Read Siyin Chin Mark 11 Bible Online

Mark 11 - Siyin Chin bible

Mark 11

¹Amate Jerusalem hong nai ciang, Bethphage le Bethany khuapite taw a kinai, Olive Mual ah theng uh hi. Jesus in nungzuite nii sia mai ah pai kholsak a,

²hi bangin sawl hi: “Na mai a khuano sia ah pai tavun. Tua mun na thet po uh ciang, bangma hun a tung a kito ngeingawl laano khat kikhit in, om na mu tu uh hi. A khau suut tavun a, hi sungah hong paipui tavun.

³Tuaciang khat po in banghangin tuabang hi nu ziam hong cile, Topa in tuulmaw hi, hong puak kik paih tu hi, na ci vun,” ci hi.

⁴Tua ahikom amate pai a, laano sia khua sung lampi tung, inn khat ii kongkha khuam tungah kikhit in om mu uh hi. Amate in khau a suut uh ciangin,

⁵a hui ah a dingte in, “Tua laano khau na suut uh sia bang tu ci nu ziam?” ci uh hi.

⁶Amate in Jesus ii sawl bangin zo uh a, tuasia ciangin tuate in paisak uh hi.

⁷Amate in laano sia Jesus kungah hong paipui uh a, a puantual uh tua nganno tungah pha in, Jesus a tungah to hi.

⁸Mihing tam mamate in a puantualte lampi tungah pha uh hi, a dangte in lo sung pan thingsawl saattan in lampi tungah pha uh hi.

⁹A mai ah a paite le a nung pan a zuite in, hi bangin au uh hi, “Hosanna, Pathian pok vun. Topa Pathian min taw hong pai pa sia Pathian in thupha pia tahen!

¹⁰Hong tung tu ih pa David Kumpipa ngam Pathian in thupha pia tahen, Hosanna, Pathian pok vun!” ci uh hi.

¹¹Jesus Jerusalem khua theng a, Biakinn sungah tumin, na theampo enkot hi. Ahihang ni niam zo ahikom, a nungzui sawm le niite taw Bethany khua ah pai uh hi.

¹²A zing ciang, amate Bethany pan hong heak kik ciang Jesus a ngilkial hi.

¹³A ngalkhat ah theikung khat a tee puitung mama in mu hi, tua ahikom theinga khat po a om ziam ci in en tu in pai hi. Ahihang a kung a thet ciangin, theitee bek mu hi, banghang ziam cile a nga hun ahi bua hi.

¹⁴Jesus in, “Nang tung pan kuama in theinga ne nawn heak tahen!” ci hi. A nungzuite in a pau teng za uh hi.

¹⁵Amate Jerusalem a thet ciangin, Jesus in Biakinn ah pai in vanh lei vanh zuak theampo notkeak siat hi. Ama in sum theakte ii sabuaite le vakhu zuakte tokhumte sawnthal hi,

¹⁶tuasia ciang ama in kuama vanh pua in, Biakinn leitual kaantan in a pai tu a oai bua hi.

¹⁷Mihingte hi bangin hil hi: “ ‘Ka innpi sia minam theampo atu in thungetna inn kici tu hi,’ ci in Pathian in a sonna Laithiangtho sungah ki at hi ngawl ziam? Ahizong note in, ngutate bukna phual na suaksak uh hi!” ci hi.

¹⁸Thiampi liante le Thukham hil syate in, hi thu za uh a, tua hu in, Jesus a thalup thei natu lampi zong tu in, kipan uh hi. Amate in Jesus kiita uh hi, banghang ziam cile mipite in ama ii hilna sia lamdang a sa uh hi.

¹⁹Nitak sang ciangin Jesus le a nungzuite in khuapi nusia uh hi.

²⁰A zingsang ciang zingtuungin, lampi zui a, a pai uh ciang, amate in theikung a mu uh hi. Tuasia in a zung dongin thisuk hi.

²¹Peter in bang thu om ci in ciamtee ahikom Jesus munah, “En in, syapa awng, theikung na haamsiat sia thi zo hi!” ci hi.

²²Jesus in amate munah, “Pathian um vun.

²³A tatakin ka ci ciang, khat po in hi mual munah, tho in tuipi sungah kisep in ci in sawl hen a, a thinsung ah lungmang ngawlin a ci sa teng bang piang tu hi ci in a um takpi le, a up bangin piang tu hi.

²⁴Hi thu hangin a tatakin kong ci ciangin: Thu na nget uh ciang, bang khat po na ngen uh le a nga sa bangin kingaisun vun, tua hile na nget uh po hong kipia tu hi.

²⁵Thungenin na din uh ciang, khat po tungah diksak ngawlna na nei uh le, maisak tavun,

²⁶tua hile vantung a om na pa in, no ii mawna zongh hong maisak tu hi,” ci in zo kik hi.

²⁷Amate Jerusalem ah khatvei ma hong theng kik hi. Jesus Biakinn sungah a va laitakin, thiampi liante, Thukham hil syate le upate ama kungah hong pai a,

²⁸“Hi bangte na vawt natu in bang thu nei ni ziam? Akua in tua thuneina hong pia ziam?” ci in dongh uh hi.

²⁹Jesus in zo kik a, “Kei zongh thu khat kong dongh tu hi, nong zo thei uh le hite vawt natu bang thunei khi ziam, ci in kong son tu hi.

³⁰Tua ahile John ii tuiphum piak theina sia Pathian kung pan hong pai ziam maw: mihing kung pan hong pai ziam? hong son tavun,” ci hi.

³¹Amate sung teng kinial tu in hong kipan uh a, “Bang ci tu hi ziam? ‘Pathian kung pan hi’ ci leang, tua ahile ‘Banghangin John um ngawl nu ziam?’ hong ci tu hi.

³²Ahihang ‘Mihing tung pan hi’ ci leang…’ ” ( Amate in mipite kiita hi, banghang ziam cile John sia a kuama po in kamsaang khat hi ci in um tek uh hi.)

³³Tua ahikom amate in Jesus munah, “He ngawl khu hi,” ci uh hi. “Tua ahile kei zongh, bang thu taw hi nate vawt khi ziam ci sia hong son ngawl tu khi hi,” Jesus in ci hi.