Read Siyin Chin Mark 1 Bible Online

Mark 1 - Siyin Chin bible

Mark 1

¹Hi thu in Pathian Tapa Jesus Christ Lungdamna Thupha ahi hi.

²Kamsaangpa Isaiah at sa bangin kipan hi. “Pathian in ‘Ka kamtaipa sia na lampi hong honkholsak tu in, na mai ah ka paisak tu hi.’

³Sennealngam sungah mihing khat hong au a, ‘Topa atu in lampi puuakhol vun; ama khualhaw natu in lamzin tang khat vawtsak vun!’ ” ci hi.

⁴Tuabangin John sia sennealngam sungah hong kilak a, ama in thuhil in tuiphum hi. “Na mawna pan kisiik kik vun a, tui kiphum vun, tua hile Pathian in na mawnate hong maisak tu hi,” mipite tungah ci hi.

⁵Judea ngam pan le Jerusalem khua panin John thuson ngai tu in mihing tam mama hong pai uh hi. Amate in a mawnate pualaak uh a, tua zawkciang Jordan Ngun sungah, ama in tuiphum hi.

⁶John in kalaoh mul taw a kitak puan silh a, savun kawngkhau thua in, a anneak sia khaumaw le ngam khuaitui ahi hi.

⁷Mihingte ii munah, ama in, “Kei nung pan hong pai lai tu pa sia kei sangin lianzaw pek hi. Kunin a peangdap khau suut tu zongh in ka kilawm bua hi.

⁸Note sia tui taw tui kong phum hi, ahihang ama in Thaa Thiangtho taw hong baptize tu hi,” ci in taangko hi.

⁹Tua zawk a ngei ngawlin Jesus sia Galilee ngam Nazareth khua panin hong pai a Jordan ah John in tuiphum hi.

¹⁰Tuisung pan Jesus a thaw to po ciangin, van kihong a, Thaa sia ama tungah ngam vakhu bangin hong tuaksuk sia ama in mu hi.

¹¹Vantung panin aw khat nging a, “Nang sia ka it ka Tapa na hi hi. Nang tungah ka lungkim hi,” ci hi.

¹²Thakhatin Thaa in ama sennealngam sungah paisak hi.

¹³Tua munah Satan in ama ni sawmli sung ze et hi. Tua munah ngamsate zongh om a, ahizong, vantunglalangte hong pai in ama hu hi.

¹⁴John thong sungah a kikhum zawkciang, Jesus Galilee ngam ah pai a, Pathian Lungdamna thupha hil hi.

¹⁵“A hun hong tung zo hi, Pathian Ngam hong nai zo hi. Na mawnate uh pan kisiik vun a, Lungdamna Thupha um vun!” ci hi.

¹⁶Jesus Galilee tuili hui ah a va laitakin, ngasa paai mihing nii, Simon le a suapuipa Andrew ngeen taw ngasa manin a om mu hi.

¹⁷Jesus in, “Hong pai tavun, mihing mante kong suaksak tu hi,” ci hi.

¹⁸Thakhatin amate in, a ngeen uh nusia in ama zui uh hi.

¹⁹Ama in mai sangah tawm a pai ciang, Zebedee ii tapate James le John te unau mu hi. Amate a ngeente puua in ngunkuang sungah om uh hi.

²⁰Jesus in a mu po ciangin sam hi; amate in a pa uh Zebedee le a cial sa naseamte ngunkuang sungah nusia in Jesus zui uh hi.

²¹Jesus le a nungzuite Capernaum khua hong theng uh a, Sabbath kik ni ciangin, Jesus in Jew te ii synagogue ah pai in hilna nei tu in kipan hi.

²²A thuhilna a za mihingte in ama thuhil zia lamdang sa uh hi, banghang ziam cile, Thukham hil syate bang hi ngawlin, ama in thuneina taw thuhil hi.

²³Tua zawk hiat ciangin doaivei pasal khat synagogue sungah hong tumin cik-au hi.

²⁴“Nazareth mi Jesus awng, kote bang hong nuammaw ni ziam? Ko hong lalcipsak tu in hi sungah hong pai na hi ziam? Nang akua na hi hunlam hong he khu hi — Nang sia a thiangtho Pathian kamtaipa ni hi,” ci hi.

²⁵Jesus in doai munah, “Pau heak in, pasalpa sung pan hong pusuak ta'n!” ci in thupia hi.

²⁶Doai in pasalpa thing zazaan a, a nging in a cik-au zawkciang pasalpa sung pan pusuak hi.

²⁷Mihingte theampo in lamdang mama sa uh a, “Bangbang thu hi thong ziam? Tu a sia kihilna thak khat ahi ziam? Hisia pa in doaite tungah thunei a, thu a piak ciangin doai in a thu ni hi!” ci in khat le khat kikum uh hi.

²⁸Tuabangin Jesus huvau thupiangte Galilee ngam mun theampo ah manlang takin kizel hi.

²⁹Jesus in a nungzuite taw synagogue nusia in Simon le Andrew te inn ah paisuak uh hi. Nungzui James le John zongh kihel hi.

³⁰Simon sunghnu a ciina in lum a, suuk hi. Jesus hong thet po ciangin, tua thu ama tungah son hi.

³¹Ama in nupinu kungah pai in a khut pan kaito in thosak hi. A ciisa natna thai a, amate zin do hi.

³²Ni tumin nitak hun a thet ciang, mihingte in Jesus kungah, ciinate le doaiveite paipui uh hi.

³³Khuapi sung pan mihing theampo inn mai ah kikhawm uh hi.

³⁴Jesus in natna satna namcin taw a na theampo damsakin, doaivei tam mama a doai nawkeaksak hi. Ama in doaite ii pau tu khaam hi, banghang ziam cile amate in Jesus sia akua ziam ci in he uh hi.

³⁵Zingtuung khuavak ma in, Jesus tho in tua inn nusia hi. Khuapi puasang a ngamkhingna mun khat ah pai in thungen hi.

³⁶Ahihang Simon le a kitholpuite in ama zong tu in pai uh hi.

³⁷Tuaciang ama a mu uh ciangin, “A kuama po in nang hong zong hi,” ci uh hi.

³⁸Ahihang Jesus in, “Hisung kiim le paam khua dangte sung zongh ah ih pai kul tu hi. Tua munte zongh ah thu ka hil kul tu hi, banghang ziam cile, tua nasep ma seam tu in hong pai ka hi hi,” ci hi.

³⁹Tua hi a, ama in Galilee ngam bup synagogue te ah thuhil in doaite not hi.

⁴⁰A lauhuai vun natna vei a nasia mama khat Jesus kungah hong pai a, khupdin in, “Hong damsak nuam po lete hong damsak thei tu ni hi,” ci in hu ngen hi.

⁴¹Jesus in ama khuangai huai sa in, a khut vaan in tham hi. “Hong damsak nuam khi hi, dam ta'n,” ci in zo kik hi.

⁴²Thakhatin pasalpa a natna dam thiang paih hi.

⁴³Tua zawkciang, Jesus in ama nasia tak talin, paisak paih a,

⁴⁴“En in, hi thu kuama munah son heak in. Pai vingveng ta'n a, thiampipa in vealsak ta'n; na thianthona mihing theampo tungah a kilangh natu in, Moses sawl bangin, sangaw biakpiakna vawt ta'n,” ci hi.

⁴⁵Ahihang pasalpa pai in mun theampo ah hi thupiang sia son kawkoai hi. Pasalpa in nasia tak son ahikom Jesus sia khuapi khat pawpo ah, mipite ii mutang in, a tum ngam nawn bua hi. A ngamkhingna munte ah ama om a, mihingte in mun theampo panin ama kung zuan uh hi.