Read Siyin Chin Matthew 5 Bible Online

Matthew 5 - Siyin Chin bible

Matthew 5

¹Jesus in mihonpite a mu ciangin mual tungah kaato hi. A nungzuite a kiim ah kikhawm a,

²tuaciang amate tungah hil tu in kipan hi.

³“Thaa thu ah a zawngkhal hunlam a kihete in, mihing lungdamte ahi hi; Vantung ngam sia amate aa ahi hi!

⁴“A thuum a taute in mihing lungdamte ahi uh hi! Pathian in amate heeneam tu hi.

⁵“A kiniamkhiakte in mihing lungdamte ahi uh hi; amate in Pathian kamciamte a saang tu uh hi!

⁶“Pathian ii tangkalte sep tu a lungngulbel te in mihing lungdamte ahi uh hi; Pathian in a kicing lungkimna pia tu hi!

⁷“Ngual hesuak theite in mihing lungdamte ahi uh hi; Pathian in amate hesuak tu hi!

⁸“Thinsung thiangthote in mihing lungdamte ahi uh hi; amate in Pathian mu tu uh hi!

⁹“Kilemna a vawtte in mihing lungdamte ahi uh hi; Pathian in ka tate ci tu hi!

¹⁰“Pathian ii deina bang ngamtatna hangin vawtsiat a thuakte in, mihing lungdamte ahi uh hi; Vantung ngam in amate aa hi tu hi!

¹¹“Kei nungzui na hi uh hu in ngual in hong zawngsak hong vawtsia in, ngitlo leilot thu a nanam taw mawna hong zong le mihing lungdamte na hi uh hi.

¹²Na thinnuamsak vun, lungdam vun, banghang ziam cile vantung ah na thaman saan tu hong kikoisak sia lian mama hi. Taanghlai kamsaangte zongh tuabang ma in, na kivawtsia hi.

¹³“Mihingte atu in no sia ci taw na kibang uh hi. Ahihang ci sia a alna a thai le ki alsak kik thei nawn ngawl hi. Tua in kimanna nei nawn ngawl a, kivawkin, mihingte in tuanhcil tu hi.

¹⁴“No sia leitung bup atu in khuavak taw na kibang uh hi. Mualtung ah a kisa khuapi sia a kiseal thei bua hi.

¹⁵Mei a det ciang, kuama in kuang taw sincip ngeingawl hi. Inn sung a om theampo a taan natu mun meivakna tungah kikoi zaw hi.

¹⁶Tuasia bangma in, napha na sep uhte mihingte in a mu ciang, vantung a om na Pa uh a pok natu in, amate mai ah na khuavak uh taangsak vun.

¹⁷“Moses thukham le kamsaangte hilnate bosak tu in hong pai hong sa heak vun. A bosak tu hong pai hi ngawlin, a khuangkhimsak tu in hong pai ka hizaw hi.

¹⁸Na theampo ii tawp natu a khuangkhim mateng, simlei le vanpi a kip laiteng, thukham sung a thu nobel khat zongh a bo thong buatu hi.

¹⁹Tua ahikom, a kuama po thupiakte sung pan a nobel khat ni ngawlin midang zongh tuabangin a nit ngawl natu a hil sia in Vantung ngam sungah a nobel hi tu hi. Tuaciangin a kuama po ahizong thukham ni a, midangte zongh tuabangin a nit natu a hil sia Vantung ngam sungah lian tu hi.

²⁰A tatakin kong ciciang, Pathian ii deina bang na vawtna sungah Thukham hil Syate le Pharisee te sangin na thumaan zaw uh le bekin Vantung ngam sungah na tum thei tu uh hi.

²¹“Mihing na that uh le thusitna na thuak tu hi. ‘Mihing na that heak vun,’ ci in taanghlaite kihilna sia na he uh hi.

²²Ahihang tu in kong ci in ah: a suapuipa tungah a thin uuk pawpo te in thusitna thuak tu hi, a kuama po ahizong a suapuipa ngina ngawl hi, a ci peuma, Council te mai ah kipaipui tu a, a kuama po a suapuipa mannung ngawl mihing mawmaw, a ci peuma hell meikuang sungah a pai tu lauhuai hi.

²³Tua ahikom biaknatau tungah biakpiakna nei tu in, na kithoai laitakin, na suapuipa in, nang tungah lungkim ngawlna nei hi, ci in na phawk le,

²⁴na piak tu vanh sia biaknatau mai ah nusia phot zii ta'n a, na suapuipa taw kilemna vawt phot ta'n, tua zawkciang hong pai kik ta'n a, Pathian tungah biakpiakna nei pheang in.

²⁵“Khat po in thu hong vawt a, zumkong hong then le a hun om lai, zum na thet ma in, na kituu uh thu sia saatmit masa tavun. Tua ahibuale ama in thukhenmangte tungah hong then tu a, tuate in palikte munah hong aapin, thonginn sungah hong khum tu hi.

²⁶A maan tatak kong ci ciangin, tua na liausum teng a cingin na piak siat mateng thonginn sung pan na suakta thei buatu hi.

²⁷“ ‘Nupa kipalngul heak vun’ ci thu na za zo uh hi.

²⁸Tu in hi bangin kong ci hi: khat po in numei khat khialpui nopna thin taw a en le a thinsung ah nupa palngul khialna vawt hi zo hi.

²⁹Tua ahikom na mit ziatsang in hong mawsak le khelkeak in vawk in! hell sungah na pumpi bup in na pai sangin, pumpi cing ngawlin, om lete phazaw hi.

³⁰Na khut ziat sangin hong khialsak le, saattan in vawk in. Na pumpi cingin hell sungah na pai sangin, khutsamh peangsamh in om lete phazaw pek hi.

³¹“ ‘A zi a khul mihing khat pawpo in kikhulna lai pia tahen,’ kici si hi.

³²Ahihang tu in kong ci in ah: a zi ii thumaan ngawlna simngawl thudang taw pasal khat in a zi khul a, tua nu in pasal dang khat a nei kik le, nupa palngul mawna a vawtsak suak hi. A pasal kik sia zongh in, nupa palngul mawna vawt ahi hi.

³³“ ‘Na kamciam vawtte ciampeal heak vun. Topa tungah vawt tu a na kamciamnate uh na vawt vun,’ ci in khangluite tungah a kison thute na heaksa uh hi.

³⁴Ahihang tu in kong cina panin: kamciam na kipiak uh ciangin kiciamna zangh heak vun. Vantung min lo in na kiciam heak vun, banghang ziam cile tua in Pathian tokhum ahi hi;

³⁵leitung taw zong kiciam heak vun, banghang ziam cile tua in a peang ngakna ahi hi; Jerusalem min lo in zongh kiciam heak vun, banghang ziam cile tua in Kumpilianpa khuapi ahi hi.

³⁶Na lutang taw zonghin na kiciam heak in, banghang ziam cile na samzam khat a kaang tu le a vom tu in na vawt thei bua hi.

³⁷A hite ‘Hi’ ma ci vun, ahi ngawlte ‘Hi ngawl’ ma ci vun — tua tungsia pauna sia Ngilopa kung pan hong pai ahi hi.

³⁸“ ‘Mittang khat luang mittang khat, hatang khat luang hatang khat, ci thu na zaaksa uh hi.

³⁹Ahihang kei kong cina pan: no tungah hong khialte na thuk kik heak vun; khat po in na biangkho ziatsang hong beang le na biangkho veisang zongh na ngat vun.

⁴⁰Tuaciang khat po in na laktong khat dei in zum ah thu hong vawt le na laktong puasilh zongh na pia thua lai vun.

⁴¹Tua mun a ngak ngalkapte in, tai khat vanh pua in hong sawl le, tai nii puaksak vun.

⁴²Khat po in na khat hong ngen le pia vun; khat po in na khat hong zawng nuam le zawn vun.

⁴³“ ‘Na lawmte it vun a, na ngalte ensan vun,” ci thu na zaaksa uh hi.

⁴⁴Ahihang kei kong cina pan: na ngalte it vun a, hong vawtsiate atu thungetsak vun.

⁴⁵Vantung a na Pa ii tate na sua thei natu in, tuabangin ngamta vun. Banghang ziam cile ama in mihing phate tung le mihing siate tungah a kibangin ni taangsak a, na pha seamte le a sia seamte tung zongh ah a kibangin nguazusak hi.

⁴⁶“No hong itte bek na it uh le, Pathian in banghangin thaman hong pia tu ziam? Shiadongte ngawngawn zongh, tuabangin ngamta kana ngawl ziam?

⁴⁷Tuaciangin na lawmte bek na paupui uh le, ngualdang taw bang na kilamdanna uh om ziam? Doai biate zongh in tuabangin ngamta kana ngawl ziam?

⁴⁸Vantung a na Pa uh cialcing ahi bangma in, no zongh na cialcing uh kul hi,” ci hi.