Read Siyin Chin Mark 16 Bible Online

Mark 16 - Siyin Chin bible

Mark 16

¹Sabbath ni bo zawkciangin, Mary Magdalene, James ii nu Mary le Salome in Jesus luang a zut natu in hel namtuite keng uh hi.

²Nipi ni zingtuung, nisua ciangin, amate thaan ah pai uh hi.

³Lampi ah khat le khat hi bangin a kikum uh hi, “Thaan kong panin akua in suangtumpui sia hong liik keaksak tu ziam?” (A suangtum sia lian mama hi.) Tuaciangin amate in a etto uh ciangin a suangtum sia a kiliik sa in om mu uh hi.

⁵Tuabangin amate thaan sungah tum uh hi, tua munah tangval khangmoi khat a ziatsang ah to in a na om a, puantual kaang khat silh hi, tuaciangin amate lau mama uh hi.

⁶“Lau heak vun. Thinglamtee tungah a kithat Nazareth mi Jesus, zong na hi uh kong he hi. Ama hi sungah om ngawl a — tho kik zo hi! En vun, ama kisialna mun hi sung ahi hi.

⁷Tu in Peter pan kipan a nungzuite munah hi thu puak tavun: ‘Ama note mai Galilee ah paikhol zo hi; tua munah ama ii hong son ngei bangin, na mu tu uh hi,’ ” ci hi.

⁸Tua ahikom amate in lungmang patau in thaan sung pan, pusuak in tai uh hi. Amate in lau ahikom, kuama munah, bangma a son bua uh hi. [

⁹Nipi ni zingtuungin Jesus thina pan a thaw kik zawkciang, a masa phitbel in Mary Magdalene tungah ama kilak hi, tua numei nu sung pan doaite sali Jesus in a hawlkeaksak ngei hi.

¹⁰Ama pai in Topa kitholpuite munah son hi. Amate kapin, tau in om uh hi.

¹¹Jesus nungta a, ama tungah kilak hi ci in numeinu ii son ciangin, amate in a um bua uh hi.

¹²Hisia zawkciang, nungzuite nii ngamsung a pai laitakin Jesus sia a nam tuatuamin kilak hi.

¹³Amate heak kikin, nungzui dangte munah a son uh hangin amate in a um bua uh hi.

¹⁴A khakbel in, Jesus sia nungzui sawm le khat te anneak laitakin kilak hi. Jesus in amate teih hi, banghang ziam cile amate in upna nei ngawl a, a thin uh pui ahikom, a nuntak kik a mute ii thu son a um zo bua uh hi.

¹⁵Ama in, “Leitung mun theampo ah pai tavun a, mihing theampo tungah lungdamna thu hil tavun.

¹⁶Akua po ahizong um in, tui a kiphumte kingum tu hi, a um ngawlte ahile puavawkna thuak tu hi.

¹⁷Thu umte nalamdang vawt thei natu vaang kipia tu hi; amate in keima min taw doaite a not tu uh hi; amate kam tumdangin pau tu uh hi;

¹⁸ngulte zamhin nguu khat pawpo a ne zongin, bangma tat ngawl tu hi; amate in ciinate tungah a khut uh nga tu a, ciinate dam tu hi,” ci hi.

¹⁹Topa in amate taw thu a son zawkciang, ama sia vantung ah kila to in Pathianziatsang ah to hi.

²⁰Nungzuite mun theampo ah pai in, thuhil uh hi, tuaciang Topa in amate taw naseam khawm a, amate thuhilnate sia maan hi ci in a kilak natu in, nalamdang laknate vawtsak thei hi.] THUKHUPNA LUI A DANGKHAT [Numeite in Peter le a lawmte kungah pai a, amate tungah a kison thute a tom in sonsawn uh hi. Hisia zawkciang, Jesus ama mama in, nungzuite tungtawnin, nisuana pan nitumna ah, a thiangtho, a hing top, tawntung ngupna thu puak hi.]