “Hisia in ka it ka Tapa hi a, ama tungah ka lungkim hi,” ci hi.