Read Siyin Chin Mark 8 Bible Online

Mark 8 - Siyin Chin bible

Mark 8

¹Tuazawk khuangei ngawlin mihon dang khat hong kikhawm hi. Tua mihingte anneak tu bangma a nei nawn ngawl uh ciangin, Jesus in a nungzuite a kungah sam a,

²“Hi mite khuangai huai ka sa hi, banghang ziam cile amate in ni thum tawntung kei taw hong omkhawm a, tu in bangma neak tu nei nawn ngawl hi.

³An ne ngawlin ciasak leang, lamkaal ah pukhong siat tu hi, banghang ziam cile pawlkhatte a khuala pek pan hong pai ahi hi,” ci hi.

⁴A nungzuite in, “Hi sung sennealngam ah koisung panin, mihing hi za ii anneak tu mu tu hi ziam?” ci uh hi.

⁵“Anluum bangza nei nu ziam?” ci in Jesus in dongh hi. “Luum sali” ci in zo uh hi.

⁶Ama in mihonte lei ah to tu in sawl hi. Tua zawkciang ama in anluum sali teng la in, Pathian tung lungdamko in, balneen a, nungzuite ii mihonte a hawmsak tu in pia hi; tuabang ma in nungzuite in hawm uh hi.

⁷Amate in ngasa no pawlkhat zongh nei uh hi. Jesus in hite atu lungdamko a, nungzuite tungah hawm vun ci hi.

⁸Mihing sim in ne uh a, kham tek uh hi — an ne mihing theampo 4,000 bang pha hi. Tua zawkciangin nungzuite in an neakmong a khop ciang khum sali dim pha hi. Jesus in mipite ciasak a,

¹⁰thakhat thu in nungzuite taw ngunkuang tung zuanin Dalmanutha ngam ah pai uh hi.

¹¹Phariseete pawlkhat Jesus kungah pai a, ama taw kam kinial uh hi. Amate in Jesus thaangsia bangin sia nuam ahikom Pathian lungkimpuina a om le a om ngawl a tel nopna in, nalamdang lakna khat ngen uh hi.

¹²Ahihang Jesus phiing vahumin, “Banghangin tu lai mihingte in nalamdang lakna veu hong ngen ziam? Hong pia ngawl tu khi hi kong ci hi! Hi mihingte tungah tuabang laknate kipia ngawl tu hi!” ci hi.

¹³Amate nusia in ama ngunkuang tung zuan kik a, tuili ngalkhat ah pai tu in kipan hi.

¹⁴Nungzuite in anluum a kicing a ken tu mangil a, ngunkuang sungah luum khat bek nei hi.

¹⁵“Kidawm vun a, Phariseete le Herod ii tol panin, kikeam tavun,” Jesus in ci hi.

¹⁶Amate sung teng tua thu kikum uh a: “Hi bang a hong ci sia anluum ih nei ngawl hang a, hong ci hi vak,” ci uh hi.

¹⁷Jesus in amate kikup tuamna teng tel paih ahikom, “Banghangin anluum nei ngawl huvau kikum nu ziam? Tel ngawl lai, he ngawl lai nu ziam? Na thin uh kiphel ngawl het ziam?

¹⁸Mit nei napi — mu thei ngawl nu ziam? Bil nei napi — za thei ngawl nu ziam?

¹⁹Anluum nga taw mihing tulnga ka vaak lai in, a khawn laak uh bangza khawm kana nu ziam? Ciamtee nawn ngawl nu ziam?” ci hi. “Khum sawm le khum nii,” ci in zo uh hi.

²⁰“Tuaciang anluum sali taw mihing tulli ka vaak lai in a khawn laak uh khum bangza khawm kana nu ziam?” ci hi. “Khum sali,” ci in zo uh hi.

²¹“Tua hi napi tel ngawl lalai nu ziam?,” ci hi.

²²Amate Bethsaida khua hong theng a, ama ii tham tu in mittaw pasal khat mihing pawlkhat in Jesus kungah hong paipui hi.

²³Jesus in mittawpa ii khut pan len a, khua pua sangah paipui hi. Pasalpa mittang ah a cilphii zawkciang Jesus in ama tungah a khut nga a, “Khua na mu thei ziam,” ci in dongh hi.

²⁴Pasalpa in khuadak a, “Mihingte mu thei khi hi, ahizong amate thingkung lampaite taw kibangin ka mu hi,” ci hi.

²⁵Jesus in pasalpa mittang tungah a khut nga kik hi. Tuasia ciang pasalpa in khua pha tatak a et le, khuamu thei kik a, na theampo thiang takin mu thei hi.

²⁶Jesus in a inn ah ciasak a, “Tua khuano sungah pai kik nawn heak in,” ci in thupia hi.

²⁷Tua zawkciang Jesus le a nungzuite Caesaria Philippi khua hui khuanote ah pai uh hi. A pai kawmin, “Ngual in kei akua hi hong ci ziam,” ci in dongh hi.

²⁸“Pawlkhat in Tuiphumpa John hi hong ci hi, a dangte in Elijah hi hong ci a, kamsaang sung pan khat hi hong ci zongh om hi,” ci in zo kik uh hi.

²⁹“Note in kei akua hi nong ci uh ziam?” ci hi. Peter in, “Nang sia Messiah ni hi,” ci hi.

³⁰Tuasia ciang Jesus in, “Kei huvau kuama munah son heak vun,” ci in thupia hi.

³¹Tua zawkciang Jesus in a nungzuite hilna nei tu in kipan hi. “Mihing Tapa in nasia takin ngimna thuak tu a, upate, thiampi liante le Thukham hil syate in nial tu uh hi. Ama thatlum tu a, ni thum zawkciang nuntakna sungah tho kik tu hi,” ci hi.

³²Ama in hi thu amate tungah thiangson mama hi. Tua ahikom Peter in ama sam tuamin teih hi.

³³Ahihang Jesus hong kingeilee a, a nungzuite en in, Peter teih hi. “Kei kung pan tai in Satan awng, na khua ngaisutna Pathian kung pan hong pai hi ngawlin, mihing pianzia sung pan hong pai ahi hi!” ci hi.

³⁴Tua zawkciang Jesus in mihonte le a nungzuite ama kungah sam a, “Mihing khat po in kei hong zui nuam le, ama le ama kinial in, a thinglamtee pua in hong zui tahen.

³⁵Banghang ziam cile a nuntakna a huu nuam sia in a nuntakna taan tu hi; ahihang kei hang le Lungdamna thu hang a nuntakna a taan sia in a nuntakna huu tu hi.

³⁶Mihing khat in simlei bup a nga hangin, a nuntakna a taan le meetna nei tu ziam? Meet ngawl tu hi!

³⁷A nuntakna a nga kik natu in, a piak thei tu bangma om ngawl hi.

³⁸Pathian nei ngawl, hi seksolna khang hun sungah mihing khat po in, kei le keima thu hangin, a mai a zum le, Mihing Tapa sia Pa ii vaangletna le a thiangtho vantunglalangte taw hong paikhop ciangin, Mihing Tapa zongh in tuasia pa atu a maizum tu hi.