Read Siyin Chin Mark 2 Bible Online

Mark 2 - Siyin Chin bible

Mark 2

¹Ni tam kihal ngawlin Jesus Capernaum khua ah pai kik hi, tuaciang ama inn ah om hi, ci in kiza hi.

²Tua ahikom mihing tam mama hong kikhawmtua uh a, om natu mun awng zongh om nawn ngawl liangin kongbiang puasia dongin dim uh hi. Jesus in thu a hihil laitakin,

³pasal li hong theng a, Jesus kungah pumzaw pasal khat puak hi.

⁴Ahizong mihonpite hu in ciina sia Jesus kung tatak a then zo bua uh hi. Tua ahikom amate in Jesus omna san innkhum sulet uh a, pasalpa phah tungah lumsakin, innkhum a sukletna panin khiasuk uh hi.

⁵Amate in bangza in upna nei ci sia Jesus in a mu ciang, pumzaw pa munah, “Ka tapa awng, na mawnate hong kimaisak zo hi,” ci hi.

⁶Tua munah a to Thukham hil syate in,

⁷“Banghangin hi bangin pau ngam ziam? Hisia in Pathian min daisakna hi. Pathian bekma in mawnate maisak thei hi!” ci in ngaisun hi.

⁸Thakhatin Jesus in amate ngaisutna teng tel ahikom, “Banghang tuabangin ngaisun nu ziam?

⁹Hi pumzaw pa tungah ‘Na mawnate hong kimaisak zo hi’ cile, ‘Tho in, na phah luakin lampai in,’ ci koisia ol zaw ziam?

¹⁰Tua ahibuale Mihing Tapa in leitung mawmaisak theina nei hi, ci in no tungah lak tu khi hi,” ci in pumzaw pa munah,

¹¹“Tho in, na phah luakin cia ta'n, hong ci khi hi!” ci hi.

¹²Amate mu tangin pasalpa tho a, a phah luakin cia vingveng hi. Amate in lamdang sa mama in, Pathian pok uh hi. “Hi bang peuma mu ngei bua hing!” ci uh hi.

¹³Jesus Galilee tuili hui ah pai kik hi. Mihon khat ama kungah hong pai hi, tuasia ciangin amate thuhil tu in kipan hi.

¹⁴A pai kawkawm in, Alphaeus ii tapa Levi kici shiadongpa a zum sungah to in a om mu hi. “Hong zui ta'n” ci hi. Levi zongh ding vangiat in zui hi.

¹⁵Tua zawkciang Levi ii inn ah Jesus in an ne hi. Shiadongte honkhat le a dang a kinialnamhte pawlkhat in, Jesus zui a, Jesus le a nungzuite taw an nekhawm uh hi.

¹⁶Pharisee a kici Thukham hil syate in, Jesus shiadongte le a kinialnamhte taw an nekhawm in om a mu uh ciangin, “Banghangin ama in mihing tuabangte taw an nekhawm ziam?” ci in dongh uh hi.

¹⁷Jesus in amate thu kidok za a, “Mihing ciidamte in syavuan tulmaw ngawl a, ciinate bek in syavuan tulmaw uh hi. Mihing zatakhuaite sam tu in kong pai bua a, a kinialnamhte sam tu in kong pai hi,” ci hi.

¹⁸Hun khat lai in, Tuiphumpa John ii nungzuite le Phariseete an tang uh hi. Mihing pawlkhat Jesus kungah hong pai a, “Banghangin Tuiphumpa John nungzuite le Phariseete nungzuite in an tang a, na nungzuite in, banghangin an tang ngawl ziam?” ci in Jesus dongh uh hi.

¹⁹Jesus in, “Mopoai an kivaakna sungah leangnate in an ne ngawlin om tu na um uh ziam? Om ngawl tu hi! Zineipa sia amate taw a omkhop laiteng amate in tuabang a ngamta buatu hi.

²⁰Ahihang ni khat ni ciangin zineipa sia amate kung pan hong kila tu a, tuasia ciangin an tang tu hi,” ci in zo kik hi.

²¹“Kuama in puan lui ek sa sia puan thak taw phaw ngeingawl hi, banghang ziam cile puan thak sia a ton ciangin a lui sia ekkeak tu a, a vang zaisak seseam tu hi.

²²Tuasia bangma savun thawl lui sungah sapittui thak kuama in thaal ngeingawl hi, banghang ziam cile sapittui thak sia in savun thawl lui sia saantham tu a, a sapittui le a thawl lalcip tu hi. Sapittui thak sia savun thawl thak sungah thaal tu hi zaw hi,” ci hi.

²³Jesus sia Sabbath ni khat zungtaang lo pawlkhat kaantan in pai hi. A nungzuite zongh ama taw kithawl a, zungtaang huite hiat tu in kipan uh hi.

²⁴Tuasia ciang Phariseete in Jesus munah, “En in, Sabbath ni na nungzuite ii zia bang a ngamtat tu sia ih thukham in khaam hi,” ci uh hi.

²⁵Jesus in, “David in bang khat po a neak tu a kisap mama hun laitakin, a ngamtatna sim ngeingawl nu ziam? Ama le a mite a ngilkial hi.

²⁶Tua ahikom Pathian inn sungah tumin Pathian a kipiasa anluum ne hi. Tua hun laitak sia Abiathar in Thiampi Lianbel a sep laitak hi. Ih Thukham bangin ci leang thiampite bek in hi anluum a neak thei natu ahi hi, ahihang David in ne a, a mite zongh pia hi,” ci in zo kik hi.

²⁷A thukhupna ah Jesus in, “Sabbath sia mihingte ii phat natu in a kivawt hi a, mihing sia Sabbath atu a kivawt a hi bua hi.

²⁸Tua hi a, Mihing Tapa sia Sabbath ngawngawn ii Topa ahi hi,” ci hi.