Read Siyin Chin Mark 10 Bible Online

Mark 10 - Siyin Chin bible

Mark 10

¹Tua zawkciang Jesus in tua mun nusia in, Judea ngam ah pai a, Jordan Ngun kaantan hi. Mihonpite hong kikhawm kik a, a hil ngei tawntung sa bangma in amate hil hi.

²Phariseete pawlkhat ama kungah hong pai a, ama aitaa tu in hong kipan uh hi. “Ih Thukham in, pasal khat in a zi a khul tu oai ziam hong son ta'n,” ci uh hi.

³Jesus in thudokna khat taw zo a, “Moses in bang thukham hong pia ziam?” ci hi.

⁴Amate zo kikna pan, “Moses in pasal khat sia a zi a khul natu in, lai pia pole, khul thei hi,” ci uh hi.

⁵Jesus in amate tungah, “Moses in hi bang thukham a at sia banghang ziam cile noma hil zawk a pang ngawl na hi uh hang hi.

⁶Ahihang a kipatciil bitphua hun lai in, laithiangtho ii ci bangin ci leang, ‘Pathian in pa khat le numei khat vawt hi.

⁷‘Tuaciang hi thu hangin, pa khat in a pa le a nu nusia in a zi taw kingawm tu hi.

⁸Tuaciang amate nii sia khat suak tu hi.’ Tua ahikom amate nii hi nawn ngawlin, khat ahi hi.

⁹Tua hi a, Pathian ii ngawmsa sia kuama in khen heak hen,” ci hi.

¹⁰Inn sungah amate a sungtan zawkciang a nungzuite in hi thu huvau dongh uh hi.

¹¹ Amate munah, “Pasal khat a zi khul a, zi dang khat a nei sia in, a zi tungah nupa kipalngul mawna vawt ahi hi.

¹²Tuasia bangma in, numei khat in a pasal khulin, pasal dang a nei le, nupa kipalngul mawna vawt ahi hi,” ci hi.

¹³Mihing pawlkhat in patangte tungah Jesus ii khut a ngaksak tu dei in, ama kungah hong paipui uh hi, ahihang nungzuite in amate teih uh hi.

¹⁴Jesus in hi bang a ngamtat uh a mu ciangin, thin uuk a amate tungah, “Patangte ka kungah hong pai tahen, khaam heak vun, banghang ziam cile Pathian Ngam sia hi bangte atu ahi hi.

¹⁵A tatakin kong ci ciang, patangno khat ii saan bangin Pathian Ngam a saang ngawl peuma in, tuasung ah a tum thei buatu hi.”

¹⁶Tua zawkciang patangnote, a khut taw toai in, khat sim tungah a khut nga a, thupha pia hi.

¹⁷Jesus ding tu in a kipat kik ciangin, pasal khat hong tai a, ama mai ah khupdin in, “Sya pha awng, tawntung nuntakna ka nga natu in bang ka vawt tu ziam?” ci in dongh hi.

¹⁸“Pathian khat bek simngawl, a pha kuama om ngawl hi. Banghangin kei pha hong ci ni ziam?,” ci in Jesus in dongh hi.

¹⁹“Thupiakte na heak hi a: ‘Mihing that heak in; palngul mawna vawt heak in; nguta heak in; leilot thu taw ngual suanhkhial heak in; ngualtheam heak in; na pa le na nu zakta in,’ ” ci hi.

²⁰“Syapa awng, ka no lai mama panin, hi thupiakte ka zui siat zo hi,” pasalpa in ci hi.

²¹Jesus in ama itna taw en in, “Na kisap khat bek om lai hi. Va pai ta'n a na neisa theampo zuakin, na sum nga teng mizawngte pia ta'n; tuasia ciang vantung ah hauna na nei tu hi; tua zawkciang hong pai ta'n a, ka nung hong zui ta'n,” ci hi.

²²Pasalpa in hi thu a zaak ciangin a maikhing a, khuangai in a paisan hi, banghang ziam cile ama hau mama hi.

²³Jesus in a nungzuite en kawkoai a, amate munah, “Sumhaute Pathian Ngam sungah a tum tu sia, bangza in haksa tu ziam!” ci hi.

²⁴Nungzuite in hi kammalte lamdang mama sa uh hi, ahihang Jesus in, “Ka tate awng, Pathian Ngam sungah tum tu, bangza in haksa ziam!

²⁵Sumhau khat ii Pathian Ngamsung a tum tu sia, kalaoh khat ii phin bilvang sungah a tum tu sangin haksa zaw hi,” ci lai hi.

²⁶Hi bang a ci ciang, nungzuite lungmang seseam a, khat le khat in, “Tua ahile akua ngupna nga thei tu ziam?” kici uh hi.

²⁷Jesus in amate tangtan in en a, “Mihingte atu hi sia suak thei ngawl hi, ahihang Pathian atu in suak maw ngawl hi. Pathian atu in na theampo suak thei hi,” ci hi.

²⁸Tuasia ciang Peter in, “En in, kote in na theampo nusia in, nangma hong zui khu hi,” ci hi.

²⁹Jesus in, “Hi hi, khat pawpo in inn ahizong, suapuipate ahizong, suapuinumeite ahizong, nu, pa, tate le lote ahizong, kei hang le lungdamna thu hangin a nusia le,

³⁰ama in hi khang hun sungah a tamzaw lai nga tu hi. Ama in innte, suapuipate, suapuinumeite, nu, pa, tate le lote a zaa zakhat tamzaw in nga tu hi, vawtsiatna zongh thuak tu hi, tuaciang hong pai pheang tu hun sungah tawntung nuntakna nga tu hi.

³¹Ahihang tu laitak a masa ahi mihing tam mamate sia a khak hi tu a, tu laitak a khakte sia a masa hi tu hi,” ci hi.

³²Jesus le a nungzuite Jerusalem zuanin pai uh hi. Jesus in a patau a nungzuite mai ah paikhol hi; a nung pan a zui mihingte zongh lau uh hi. Khatvei ma Jesus in a nungzui sawm le niite sam tuam a, ama tungah a piang tu thute son hi.

³³“Ngai vun, ei teng Jerusalem ah ih pai tu a, tua munah Mihing Tapa sia thiampi liante le Thukham hil syate tungah ngual in aap tu hi. Amate in thidaan pia tu a, tua zawkciangin Gentile te khut sungah ki aap tu hi,

³⁴tua mite in ama selno in, cilphii tu a, vel in thatlum tu uh hi; ahihang ni thum zawkciang ama nuntakna sungah tho kik tu hi,” ci hi.

³⁵Tua zawkciang Zebedee tate ahi James le John sia Jesus kungah hong pai hi. “Syapa awng, ko atu hong vawtsak lete kong oai uh thu khat om hi,” ci uh hi.

³⁶“Bang ziam?” ci in Jesus in dongh hi.

³⁷“Na minthanna Ngamsung na kumpi tokhum tungah na to ciangin, ko zongh na ziatsang ah khat, na veisang ah khat, nong tosak tu ka uuk uh hi,” ci hi.

³⁸Jesus in amate munah, “Nong nget uh sia bang ziam ci in na tel bua uh hi. Ngim thuakna hai ka dawn tu sia dawn thei natu nu ziam? Kei ii ki baptize bangin, no zongh ki baptize thei natu nu ziam?” ci hi.

³⁹“Hi thei tu khu hi,” ci in zo kik uh hi. Jesus in, “Hai ka dawn tu sia no zongh dawn takpi tu nu hi, ka ki baptize bang keak ma in, no zongh ki baptize tu nu hi.

⁴⁰Ahihang ka ziatsang le ka veisang a to tute sia, kei in teal thei natu thu ka nei bua hi. Hi munte sia ama puuakholsak te atu in, Pathian in pia tu hi,” ci hi.

⁴¹A nungzui dang sawmte in, hi thu huvau a zaak ciangin, James le John tungah thin uuk uh hi.

⁴²Tua ahikom, Jesus in amate theampo samin, “Pathian he ngawlte a ukte hi a kici mihingte in a mite tungah vaangnei a, a lampuite in thuneina a cingin nei hi, ci in na he uh hi.

⁴³Ahihang no sungah hi bang hi ngawl tu hi. Khat po in a lian tu a uuk uh le, a dang teng ii naseampa hi tu hi;

⁴⁴no sung pan khat in lampui a uuk le, ama sia a dang theampo ii salpa hi tu hi.

⁴⁵Banghang ziam cile Mihing Tapa ngawngawn zongh, ngual in ama na a sepsak tu in hong pai bua hi; ngual atu a seam tu le, a nuntakna pia in, mihing tam mama tan tu in hong pai hi,” ci hi.

⁴⁶Amate Jericho khua hong theng a, tuaciangin Jesus sia a nungzuite le mihonpi khat taw a din kik uh ciangin, lamhui ah Timaeus ii tapa mittaw khutdaw ngen Bartimaeus a kici khat to hi.

⁴⁷Ama in Nazareth mi Jesus hong pai ci in a zaak ciangin, “David Tapa Jesus awng; kei hong hesuak ta'n!” ci in au hi.

⁴⁸Mipite sung pan pawlkhat in teih in, a thim natu in, sawl uh hi. Ahihang ama in awnging seseam in au a, “David Tapa Jesus awng, Kei hong hesuak ta'n,” ci hi.

⁴⁹Jesus tawlnga a, “Na sam tavun,” ci hi. Tua ahikom amate in mittawpa sam hi. “Lungdam in! Ama in hong sam hi, ding in,” ci uh hi.

⁵⁰Ama in a puantual suutin, vawk a, lawp takin Jesus kungah pai hi.

⁵¹Jesus in, “Nang atu bang hong vawtsak lengh, na nuam ziam?” ci in dongh hi. “Syapa awng, khuamu thei kik nuam khi hi,” ci in zo kik hi.

⁵²“Va pai ta'n, na upna in hong damsak zo hi,” Jesus in ci hi. Thakhatin ama khuamu thei a, tuaciang Jesus zui in pai hi.