Read Siyin Chin Mark 5 Bible Online

Mark 5 - Siyin Chin bible

Mark 5

¹Jesus a nungzuite taw Galilee Tuili langkhat Gerasa ngam theng hi.

²Ngunkuang sung pan a pusua po ciang, mithi phumna thaankuul khat sung pan hong pai pasal khat taw Jesus kisi hi. Hisia pa thaa ngilo vei

³ahikom thaan sungah teang hi. Kuama in ama thikkhau taw zong khit thei nawn ngawl uh hi:

⁴tamvei ma a khut le a peang pan thikkhau taw kikhii ahihang a khii simin, ama in thikkhaute saantat in peangkol thikte zongh sutham hi. Ama kuama zaw zawk ngawl tu dongin hat mama hi.

⁵Sun le zan in thaan kawm le mualtung kaantan in vak a, cik-au in ama le ama suanghiam taw ki at bul hi.

⁶Jesus a ngalmu ciangin, hong tai a, ama mai ah khupdin in,

⁷“A saangbel Pathian Tapa awng! Kei bang hong law nuam ni ziam? Kei daan nong piak ngawl natu in Pathian min taw kong thuum hi,” ci in a aw neiza taw au hi.

⁸(Banghangin hi bang ci ziam cile Jesus in, “Thaa ngilo awng, pasalpa sung pan hong pusuak ta'n!” a ci hu ahi hi.)

⁹Tua hi a Jesus in, “Na min bang ziam!” ci in dongh hi. “Ka min sia ‘mihonpi’ hi —” ci hi, [1] “Kote tam tatak ka pha uh hi!” ci hi.

¹⁰Tua ngam panin, thaa ngilote a nawkeak ngawl natu in Jesus tungah thaa ngilo in ngen top hi.

¹¹Tua mualpangh ah vok honpi khat an zongin taa uh hi.

¹²Tua ahikom thaa ngilote in Jesus munah, “Vokte kung zuanin a sung uh ah ka tum thei natu thu hong pia ta'n,” ci uh hi.

¹³Ama in tuabangin thupia a, doaite in pasalpa sung panin pusuakin vokte sungah tum uh hi. Vok hon bup — tulnii bang a pha tu teng — liangpangh ah kinuntaw ngawp a, tuili sungah tuitaa in thi siat hi.

¹⁴Vokcingte tai in, hi thu khuapi sung le lote sungah kizelsak hi. Mihing tam mama in bang thupiang ci en tu in pai tek uh hi,

¹⁵Jesus kungah a thet uh ciangin, doai hon tam mama a vei pasalpa mu uh hi. Tua pa sia tua munah to a, puan silhin thinciim in om hi, tuasia ciang amate theampo lau uh hi.

¹⁶A mute theampo in doaivei pasalpa tung le vokte tungah bang thupiang ci thu ngual munah sonsawn uh hi.

¹⁷Tua ahikom amate ii ngam a nusiat natu in Jesus sawl uh hi.

¹⁸Jesus ngunkuang tungah kaa tu a kithoai ciangin doaivei ngeipa in “Hong zuisak ta'n,” ci in ngen hi.

¹⁹Ahihang Jesus in a zuisak nuam bua hi. “Na inn ah cia zaw ta'n a, Topa in nang tungah bang hong vawt a, bangza in hong dik ziam ci thu na innkuanpuite munah son ta'n,” ci hi.

²⁰Tua ahikom pasalpa pai in Khuapi Sawmte ah ama tungah Jesus ii nasepna teng son hi. A za theampo in lamdang sa uh hi.

²¹Jesus in tuili kaantan in a langkhat ah pai hi. Tua tuili hui ah mihonpi khat Jesus kiim ah kikhawm uh hi.

²²Jew te synagogue khat a lampui upa Jairus kici khat in, Jesus peang ah bok a,

²³“Ka tanu zawm mama hi. Hong dam kik natu in, hong pai in a tungah na khut hong ngaksak ta'n,” ci in nasia takin ngen hi.

²⁴Tuaciang Jesus in ama taw paikhawm hi. Mihing tam mama Jesus taw tonkhawm ahikom a kiim theampo pan kiphulung uh hi.

²⁵Kum sawm le kum nii tawntung chibua natna nasia mama a thuak numei khat tuate sungah om hi,

²⁶syavuan tam mama te in bawl a, a sum a paai theampo bo in kibawl ahihang damzaw ngawlin lawmawk seseam hi.

²⁷Ama in Jesus thu za ngei ahikom mihonte sung Jesus nungsang pan zui in,

²⁸“A puanmong beak tham thei leng dam tu khi hi,” ci hi.

²⁹A puan a thamsak ciang a chibua sia thakhatin kang hi, tuaciang a ngim ngana pan damna a nga hunlam kiphawk hi.

³⁰Thakhatin ama sung pan vaangletna pusuak hi ci in Jesus in, phawk a mipite sangah kiheak in, “Akua in ka puan hong tham nu ziam?” ci hi.

³¹A nungzuite in, “Mihonpite ii hong neakcip na mu hi, bangbangin akua in hong tham nu ziam, ci ni ziam?” ci in zo kik uh hi.

³²Ahihang Jesus in ama a tham sia a tel dong en kawkoai hi.

³³Numeinu in ama tungah bang thupiang ci in phawk ahikom, lau in liing a, Jesus sangah pai hi, a peang ah khupdin in, ama tungah a thu theampo son siat hi.

³⁴“Ka tanu awng, na upna in hong damsak zo hi. Thinnuam in va pai ta'n, na ngim ngana pan dam ta'n,” Jesus in ci hi.

³⁵Tuabang Jesus a pau laitakin Jairus inn pan kamtai pawlkhat hong pai a, “Na tanu thi zo hi, banghangin Syapa ngim pepia lai ni ziam?” ci uh hi.

³⁶Jesus in amate thuson nangonthaakin, “Lau heak in, um po in” ci hi.

³⁷Tua zawkciang Peter, James le a suapuipa John simngawl ngualdang kuama a paipui bua hi.

³⁸Amate Jairus inn theng uh a, a kap taw a au taw buai in om Jesus in mu hi.

³⁹Ama sungtang in tua mihingte munah, “Banghangin hi bangin buai nu ziam? Banghangin kap nu ziam? Numeino thi ngawl hi, a mu hi bek hi,” ci hi.

⁴⁰Amate in ama nuisan uh hi. Tua ahikom amate theampo, doipua ah pusuaksak siat a, numeino ii pa, a nu le nungzuite thum taw inn doituamna sung numeino lupna ah tum uh hi.

⁴¹Ama in numeino sia a khut pan kaito a, ama tungah, “Talitha, koum,” ci hi. A khiakna sia “Numeino awng, tho in hong ci khi hi,” cina ahi hi.

⁴²Ama thakhat thu in thoto a, a kiim tengah kotva tu in kipan hi. (Ama kum sawm le kum nii pha hi.) Hi bangin, hong pian ciangin, mihingte in lamdang sa mama uh hi.

⁴³Ahihang Jesus in kuama munah a son ngawl natu in, nasia takin khaam hi, tuaciangin, “Bang khat pawpo a neak tu pia vun,” Jesus in ci hi.