Read Siyin Chin Matthew 6 Bible Online

Matthew 6 - Siyin Chin bible

Matthew 6

¹“Biakpiak vaipuakte na sep uh ciangin, mihon ii hong mu tu in, ngual sungah vawt heak vun. Tuabangin ngual sungah na vawt uh le, vantung a na Pa kung pan, thaman khat zongh na nga buatu hi.

²“Mihing cimaw khat huna na nei uh ciangin, mihing a kihitheamsakte in lampi liante tung le biakna innte ah a vawt uh bangin, pokngaina taw vawt heak vun. Amate ahile, mihingte pok tu thangai in tuabangin ngamta hi. A tatakin ka ci ciang, amate ii a thaman uh a cing takin kipia zo hi.

³Ahihang a cimaw khat na hu uh ciangin, na lawm phabel khat zongh in hesak heak vun.

⁴Tuasia ciangin kuama in hong heakpui ngawl tu hi. Tuaciang a kilangh ngawl a, na nasep hong mu, na Pa in thaman hong pia tu hi.

⁵“Thu na nget uh ciangin a kihisak mihingte bangin ngen heak vun! Amate lamkaa khawng le biakna innte ah ngual mu tu in ding a thungen thanuam uh hi. A tatakin ka ci ciang, amate a thaman uh a cing takin kipia zo ahi hi.

⁶Ahihang no thu na nget uh ciangin, inndoi sungah tumin, inn na kha zawk uh ciang, a kimu thei ngawl, na Pa tungah thungen tavun. Tua hile noma ii heak bek a na ngamtatna uh hong mu na Pa in thaman hong pia tu hi.

⁷“Thu na nget uh ciangin, doai biate bangin, khiakna nei ngawl kammal tam mamate zangh heak vun, amate in thunget sau thethei a zak uh ciangin, a pathiante in za tuan tu in um uh hi.

⁸Amate bang hi heak vun. Na nget uh ma in na Pa uh in, na kitaangsap uh teng hong he siat zo hi.

⁹Tua ahiciang hi bangin thu ngen vun: Vantung a om kote Pa awng: Na min thiangtho ki upat tahen;

¹⁰na Kumpingam hong piang tahen; Vantung ah na deina a kicin bangin Leitung ah kicing tahen.

¹¹Tu ni in ka khamkhop tu an hong pia ta in.

¹²Ko tungah hong khialte ka maisak uh bangma, Kote khialna zongh hong maisak ta in.

¹³Ze etna haksa hong thuaksak heak in a, Ngilopa ii khutsung pan hong tan ta in. Uk zawkna, vaangletna le minthanna Nang aa hi tawntung tahen, Amen.

¹⁴“Ngual ii note tung a hong khialnate na maisak uh le, vantung a na Pa zongh in, note khialna zongh hong maisak tu hi.

¹⁵Ahihang ngual khialna na maisak bua uh le na Pa zongh in note khialna hong maisak ngawl tu hi.

¹⁶“Tuaciang, an na tan uh ciang, a kihisak theamte bangin maikhingin om heak vun. Amate sia a antan hunlam uh ngual heak tu in kipua ngawl lui in om hi. A tatakin ka ci ciang, amate in a thaman uh a cing takin a kipiasa ahi hi.

¹⁷An na tan uh ciang, na mai uh phiatin na sam uh pot vun,

¹⁸tua hi le na antan uh hunlam ngualdang in hong he tuan ngawlin, a kimu ngawl na Pa bek in hong he tu hi. Tuaciang, nangma bek heak a na ngamtat sia na Pa in, hong mu tu a, thaman hong pia tu hi.

¹⁹“Na nei na lamh uhte, nget ii neak tu, a eakseau tu le ngutate in phuul a, a nguk theina, leitung ah noma atu in khol heak vun.

²⁰Tua hi zaw ngawlin, na nei na lamh uhte, nget neak thei ngawl, eakseau thei ngawl ngutate in phuul a, a nguk thei ngawlna, vantung ah na khol vun.

²¹Banghang ziam cile na neisate omna munah na thin na lung uh om tu hi.

²²“Mittangte sia pumpi atu in meivak ahi hi. Na mittangte a ciidam le na pumpi khuavak taw kidim tu hi. Ahihang na mittangte a pha buale na pumpi khuazing sungah om tu hi.

²³Tua ahikom na sungah a om khuavak sia khuazing hi thong le bangza in zingcip tu ziam?

²⁴“Kuama in to nii ii sal hi thei ngawl hi. Ama in khat ensan tu a, khat it tu hi; khat ii tungah thumaan tu a khat puavawk tu hi. Pathian le sum ii sal na seam khawm thei buatu hi.

²⁵“Na nuntak thei natu in, an le tuite ahizong, na pumpi atu in puante ahizong, tuate huvau thintoi heak vun, kong ci sia hisia hang ahi hi. Nuntakna sia an sangin manpha zaw kana ngawl ziam? Pumpi sia puan sangin manpha zaw kana ngawl ziam?

²⁶A leang kawkoai vacimte en vun: amate in thai tu ngawl, anla ngawl a, saal sungah an khol ngawl hi; ahihang vantung ah na Pa in, amate vaak hi! Note sia vacimte sangin manpha mama zaw ngawl kana nu ziam?

²⁷Note sung pan thinngimna taw na khan uh bekno khat beak sauzawsak thei natu nu ziam?

²⁸“Tuaciang puansilh tu banghangin thintoi nu ziam? Duisung paakte en tavun, bangbangin khang ziam: amate in na le seam ngawl a, puansilh nikteen le vawt ngawl hi.

²⁹Ahihang a maan tatakin kong ci ciangin, Solomon Kumpipa in, a hau mama hang, hi paakte za in a hoi puan nei ngawl hi.

³⁰Tuni in po a, zing ciang a bo tu meikhuk sung a kihal tu lopa — hi lopa a zeam sia Pathian hi. Ama in no hong zeam zaw tu ahi sia muang ngawl nu ziam? Na nei uh upna sia bangza in no ziam!

³¹“Tua ahikom, ‘bang ka ne tu a, bang ka dawn tu? bang puan ka silh tu ziam?’ ci in thinngim heak vun.

³²(Hite sia doai biate ii thinbot thei bul thute ahi hi.) Vantung a om na Pa in, hite theampo na kitaangsap uh hong he nginge hi.

³³Tua sangin Pathian Ukna-ngam le ama in nang tung pan bang dei ziam, ci sia thupisak masa vun, tua hile ama in tua nadang theampo zongh hong sik tu hi.

³⁴Tua ahikom zing ciang atu in, thinngim heak vun; zing ciang in ama khom tu ma thinngimna nei tu hi. Ni sim hong piang thinngimnate belap kul ngawl hi.