Read Siyin Chin Mark 6 Bible Online

Mark 6 - Siyin Chin bible

Mark 6

¹Jesus in tua mun nusia in ama khua Nazareth ah cia kik a, a nungzuite in zui uh hi.

²Sabbath ni in synagogue ah thuhil tu in kipan hi. Tua munah mihing tam mama om hi; tuaciang ama thuson a zaak uh ciang, amate in lamdang sa tek uh hi. “Hite theampo koisung pan ama in nga ziam?” ci uh hi. “Ama tungah a kipia ciimna bang ciimna ziam? Ama in nalamdang laknate bangbangin vawt thei ziam?

³Ama Mary tapa James, Joseph, Judas le Simon ii suapui lettamapa hi ngawl ziam? A suapuinumeite zongh hi sung ma ah teang siat hi ka na ngawl ziam?” ci uh hi. Tua bangin ama a saang zo bua uh hi.

⁴Jesus in, “Kamsaang khat sia ama khua, ama beete le a innkuanpuite simngawl po in, mun theampo ah zakta uh hi,” ci hi.

⁵Ciina tawmte tungah khut nga a, a damsak simngawl tua munah nalamdang laknate, a vawt thei bua hi.

⁶Ama in mihingte ii upna a nei ngawl uh sia, lamdang sa mama hi. Tua zawkciangin Jesus in tua mun kiim le paamte ah pai in mihingte hilna nei hi.

⁷Ama in nungzui sawm le niite samin, nii veu nii veu paikhawm tu in sawl hi. Doai ngilote tungah thuneina amate tungah pia a,

⁸“Na khualhawna uh ah, ciangkhut simngawl a dang keng heak vun — anluum hikale, an khonna ip hikale, sum hikale, na ipno sungah pua heak vun.

⁹Peangdapte thua vun a, ahizong laktong keng thua heak vun.

¹⁰No hong saangna inn ah tung tavun a, tua mun pan na din kik uh mateng tua inn ah taam tavun.

¹¹Khua khat po ah no hong kisaang bua a, hong ngai nuam bua ahile, nusia vun a, na peang tung leivuite na thin tavun. Tuate amate kidop natu thupiakna ahi hi,” ci thua hi.

¹²Tuabangin amate pai in mihingte a mawna uh pan a kisiik kik natu thuhil uh hi.

¹³Amate in doaite tam mama notkeak in, ciina tam mama olive thau taw zut in damsak uh hi.

¹⁴Tu in Herod Kumpipa in hi thute theampo za hi, banghang ziam cile, Jesus ii minthanna mun theampo ah kizel hi. Mihing pawlkhat in, “Tuiphumpa John nungta kik hi! Tua hu in ama in nalamdang vawt thei natu, vaang nei hi,” ci uh hi.

¹⁵A dangte in, “Ama Elijah hi,” ci uh hi. Ahihang a dangte in “Ama taanghlai kamsaangte bangin kamsaang khat hi,” ci uh hi.

¹⁶Herod in a zaak ciangin, “Ama sia Tuiphumpa John hi! A lu ka tansak sa hi napi, hong nungta kik hi!” ci hi.

¹⁷Herod ama mama in, John a mat natu in thupia a, thikkhau khii in thong sungah khum hi. Herod in hi bang a, a ngamtat sia banghang ziam cile a suapuipa Philip ii zi Herodias a teenpui hang ahi hi.

¹⁸Tuiphumpa John in Herod munah, “Na suapuipa ii zi na teenpui sia suak ngawl hi!” a ci tawntung hang ahi hi.

¹⁹Tua ahikom Herodias in John tungah lungkim ngawlin, thalup sawm ahihang Herod hu in a that thei bua hi.

²⁰Herod in John kiita hi, banghang ziam cile John sia mihing thiangtho, mihing pha hi ci in he a, tua ahikom ama keamcing hi. A hilna a zaak simin a thin nawngkai mama ahitazong, Herod in John thuson ngai nuam hi.

²¹A khakbel ciang Herodias in hunpha khat nga hi. Herod suani hi a, ama in kumpi sung ulianbel theampo, ngalkapmangte le Galilee ii khuanu khuapa te atu in poai vawt hi.

²²Herodias ii tanu pai in hong laam a, Herod le a leangnate theampo lungkim uh hi. Tua ahikom Kumpipa in ngaknu nu munah, “Bang na dei ziam? Na dei pawpo hong pia tu khi hi,” ci hi.

²³“Nong nget theampo hong pia tu khi hi, ka ngam a lang khen dongin hong pia tu khi hi, ci in ka kiciam hi!” ci in kamciam tam mama pia hi.

²⁴Tuasia ciang ngaknu nu pusuak a, a nu munah, “Bang ngen tu khi ziam?” ci in dongh hi. “Tuiphumpa John ii lutang,” ci in zo kik hi.

²⁵Ngaknu nu kumpipa kungah manlang takin, heak kik a, “Tuiphumpa John ii lutang, tu mama in hi lai ah kuangdal khat tungah hong pia ta'n,” ci in ngen hi.

²⁶Kumpipa sia hi thu huvau in khuangai mama hi, ahihang a leangna theampo ii mai a kiciamna a vawtsate hu in, a nial thei bua hi.

²⁷Tua ahikom a cing khat paisak paih in, John ii lutang hong paipui natu thupia hi. A cingpa pusuak in, thong sungah pai a, John ii lutang saattan hi;

²⁸tuaciang kuangdal khat ii tungah koi in ngaknu nu pia a, tua nu in a nu pia sawn hi.

²⁹John ii nungzuite in hi thu a zaak uh ciangin, a luang la in vui uh hi.

³⁰Sawltakte hong cia kik uh a, Jesus taw kisi in, amate sep teng le hilna teng ko uh hi.

³¹Mihing a pai a cia kithalee in tam mama ahikom, Jesus le a nungzuite anneak hun zongh a nga bua uh hi. Tua ahikom amate munah, “Eima teng nguak mun khat ah pai in, tawmvei no sung na toitan thei natu uh in, eima bek om tawng,” ci hi.

³²Tua ahikom amate ngunkuang taw pai in, a ngamkhingna mun khat zuan uh hi.

³³Ahitazong, mihing tam mama in, amate pai mu uh a, a kuate ziam ci in tel paih ahikom, khuapi theampo pan hong pai uh a, leilam tawn in amate mai ah tai in, Jesus le a nungzuite thet ma in, tua munah theng uh hi.

³⁴Jesus in hi mihonpi khat a mu ciang, khuangai huai sa hi, banghang ziam cile amate sia tuucing nei ngawl tuuhonte bang ahi hi. Tua ahikom amate thu tam mama hil tu in kipan hi.

³⁵Ni hong niam ciangin, nungzuite ama kungah pai uh a, “Tu in ni zongh niam mama zo a, hi sung sia ngamkhing mama mun khat ahi hi.

³⁶Mipite lo sung ahizong, khuano sung ahizong, a neak tu khat pawpo lei tu in paisak in,” ci hi.

³⁷“Noma in a neak tu khat pawpo pia vun,” ci in Jesus in zo kik hi. “Amate vaak natu ngunn dangka zanii manh anluum lei le hong oai ni ziam?,” ci in amate in dongh uh hi.

³⁸Tua ahikom, Jesus in, “Anluum bangza nei nu ziam? Pai in en tavun,” ci in dongh hi. “Anluum nga le ngasa nii kinei hi,” ci in zo kik uh hi.

³⁹Jesus in a nungzuite munah mipite a pawl a pawlin, lopa hing tungah tosakin sawl hi.

⁴⁰Tua ahikom mipite a ngui in to a, pawlkhat zakhat, pawlkhat sawmnga in to uh hi.

⁴¹Tua zawkciang Jesus in anluum nga le ngasa nii teng la a, van ento in, Pathian tungah lungdamko hi. Ama in anluumte baltham in mipite hawmsak tu in a nungzuite tungah pia hi. Ngasa pum nii te zongh, amate sungah hawm siat hi.

⁴²A om theampo in a kham in ne tek uh hi.

⁴³Tua zawkciang nungzuite in, anluum le ngasa a khamvaal uh khum sawm le khum nii dimin seng lai uh hi.

⁴⁴An a kivaak sia pasal tulnga pha hi.

⁴⁵Mipite a ciasak lanin Jesus in nungzuite ngunkuang tungah tosak a, tuili langkhat Bethsaida khua ah a paikhol tu in sawl hi.

⁴⁶Kikhen natu mipite tungah mangpha a thaak zawkciang ama thungen tu in mual tungah kaato hi.

⁴⁷Nitak ciangin ngunkuang tuili laizang ah theng a, Jesus ama nguakin lei ah om hi.

⁴⁸Ama in a nungzuite ngunkuang nasia tak hotin a om mu hi, banghang ziam cile amate in vui vakna sang maingat in hot uh hi; tuaciang zingsang nai thum le nai luk kilaklaw in Jesus amate sang tui tungah lam hong pai hi. Ama in a nungzuite suang khial tu in kithoai a,

⁴⁹ahihang amate in tui tungah Jesus lam a pai mu uh hi. “Thithaa hi,” ci in ngaisun in cik-au uh hi.

⁵⁰Ama a mu uh ciangin, amate a lau tek mama uh hi. Jesus in amate thakhatin paupui a, “Na thin uh liansak vun! Keima khi hi. Lau heak vun!” ci hi.

⁵¹Tuaciangin ama ngunkuang tungah to a, tuasia ciangin vui hong thim hi. Nungzuite in lamdang mama sa uh a,

⁵²banghang ziam cile amate in, mihing tulnga an kivaakna ii a khiakna tatak a tel bua uh hi; amate ngaisutna in a ban zo bua hi.

⁵³Amate in tuili kaantan in, Gennesaret vaalbo ah kaa a, tua munah a ngunkuangte khau khit uh hi.

⁵⁴Amate in ngunkuang a nusiat po ciang, mihingte in Jesus meal tel paih uh hi.

⁵⁵Tua ahikom mihingte in ngam bup sungah del kawkoai uh a; ama om hi a kici na mun theampo ah ciinate phah tungah sialin ama kungah puak uh hi.

⁵⁶Jesus paina po khuapi, khuano le lo sung a om mihingte in ciinate vanhzuakna phual ah paipui uh a, a puanmong beak a tham tek thei natu in, ama tungah ngen uh hi, tuaciang a thamte theampo dam uh hi.