Read Siyin Chin Mark 15 Bible Online

Mark 15 - Siyin Chin bible

Mark 15

¹Zingsang tuungin thiampi liante sia upate, Thukham hil syate le Council bup taw a manlang in hong kisitua uh a, amate in vaihawmna nei uh hi. Amate in Jesus thikkhau taw khi uh a, Pilate kungah paipui in aap uh hi.

²Pilate in, “Nang, Jew te ii kumpipa na hi ziam?” ci in dongh hi. Jesus in, “Nangma ci bang ahi hi,” ci in zo hi.

³Thiampi liante in Jesus mawsiatna hau mama uh hi.

⁴Tua ahikom Pilate in, “Amate kam zo ngawl tu ni ziam? Hong mawsaknate theampo ngai in,” ci kik hi.

⁵Jesus in kammal khat zongh zo tuan ngawl ahikom Pilate in lamdang sa hi.

⁶Paisan Poai kivawt simin mihingte ii nget thongtaak khat pawpo Pilate ii suataksak thei ngeina khat om hi.

⁷Tua hun laitakin kumpi leedona a vawt tualthat thongtaak te sungah Barabbas a kici khat zongh om hi.

⁸Mihonpite hong kikhawm a, Pilate tungah a vawt ngei bang a vawt natu ngen tu in hong kipat uh ciangin,

⁹ama in, “Jew te kumpipa sia suatak leng, hong oai zaw nu ziam?” ci in dongh hi.

¹⁰Thiampi liante in Jesus a een na hangin, ama tungah a aap uh hunlam thiangtel mama hi.

¹¹Ahihang thiampi liante in mihonpite hol a, Pilate in Barabbas a suataksak zawk natu ngensak uh hi.

¹²Pilate in mihonpite munah, “Tua ahile Jew te kumpipa na ci uh sia bang law leng hong oai nu ziam?” ci hi.

¹³Amate in, “Thinglamtee tungah thatlum in!” ci in au uh hi.

¹⁴“Ahihang ama in bang khialna nei ziam?” ci in Pilate in dongh hi. Amate in “Thinglamtee tungah thatlum in!” ci in a nging seseam in au uh hi.

¹⁵Pilate in mihonpite lungkimsak nuam ahikom Barabbas tha hi. Tua zawkciangin Jesus velsak a thinglamtee tungah thalup tu in aap hi.

¹⁶Ngalkapte in Jesus sia ngamuk mangpa leitual sumsung sangah paipui a, ngualdang theampo zongh sam uh hi.

¹⁷Amate in puantual sandup khat Jesus in silhsak a, lingngui taw a kivawt kumpilukhu khat a lu tungah khusak uh hi.

¹⁸Tua zawkciang amate in, “Jew te kumpipa a khansau tahen!” ci in zatakna kipia theamsak uh hi.

¹⁹Amate in a lu pan saat a, cilphii in a mai ah a zakta bang keakin khupdin in, kun uh hi.

²⁰A selnona uh teng a man zawkciang puantual sandup sia ama tung pan suutin, ama puansilh ngei teng silhsak kik uh hi. Tua zawkciang thinglamtee tungah thalup tu in paipui uh hi.

²¹Ngamsung pan khuapi sungah hong pai Simon a kici pasal khat taw lampi ah kisi a, ngalkapte in ama sia zawthawk thu taw Jesus ii thinglamtee puasak uh hi. (Tua Simon sia Cyrene pan hi a, Alexander le Rufuste ii pa ahi hi.)

²²Amate in Jesus sia Golgotha a kici munah paipui uh hi. Tua mun ii a min sia “Lungu Mun” cina hi.

²³Tua munah amate in Jesus sia sapittui le myrrh a kici zatui nam khat a hel sia tul tu in, kipan uh hi. Ahihang ama in a dawn nuam bua hi.

²⁴Tuaciangin ama thinglamtee tungah kilh a, a puansilh teng a koisia akua in nga tu ci in aisaanna taw a et zawk uh ciang hawm uh hi.

²⁵Thinglamtee tungah a kilh hunin zingsang nai kua saat hi.

²⁶“Jew te Kumpipa” hi ci in a kimawsakna lai ki at hi.

²⁷Amate in ngualsuam phalakte nii zongh thinglamtee khat veve tungah kilh uh a, khat sia Jesus ii ziatsang, khat sia a veisang ah kilh uh hi.

²⁸(Laithiangtho sungah ‘Ama in leitung thukham paltante thuak bangin thuak hi,’ a ci teng a taangtun natu ahi hi.)

²⁹Tua mun kaantan in a pai mihingte in, lupei san in nunau zazaan uh hi. “Heii! Biakinnpi baltham in ni thum sung ka sa kik thei tu ci ni hi.

³⁰Tu in thinglamtee tung pan hong tuaksuk ta'n a, nangma le nangma kihun in!” ci uh hi.

³¹Tuabang ma in, thiampi liante le Thukham hil syate in Jesus selno zazaan uh a, amate khat le khat hi bangin kici uh hi. “Ngualdang hun hi ve ahihang ama le ama kihun thei ngawl hi!

³²Israel Kumpipa Messiah thinglamtee tung pan hong tuaksuk thei ziam maw en sin tawng, tua hile ama um vak hing!” ci uh hi. Tuaciang in Jesus taw thinglamtee tung a kikilh te nii zongh in Jesus nunau zazaan uh hi.

³³Nisun laitakin ngam bup khuazing in tuam cip a, nai thum sung khuazing hi.

³⁴Nai thum sa ciangin Jesus in a nging tatakin au a, “Eloi, Eloi, lema sabachthani?” ci hi. A khiakna sia, “Ka Pathian, ka Pathian awng, banghangin hong nusia ni ziam?” ci na ahi hi.

³⁵Tua munah mihing pawlkhat a omte in ama auna za a, “Ngai vun, ama in Elijah sam hi!” ci uh hi.

³⁶Amate sung pan khat in puansia khat la in, sapittui haau sungah a pap zawkciang, ciangkang dawn ah sawm hi. Tuaciang Jesus ii muk ah taa in, “Om zii tawng! Elijah sia thinglamtee tung panin ama suut tu in hong pai le hong pai ngawl en lai tawng!” ci hi.

³⁷Jesus in nging takin au in, thi hi.

³⁸Biakinn sungah kidoina puankhak sia a lu pan a taw dong khen nii kisua in kizen suk hi.

³⁹Tua mun thinglamtee mai ah a ding ngalkap hon ukpa in, Jesus thi zia mu hi. “Hi mipa sia Pathian Tapa takpi hi!” ci hi.

⁴⁰Numei pawlkhat tua munah om a, a khuala thithimna mun khat pan en uh hi. Amate sungah a kihel teng sia Mary Magdalene, a khangmoi zaw James le Joseph nu Mary le Salome te ahi uh hi.

⁴¹Amate in Galilee ngam ah Jesus a om lai in zui uh a, a hu tawntung te ahi uh hi. Ama taw Jerusalem khua a hong paikhawm numei dang tam mama zongh om uh hi.

⁴²Nitak ciangin Arimathea mi Joseph hong theng hi. Ama sia Council sungah a kizakta upa khat hi a, Pathian Ngam hong thet tu a ngakpa khat ahi hi. Tua ni sia kingin ni hi (Sabbath ma ni khat) tua ahikom Joseph in Pilate kungah hang takin pai a Jesus ii luang ngen hi.

⁴³

⁴⁴Jesus thi zo hi ci a zaak ciangin, Pilate in lamdang sa hi. Ama in ngalkap hon ukpa sam a, Jesus a thi zawk a ngei zo ziam ci in dongh hi.

⁴⁵Ngalkap mangpa ii thu kona teng a zaak zawkciangin, Pilate in Joseph tungah Jesus luang pia hi.

⁴⁶Joseph in puankaang neal khat lei a, a luang la suk in, tua pua taw tunin, suangpi a kikhuak thaan khat sungah sial hi. Tua zawkciang ama in thaan kongvang ah suangtum pui khat taw khak hi.

⁴⁷Mary Magdalene le Joseph nu Mary in ngakin en a, Jesus luang koina mu uh hi.