Read Siyin Chin Mark 3 Bible Online

Mark 3 - Siyin Chin bible

Mark 3

¹Tua zawkciang Jesus in Jew te synagogue ah pai a, tua munah khut langkhatzaw pasal khat om hi.

²Jesus ngamtat khial tu a encik mihing pawlkhat tua munah om ahikom Sabbath ni in, Jesus in ciina damsak ziam, a damsak bua ziam, ci in encik nginge uh hi.

³Jesus in pasalpa munah, “Hi sung mai sangah hong pai ta'n,” ci hi.

⁴Tua zawkciang mipite munah, “Ih Thukham in Sabbath ni in, bang teng sep tu hong oai ziam? Ngual hu tu ziam maw ngual ngim pia tu ziam? Mihing khat ii nuntakna hun tu ziam maw that tu ziam?,” ci in dongh hi. Ahihang amate kam khat zongh a pau bua uh hi.

⁵A kiimkot a et ciangin, Jesus in amate tungah thin uuk ahitazong hesuakhuai sa si hi, banghang ziam cile amate a thin uh pui mama a, a ngaisutna uh zongh maan ngawl hi. Tua zawkciang pasalpa munah, “Na khut vaan in,” ci hi. Ama in a khut vaan a, a khut dam kik hi.

⁶Tua ahikom Phariseete sia synagogue nusia in thakhatin Herod pawlte pawlkhat taw kisi uh a, Jesus thalup tu in, vaihawmna nei uh hi.

⁷Jesus le a nungzuite Galilee tuili sangah pai uh a, mihonpi in zui hi. Amate in Galilee, Judea,

⁸Jerusalem, Idumea ngam, Jordan ngun nisuana sang ngam, Tyre le Sidon khuapite kiim le paam ngamte panin hong pai hi. Hi mite theampo sia Jesus sep le vawt teng a zaak hu in, Jesus kungah hong pai uh hi.

⁹Mihing tam mama a, ama a kihencip thak ngawl natu in nungzuite munah ngunkuang khat zongin sawl hi.

¹⁰Ama in mihing tam mama damsak hi, tuaciang natna nei peuma in ama tham tu in kiphul ngawp uh hi.

¹¹Thaa ngilo vei mihingte in a mu uh ciangin, amate mai ah puk in, cik-au uh a, “Nang sia Pathian Tapa ni hi” ci hi.

¹²Ama sia akua ahi hunlam kuama tungah a son ngawl natu in, thaa ngilote munah Jesus in nasia takin thupia hi.

¹³Tua zawkciang Jesus in mualtung khat ah kaato in, ama dei teng a kungah samtuam hi. A kungah amate in zuan a,

¹⁴tuaciangin ama in sawm le nii tealin, sawltakte ci in min vaw hi. “Kei taw a omkhawm tu in, no teng hong teal zo khi hi, thuhil tu zongin kong paisak tu a,

¹⁵doaite nawkeak natu thu na nei tu uh hi,” ci hi.

¹⁶Sawm le nii a teal teng sia hi teng ahi hi, Simon (Jesus in Peter ci in min a piak sia),

¹⁷Zebedee tapate unau James le John, (Jesus in min pia a, Boanerges ci, a khiakna, “Vanto mihingte”);

¹⁸Andrew, Philip, Bartholomew, Matthew, Thomas, Alphaeus ii tapa James, Thaddaeus, Minam itpa Simon,

¹⁹le Jesus a leeheakpa Judas Iscariot te ahi hi.

²⁰Tua zawkciangin Jesus inn ah cia hi. Mipi hong kikhawm leleau ahikom Jesus le a nungzuite in anneak hun tu a nga bua uh hi.

²¹A innkuanpuite in a zaak uh ciangin ama keam tu in hong pai uh hi, banghang ziam cile mihingte in, “Ama a thin amh zo hi,” ci uh hi.

²²Jerusalem pan hong pai thukhamhil sya pawlkhatte in, “Ama sungah Beelzebul om hi!” ci uh hi. “Tuasia doaite sung pan a lianbel sia hi, ama tungah doai nawkeak thei natu vaang a pia sia pa hi,” ci uh hi.

²³Tua ahikom Jesus in amate a kungah samin, thusonteena taw amate tungah son hi. “Satan in bangbangin Satan notkeak thei tu ziam?

²⁴Ngam khat sia pawl tuatuamin kikhen hen a, khat le khat kido le tua ngam tamhtham tu hi.

²⁵Innkuan khat pawl tuatuamin kikhenin, pawlkhat le pawlkhat kido le tua innkuan sia kitamhtham tu hi.

²⁶Tua hi a Satan ngam sia pawltuamin kikhen le, kip ngeingawl tu a, tamhtham in bocip tu hi.

²⁷“Thahatpa, a kiletheen phot mateng kuama in a inn phuul zo ngawl tu hi. Tua zawkciang bekma in phuul thei pheang tu hi.

²⁸“A tatak ka ci ciang, mihingte sia a mawnate le a sia a paunate uh pan kimaisak thei hi.

²⁹Ahihang Thaa Thiangtho a sonsiate sia, kimaisak ngeingawl tu hi, banghang ziam cile ama in tawntung mawna vawt ahi hi,” Jesus in ci hi.

³⁰(Tuabang a ci sia banghang ziam cile mihing pawlkhat in, “Ama sia thaa ngilo vei hi,” a ci uh hang hi.)

³¹Tua zawkciangin Jesus nu le a suapuipate hong theng uh hi. Amate in doipua ah dingin, ama taw kimu tu in samsak hi.

³²Jesus kiim ah a to mihonte in, “En in, na nu le na suapuipate le na suapuinute in inn pua panin hong ngak a nangma taw kimu nuam hi,” ci uh hi.

³³Jesus in, “Ka nu akua ziam? Ka suapuipate akua ziam?” ci hi.

³⁴Ama in a kiim ah a to mihingte en in, “En vun! Hite sia ka nu le ka suapuite ahi hi!

³⁵“Pathian dei bang a ngamtate sia, ka suapuipa, ka suapuinu le ka nu ahi hi,” ci in zo kik hi.