Read Siyin Chin Mark 7 Bible Online

Mark 7 - Siyin Chin bible

Mark 7

¹Jerusalem pan hong pai Phariseete pawlkhat le Thukham hil syate pawlkhat, Jesus kiim ah kikhawm uh hi.

²Amate in nungzui pawlkhatte an a neak tu ciang ngeina bangin, khut thiang ngawl taw an ne mu uh hi — koibang ziam cile amate in Phariseete hil bangin, a khut uh sil ngawl hi.

³(Phariseete le Jew te peuma in, amate ii taanghpupite hil, ngeina tuatuamte nasia takin zui uh hi: a khut uh ahi tu bangin a sil bua uh le an ne ngawl uh hi;

⁴vanhzuakna phual pan a kinga peuma, tui taw sil phot ngawlin ne ngawl hi. Hai, kuang le beal, taausankuang le lupnate ahi tu bang a, silthiang natu ngeina dang tam mamate zui uh hi.)

⁵Tua ahikom Phariseete le Thukham hil syate in Jesus munah, “Banghangin na nungzuite in, taanghpupite hil ngeinate zui ngawlin, an a neak tu uh ciang a khut thiang ngawl taw an ne ziam?” ci in dongh uh hi.

⁶Jesus in a zo kikna ah, “Isaiah in note thu a sonkholna bangza in maan ziam! A kihitheamsak minamte awng, ama in hi bangin at hi: ‘Pathian in, hi mite in a kammal bek uh taw, kei zatakna hong pia uh hi, ahihang a thinsung uh kei taw kikhuala uh hi.

⁷Amate ii hong biakna sia kimanna om ngawl hi, banghang ziam cile amate in mihingte vawttawm ngeinate Pathian ii Thukham bangin hil uh hi!’ ci hi.

⁸“No in Pathian thupiakte vawkin mihingte ii hilnate na ni uh hi.”

⁹“Noma ii kihilna te na kholet thei natu in Pathian thukhamte na nial zia uh na thiam uh hi.

¹⁰Bang ci nuam khi ziam cile Moses in ‘Na nu le na pa thasia vun,’ tuaciang, ‘A kuama po a nu a pa a haamsiat sia thina thuak tahen,’ ci hi.

¹¹Ahihang no ii hilna ah nu le pa hu natu in a kizangh thei na khat pawpo sia, ‘Hi sia Corban,’ hi, (Pathian atu a kipiasa hi) ci po le,

¹²nu le pa a hu ngawl hangin, phamaw ngawl hi, ci nu hi.

¹³Hi bang kihilnate khat tung pan khat na kipiak sawn uh ciang Pathian kammal a mel suak nu hi. Hi thu taw a kibang na ngamtatna dang uh zongh tam mama om lai hi,” Jesus in ci thua hi.

¹⁴Jesus in mihonpite khatvei ma sam kikin, “Na vekpi in hong ngai tavun a, tel vun.

¹⁵A pua sang pan hong tum nate bangma in, mihing khat sia zeksa taw kisai in ninsak ngawl hi. A sung pan hong pusuak to sia in mihing khat ninsak hi zaw hi,

¹⁶Bil a neite in za tavun” ci hi. [2]

¹⁷Ama mihonpite nusia in, inn sungah a tum ciang, a nungzuite in, hi hilna hong sontel ta'n ci uh hi.

¹⁸“No sia ngualdangte sangin ciimzaw tuan ngawl nu hi. Tel ngawl nu ziam? A pua sang pan hong tum suk na khat pawpo in mihing khat sia ninsak ngawl hi,

¹⁹banghang ziam cile a thinsung ah tum ngawlin, a ngilpi um sungah a tum zawkciang a pua sangah pusuak hi,” Jesus in ci hi. (Hi bang a ci ciang Jesus in, an a minpiang neak tuak hi, ci ahi hi.)

²⁰Tuaciang ama in zomto a, “A sung sang pan hong pusuakte in mihing khat ninsak hi.

²¹Banghang ziam cile mihing khat ii a sung, a thinsung panin ngaisutna pha ngawl piang a, tuate in paktatna, kisutolna, kithalupna,

²²nupa kipalngulna, duhopna, ngamtat siatna tuatuam; kitheamna, maizummawkna, ki enna, kingensiatna, kiphatsakna, le mawmawtna —

²³hi siatnate theampo sia mihing khat ii sung pan hong pai nate hi a, tuabangte in amate ninsak hi,” ci hi.

²⁴Tua zawkciangin Jesus Tyre khuapi hui ngamkhen ah pai tu in ding hi. Inn khat sungah tum a, tua munah ama a om hunlam kuama heak tu oai ngawl ahihang a bucip zo bua hi.

²⁵A tanu thaa ngilo vei nupi khat in, Jesus thu za ahikom thakhatin hong pai a, a peang ah bok hi.

²⁶Nupinu sia Gentile mi hi a, Syria ngam Phoenicia ngamkhen sung pan a piang ahi hi. Ama in a tanu sungah a om doai a nawkeaksak natu in Jesus munah ngen hi.

²⁷Ahihang Jesus in, “Tanote vaak masa phot tawng, tate ii anneak laaksakin, ui piaksak tu kilawm ngawl hi,” ci hi.

²⁸“Topa awng, tano teng an neakmongte sabuai nuai pan, ui ngawngawn in ne lai buang hi ngawl ziam!,” ci in nupinu in zo hi.

²⁹Tua ahikom Jesus in, “Tuabangin nong zona hangin, va cia ta'n, doai sia na tanu sung pan pusuak zo hi cisia na mu tu hi!” ci hi.

³⁰Nupinu a inn ah cia a, a sung pan doai pusuak sa a tanu lupna tungah a lum mu hi.

³¹Jesus in Tyre kiim le paam teng nusia in Sidon kaantan in Galilee ah pai a, Khuapi Sawm ii ngamkhente tawn hi.

³²Mihing pawlkhat in pasal nangong a pau thei ngawl khat hong paipui a, ama tungah Jesus ii a khut a ngak natu in ngen uh hi.

³³Tua ahikom Jesus in ama nguakin mihonpite kung pan a khuala thithimna ah samtuam a, pasalpa ii bil sungah a khutme thunin, cilphii in pasalpa ii leei thamsak hi.

³⁴Tua zawkciang Jesus in, van ento a, phiing vahumin, “Ephphatha,” “Kihong in!” ci hi.

³⁵Thakhatin pasalpa in khuaza thei a, a pau thei ngawlna pan olno takin pau kik thei hi.

³⁶Tuaciangin mipite munah hi thu kuama tungah a son ngawl natu in, ama in khaam vaial kale mipite in son vaial uh hi.

³⁷A za theampo in lamdang sa mama uh hi. “Na theampo bangza in vawt thiam ziam! Ama in nangongte ngawngawn khua zasak thei a, a pau thei ngawlte dongin pausak thei hi,” ci uh hi.