Read Siyin Chin Matthew 7 Bible Online

Matthew 7 - Siyin Chin bible

Matthew 7

¹“Pathian ii note tungah thu hong khen ngawl natu in, ngual tungah thu na khen heak vun,

²banghang ziam cile ngual tungah thu na khen uh babangin note tungah Pathian in thu hong khen tu hi. Ngual tungah na zak uh na ngeina let uh teng ma no tungah hong kizangh tu hi.

³Tua ahile banghangin na suapuipa mittang sungah ninteak sia mu thei in, noma mittang sungah thingluang sia thupi laak ngawl nu ziam?

⁴Noma mittang sunga, thingluang khat om nginge sia, awlmawk ngawlin na suapuipa munah, ‘Na mittang sungah ninteak sia laaksak tong,’ banghangin ci ngam nu ziam?

⁵No a kihisak minamte awng! Noma mittang sungah thingluang sia la keak phot vun, tua hile na suapuipa mittang sung ninteak sia na laak thei natu in, thiang takin na mu thei tu uh hi.

⁶“A thiangtho nate uite na pia heak vun — amate in noma hong pet kik zaw tu hi. Vokte mai ah na suang manphate na lot heak vun — amate in a peang nuai a siikcil lel tu hi.

⁷“Ngen vun na nga tu uh hi; zong vun na mu tu uh hi; king vun, kongkha hong kihon tu hi.

⁸Banghang ziam cile a ngen pawpo in nga a, a zong khat pawpo in mu a, a king sia kongkha kihon hi.

⁹Pa ahi note khat pawpo, na tate in anluum hong nget uh ciang, suangtum na pia tu uh ziam?

¹⁰Tua ahibuale ngasa hong nget ciang, ngul na pia tu uh ziam?

¹¹Na phat ngawl uh kawm panin na tate atu napha piak tu na he uh hi. Tua ahile, vantung ah na Pa in a ngente tungah naphate bangza in hong pia zaw kan tu ziam?

¹²“Noma tungah hong kivawt le na oai uh bangin, ngual tungah na vawt vun; tuasia in Moses Thukham le kamsaangte hilnate ii a khiakna ahi hi.

¹³“Kongbiang ciak sungah na tum vun, banghang ziam cile hell ngam kongbiang sia zai a, tua mun paina lampi sia tot ol hi, tua lampi a tawn mihing tam mama om hi.

¹⁴Ahihang nuntakna sung tum natu kongbiang sia ciak a, tua mun pai natu lampi sia tot hak hi, tuaciang tua lampi a mu mihing tawm hi.

¹⁵“Leilot kamsaangte na up ngawl natu kidawm vun; amate a puatham ah tuu bangin hong pai tu a, a sungsang uh sia ngia hangsan bang hi tu hi.

¹⁶A ngamtatna uh panin amate na tel tu uh hi. Lingsawl te in, sapitnga ngeingawl a, lingkungte in theipum nga ngeingawl hi.

¹⁷Thingkung ciidamte in a nga pha nga a, ahihang thingkung ngina ngawlte sia a nga pha nga ngawl uh hi.

¹⁸Thingkung ciidamte in, a nga pha ngawl nga thei ngawl a, thingkung ngina ngawlte in a nga pha nga thei ngawl hi.

¹⁹Thingkung khat pawpo a nga a pha buale kiphuk in mei sungah kisep hi.

²⁰Tua ahiciang leilot kamsaangte amate nasepna tung pan na tel thei tu uh hi.

²¹“ ‘Topa, Topa’ hong ci theampo Vantung ngam sungah a tum siat buatu hi, vantung ah ka Pa deina bang a ngamtate bek tum tu hi.

²²Thukhenna Ni hong thet ciang, mihing tam mama te in, ‘Topa, Topa! Na min taw Pathian thuhil in, na min taw doaite tam mama notkeak in, nalamdang tam mama vawt hi ngawl khu ziam?’ ci tu uh hi.

²³Tuasia ciang, ‘Note hong he ngei bong, Ka kung pan taikeak vun, no misiate awng!’ ka ci tu hi.

²⁴“Tua ahikom, kei kammal hite za a, a zaak uh bang a zuite sia suangpi tungah inn sa mihing ciimpa taw kibang hi.

²⁵Nguazu in khuanawl hong sua ciang, tua inn vuipi in nawmngawp hi. Ahihang tua inn suangpi tungah kisa ahikom a puk bua hi.

²⁶“Ahihang kei kammal hite za napi in, a zui ngawlte sia sen tungah inn sa mihing mawmaw pa taw kibang hi.

²⁷Nguazu in, khuanawl suak a, vui in a nawmngawp ciang, tua inn cimhtham hi. Tua in a lauhuai puna ahi hi!”

²⁸Jesus in hi thusonteena a nei zawkciang, mi honpi in ama hilzia lamdang sa uh hi.

²⁹Ama Thukham hil syate taw a kibang bua hi; ama in thuneina taw hil hi.