Read Siyin Chin Luke 1 Bible Online

Luke 1 - Siyin Chin bible

Luke 1

¹Ka it Theophilus awng: Mihing tam mama in eite sungah thupiangte amate ii thiam thei za tekin at zo uh hi.

²A kipat panin a mute le a thu a thangsakte ii hong son bang teng veu ma at uh hi.

³Tua ahiciang hi thute a kipat pan a, pha takpi in ka et thiang uh ahikom, a kipialcian in na heak natu in, phamaw hi ci in kong at hi.

⁴Nang tungah hong kihil a thute, a maan le a cingin na heak natu in kong at hi.

⁵Judea ngam ah Herod Kumpipa a maan laitakin, Zechariah a kici thiampi khat om a, ama sia thiampi Abijah ii pawlkhen sungah a kihel thiampi khat ahi hi. A zi min Elizabeth hi a, ama zongh thiampi suan ahi hi.

⁶Amate ngeal Pathian mai ah ngamtatna phate taw a nungtate hi a, Topa ii thukham le thupiaknate a zuite ahi uh hi.

⁷Amate in ta a nei bua uh hi, banghang ziam cile Elizabeth sia ta nei thei ngawl a, Zechariah taw amate ngeal huai mama khawm zo uh hi.

⁸Ni khat Zechariah sia Biakinn sungah a thiampi nasep seam a, ni sim biakpiakna hunzeakna sungah ama ii hun hong tung hi.

⁹Thiampite ngeina om bangin, ama biaknatau tungah ngimnamtui hal tu in, aisaanna taw a kiteal ahi hi. Tua ahikom Topa Biakinn sungah tum a,

¹⁰mipite in ngimnamtui hal hunsung theampo doipua panin thungen in ngak uh hi.

¹¹Topa vantunglalang khat ama kungah hong kilangh a, ngimnamtui halna biaknatau ii ziatsang ah ding hi.

¹²Zechariah in ama a mu ciangin, patau in lau hi.

¹³Ahihang vantunglalang in hi bangin ci hi, “Zechariah awng, lau heak in! Pathian in na thungetna hong za zo a, na zi Elizabeth in tapa khat hong hin pui tu hi. A min John ci in na phuak tu uh hi.

¹⁴Bangza ta in na lungdam in na thinnuam tu ziam? Midang tam mamate zongh ama hong sua ciangin, bangzata in lungdam tu ziam!

¹⁵Ama Topa muna ah mi thupi khat hong hi tu hi. Ama in sapittui le zu ne ngawlin a om kul tu hi. A nu ngilsung pan kipan ama Thaa Thiangtho taw kidim tu hi.

¹⁶Tuaciangin ama in Israel mite tam mama amate Topa Pathian kungah zotpui kik tu hi.

¹⁷Ama in kamsaangpa Elijah bangin, vaangletna le thahatna taw Topa mai ah paikhol tu hi. Ama in pate le tate hong ngawmtua kik tu hi, thu ni ngawl mihingte thutang ngaisut theina sungah hong kiheisak kik tu a, Topa atu a kivawt khol mihingte a pian natu in seam tu hi.”

¹⁸Zechariah in vantunglalang tungah, “Tu a na son teng thutak hi ci in koibang tel thei tu khi ziam? Kei le pasal huai hi zo a, ka zi zongh huai zo hi,” ci hi.

¹⁹Vantunglalang in zo kik a, “Kei sia Gabriel ka hi hi. Pathian omna munah a om pa ka hi a, hi lungdamna thupha, nang kungah hong puak tu le nang taw kipaupui tu in, hong kisawlpa ka hi hi.

²⁰Ahihang kong thupuakte um ngawl ni hi, hikale a hun hong tun tak ciang, ka ci bangin hong piang tu a, hong um ngawl na hikom, na pau thei nawn buatu hi. Kong thuciam teng a tun mateng in, pau thei nawn ngawl dide tu ni hi,” ci hi.

²¹Tua hun sung teng mipite in doipua panin ngak top uh a, Biakinn sungah ama ngei mama hun a zak hu in, lamdang sa uh hi.

²²Hong pusua kik tak ciangin, ama pau thei nawn ngawl hi, tua ahikom, Biakinn sungah ama in mukholna mu hi ci in he uh hi. Kammal khat zongh huthe thei nawn ngawl ahikom khut taw lim lak hi.

²³Biakinn sungah nasep tu teng a man zawkciangin, Zechariah a inn ah cia hi.

²⁴Tua zawk tawmvei ciangin, a zi Elizabeth naungil om a, tha nga sung puapial nawn ngawl hi.

²⁵“Tu peetma ciang ahile Topa in hong hu zo hi, ngual mai ah ka maizumna teng ama in hong vawksak zo hi!” ci hi.

²⁶Elizabeth naungil a om zawk tha luk a cin ciangin vantunglalang Gabriel sia Galilee ngam Nazareth a kici khua khat ah Pathian in paisak hi.

²⁷Kumpipa David suan Joseph a kici khat taw kiteang tu in kiciamna a vawtsa ngaknu khat kungah, thupuak tu in a kisawl ahi hi. Ngaknu nu ii min Mary ahi hi.

²⁸Vantunglalang in ama kungah pai in, “Thinnopna na nga ta in! Topa sia nang taw hong omkhawm a, nasia takin thupha hong pia hi!” ci hi.

²⁹Mary sia vantunglalang ii thupuak huvau in, thinngim mama a, ama kammalte ii khiaknate ngaisusun hi.

³⁰Vantunglalang in, “Mary awng, lau heak in. Nang tungah Pathian hong thuthiam mama zo hi.

³¹Nangma in nau na paai tu a, a sua ciang a min Jesus ci in na phuak tu hi.

³²Ama hong thupi tu a, a Saang Bel Pathian ii Tapa kici tu hi. Topa Pathian in a taanghpupi David bangma in kumpipa suaksak tu hi.

³³Tuaciangin ama Jacob ii suan, a tawntung a maang kumpi hong hi tu a, ama ii ngam bo hun nei ngawl tu hi,” ci hi.

³⁴Mary in vantunglalang tungah, “Keima in, ngaknu thiangtho ka hi hi, koi bangin tu a na son bangin suak thei tu ziam?” ci hi.

³⁵Vantunglalang in, “Nang tungah Thaa Thiangtho hong om tu a, Pathian ii vaangletna in nang hong uap tu hi. Hi thu hu in, patang thiangtho sia Pathian Tapa kici tu hi.

³⁶Na bee nu Elizabeth ngaisun ka po in, ngual in ama tasel tu in a see sa hi, ahizong a huai mama kawm panin, tu in naungil a om zawk tha luk pha zo hi.

³⁷Banghang ziam cile Pathian in na khat beak vawt mawk a nei bua hi,” ci hi.

³⁸“Kei sia Topa naseamnu khi hi, hong ci babangin, kei tungah hong tung tahen,” Mary in a ci zawkciang vantunglalang in nusia hi.

³⁹Tua zawk hiat ciangin Mary kithoai cingtengin Judea ngam mualtung khua khat ah manlang takin pai hi.

⁴⁰Ama in Zechariah inn sungah tum in Elizabeth biakpui hi.

⁴¹Mary biapuina aw a zaak ciangin Elizabeth sung a om nauno lungdam in kisaan hi. Elizabeth Thaa Thiangtho taw kidim a,

⁴²aw nging tak taw hi bangin ci hi. “Nang sia numei a minpiang thupha a saangbel nu na hi hi, na hin tu nauno in, thupha nga tahen!

⁴³Ka Topa ii nu takpi kei kung a hong haw natu dongin, banghangin hi bangza a thupi thu hong piang ziam?

⁴⁴Banghangin tuabangin ci khi ziam cile nong paupuina aw ka zaak po ciang, ka sung a nauno lungdam in kilawn hi.

⁴⁵Topa ii hong thupuakte hong piang tatak tu ci a, na up thei hu in, bangza ta in mi lungdam na hi ziam!” ci hi.

⁴⁶Mary in, “Ka thin ka lung in Topa pok hi;

⁴⁷Pathian ka Ngumpa hangin ka thaa lungdam hi.

⁴⁸Banghang ziam cile ama in kei a kithusim ngawl a naseamnu hong phawk hi. Tu a kipan mihingte in, thupha saang nu hi hong ci tu hi.

⁴⁹Banghang ziam cile Vaanglian Pathian in kei tungah nasep lian hong sep hu ahi hi. Ama min thiangtho hi;

⁵⁰khang khat pan khang khat, Ama a patoaite tungah hesuakna pia hi.

⁵¹A thahatna baan hong vaan a, a kiphasakte le tuabang mihingte tupnate mangtatamsak hi.

⁵²Ama in kumpi liante a tokhum uh panin khiasuk a, a niamte laamto hi.

⁵³A ngilkialte neakpha taw vaak a, a haute khut hawm nguak taw taisak hi.

⁵⁴Ama in ih taanghpupite tungah a thuciamte kholet a, a naseam ahi Israel hu tu in hong pai hi.

⁵⁵Ama in Abraham tungah hesuakna a piak tu in a ciam sate, a suan a paal theampo tung dong ah piak tu in, a tawntungin phawk hi,” ci hi.

⁵⁶Mary tha thum bang Elizabeth kungah a taam zawkciang cia kik hi.

⁵⁷Elizabeth a nau sua tu hun hong cing a, tapa khat hing hi.

⁵⁸Topa ama tungah thuthiam mama hi ci in a innpaamte le a mealheakte in za uh a, lungdam pui tek uh hi.

⁵⁹Nausen nipi khat a phak ciangin, a vunteap attansak tu in, hong pai uh a, a pa min la in, “Zechariah” ci in phuak uh hi.

⁶⁰Ahihang a nu in, “Hi ngawl hi! A min John hi tu hi.’ ci hi.

⁶¹“No phung sungah min tuabang om ngawl hi,” a ngualte in ci uh hi.

⁶²Tuasia ciangin a pa tungah bang min phuak tu hi ziam ci in lim taw dongh uh hi.

⁶³Zechariah in lai atna thingpheak ngen a, “A min John hi,” ci in at hi. Amate in lamdang sa mama uh hi.

⁶⁴Tua hun lian laitakin, Zechariah hong pau thei kik a, Pathian pok hi.

⁶⁵A innpaamte patau siat a, tuaciang hi thute Judea ngam mualtung tengah kizel hi.

⁶⁶A zate theampo in, “Hi nausen bangbang mi hong suak tu ziam,” ci in ngaisutna le thudokna sia a thinsung tek ah om hi, banghang ziam cile Topa ii vaang ama tungah om hi, ci in thiangtel uh hi.

⁶⁷John ii pa Zechariah Thaa Thiangtho taw kidim a, tuaciang ama in Pathian kam a saan teng son a:

⁶⁸“Israel te ii Pathian Topa pok tek tawng! Ama in a mite hun tu in hong pai a, suaktasak hi.

⁶⁹Ama in a vaanglian Hunpa khat hong pia a, a naseampa David ii suan ahi hi.

⁷⁰Taanghlai in a kamsaang thiangthote tungah,

⁷¹ih ngalte le hong ensante theampo ii thahatna pan hong hun tu in hong kamciam zo hi.

⁷²Ama in ih taanghpupite tungah hesuakna hong lak tu in, hong ciam zo a, ama thuciam thiangtho phawk kik tu in hong khaam zo hi.

⁷³Ih taanghpupi Abraham tungah a ciliap huai kamciam taw ih ngalte khut sung panin hong hut zawk natu le ngammuangin ama ii na seam tu in hong kamciam zo hi.

⁷⁴

⁷⁵Tua ahikom ama mai ah ih nuntak lai theampo a thiangtho le thutang in, ih om thei natu ahi hi.

⁷⁶Nang, ka tapa, a Saang Bel Pathian kamsaangpa hi hong kici tu hi. Nang in Topa mai ah na paikhol tu a, a lampi na sialsak khol tu hi.

⁷⁷Ama mihingte tungah mawna kimaisakna taw ngupna piang tu hi, ci in na son tu hi.

⁷⁸Ih Pathian sia hesuak thiam a, thinneam hi. Ama in ngupna zing khuavak ei tungah hong taangsak tu a,

⁷⁹tuaciangin thina khuazing limh sung a teangte theampo tungah vantung panin hong taang tu a, thinnopna lampi tung, ih kalsuanna ah hong lampui tu hi,” ci hi.

⁸⁰Nausen sia pumpi le thaa sungah hong khangto hi. Ama Israel mipite mai ah a kilak hun dong sennealngam sungah teang hi.