Read Siyin Chin Matthew 4 Bible Online

Matthew 4 - Siyin Chin bible

Matthew 4

¹Tua zawkciang Thaa in Jesus sia Doaimangpa ii ze et tu in ngam sungah paipui hi.

²Sun sawmli le zan sawmli an ne ngawlin a om zawkciang Jesus ngilkial hi.

³Tuasia ciang Doaimangpa hong pai a, “Pathian Tapa na hi le suang hite anluum suaksak in,” ci hi.

⁴Ahihang Jesus in zo a, “Laithiangtho in, ‘Mihingte sia anluum bek taw nungta thei hi ngawl a, Pathian kam sung pan a pusuak kammal khat sim nuntak pui hi,’ ” ci hi.

⁵Tua zawkciang Doaimangpa in Jesus sia Khuapi Thiangtho Jerusalem ah paipui a, Biakinn khuvum a saangbel na ah suanhto hi.

⁶“Pathian Tapa na hile nangma le nangma kitaaksuksak in, banghang ziam cile laithiangtho in ci hi, ‘Pathian in a vantunglalangte nang huvau in sawl tu a, na peang beak zongh suang taw a kisutha ngawl natu in, a khut taw hong domto tu hi.’ ” ci hi.

⁷Jesus in, “Ahihang laithiangtho in, ‘Na Topa Pathian na ze et heak vun,’ zongh ci si hi,” ci in zo kik hi.

⁸Tuaciang Doaimangpa in mualsaang mama khat ii tungah paipui a, leitung ngam tuatuamte ii letna theampo lak hi.

⁹“Khupdin in kei hong bia lete, hi teng theampo nang kong pia tu hi,” ci hi.

¹⁰Tuasia ciang Jesus in, “Satan awng, tai in! Laithiangtho in, ‘Na Topa Pathian bek bia vun a, Ama atu bek sepsak vun!’ ci hi,” a ci hi.

¹¹Tuasia ciang, Doaimangpa in Jesus nusia a, vantung mite hong pai in Jesus ou uh hi.

¹²Jesus in John thong sungah kikhum hi, ci in a zaak ciang, ama Galilee ah pai hi.

¹³Ama Nazareth khua ah taam ngawlin, Zebulun le Naphtali ngamsung Galilee tuili hui khuapi Capernaum ah teang tu in pai hi.

¹⁴Hi bang a ngamtat sia, kamsaangpa Isaiah pauna teng a taangtun natu ahi hi.

¹⁵“Zebulun ngam le Naphtali ngam, Tuipi sung zotna lampi tung, Jordan ngun lang khat, Galilee, Gentile te ngam!

¹⁶Khuazing sungah a teang mihingte in, Khuavak taang lian mama khat mu tu hi. Thina khuazing ngamsung a teangte tungah khuavak a taang tu hi.”

¹⁷Tua hun pan kipan Jesus in, “Na mawna uh pan kisiik kik vun, banghang ziam cile Vantung ngam hong nai zo hi,” ci in ama thuhilnate hil tu in a kipan hi.

¹⁸Galilee tuili hui ah a va laitakin, Jesus in ngasa mante ahi unau nii Simon (Peter kici) le a suapuipa Andrew, tuili sungah ngeen khat taw ngasa manin a om mu hi.

¹⁹Jesus in amate tungah, “Hong zui tavun, mihing mante kong suaksak tu hi,” ci hi.

²⁰Thakhatin a ngeente nusia uh a, ama zui paih uh hi.

²¹Tua mun pan a paisuak uh ciang Zebedee tapate unau James le John mu hi. Amate in a pa taw ngunkuang sungah a ngeente puua in om uh hi. Jesus in amate sam hi.

²²Thakhatin a ngunkuang le a pa nusia in zui uh hi.

²³Jesus Galilee ngam bup ah vakin, synagogue te ah hilna nei a, Kumpingam Lungdamna Thu thuhilna nei in, natna satna namcin le ciluang natna a neite damsak hi.

²⁴Ama thu sia Syria ngam bup ah kizel ahikom mihingte in ama kungah ciina theampo, natna satna le mealhem theampo: doai veite, butthi theite, langngawte, paipui in — Jesus in damsak siat hi.

²⁵Galilee ngam khuapi sawmte le Jerusalem, Judea le Jordan ngunngal panin, mihonte in zui uh hi.