Read Siyin Chin Luke 10 Bible Online

Luke 10 - Siyin Chin bible

Luke 10

¹Hisia zawkciang Topa in, a dang sawmsali le nii teal a, nii veu kop in, ama mama ii pai natu khua le munte ah paikholsak hi.

²Jesus in amate tungah, “Anlaak tu tam hi, ahihang an kaikhawm tu naseam tawm hi. A anla tu naseamte hong puak natu in, anneipa tungah thungen vun” ci hi.

³“Pai tavun! Ngia hon sungah tuunote tha bangin kong tha hi.

⁴Sumbawm ahizong, thung ahizong, peangdap ahizong keng heak vun; Lampi ah ngual paupui tu in tawlnga heak vun.

⁵Inn khat pawpo sungah, na tum uh ciang, a masa phit in, “Hi inn ah thupha hong tung tahen!” na ci vun.

⁶Thupha a saang nuam mihing khat po a om le na thupha piak uh kip tahen a, tuabang ahibuale, na thupha piak uh dok kik tavun.

⁷Tua inn ah taam tavun a, hong piak pawpo ne in, dawn vun, banghang ziam cile naseam khat sia thaman a saan tu kilawm hi. Inn khat pan inn khat ah kikhiin kawkoai heak vun.

⁸Khuapi khat sungah na tum uh ciang, no hong kisaang le, na mai ah hong kilui pawpo ne vun,

⁹tua khua ah ciinate damsak vun a, ‘Pathian ngam, no taw hong kinai zo hi!’ ci in mite tungah son vun.

¹⁰Ahihang khuapi khat sungah, na tum uh ciangin, no hong kisaang buale, lampi ah pusuak tavun a,

¹¹‘Na khua leivui ka peang tungah hong baangte kong thin kik uh hi, ahizong Pathian Ngam, no taw kinai zo hi, ci phawk vun!’ ci tavun.

¹²A tatak ka ci ciang, Thukhenna Ni ciangin, Pathian in, tua khua sangin, Sodom khua hesuak zaw tu hi.

¹³“Nang atu in bangza in lauhuai ziam, Chorazin awng! nang atu in bangza lauhuai ziam, Bethsaida awng! no sungah hong kivawt nalamdangte Tyre le Sidon ah kivawt thong le tua khua mite in, a mawnate pan kisiik kikna uh, a kilangh natu in, khuangeipi pek lai panin, khau-ip puan silhin to in amate le amate vut kithe tu uh hi!

¹⁴Pathian in Thukhenna Ni ciangin, note sangin Tyre le Sidon khuate hesuak zaw tu hi.

¹⁵Capernaum awng! Nang na hile nangma le nangma vantung ah kilaamto nuam ni ziam? Hell sungah hong kisepsuk tu hi!” ci hi.

¹⁶Jesus in a nungzuite munah, “No thuson hong ngaite in, kei thu hong ngai ahi hi. No hong nial peuma in, kei hong nial ahi hi,” ci hi.

¹⁷Sawmsali le niite in, lungdamna lianpi taw cia kik uh a, “Topa awng, na min taw thu ka piak uh ciangin doaite ngawngawn in ka thu uh hong ni hi!” ci hi.

¹⁸Jesus in zo kik a, “Vantung panin Satan sia khualeng bangin a taaksuk ka mu hi.

¹⁹Ngai vun! Ngulte le aikamte na totcip natu le na Ngalpa ii thahatna na zaw zawk natu in, no tungah thuneina hong pia zo khi hi, bangma in no hong susia zo ngawl tu hi.

²⁰Ahizong thaa ngilote ii na thu uh hong nit sia, lungdam heak vun, vantung a, na min uh a kiteptee hu in, lungdam zaw tavun,” ci hi.

²¹Tua hun laitakin Jesus Thaa Thiangtho in lungdamna taw kidimsak a, hi bangin ci hi. “Van le lei ii Topa ahi Pa awng! Na tungah ka lungdam hi, banghang ziam cile mihing pilte le mihing ciimte mun panin na seal thute pilna a nei ngawlte tungah na lak hi. Hi hi, Pa awng, hi bang tu ma na deina ahi hi,” ci hi.

²²“Ka pa in na theampo kei hong pia zo hi. Tapa akua ziam ci sia Pa simngawl kuama in a he bua hi, tuaciang Pa akua ziam ci sia Tapa le Tapa ii heaksak tu in a tealte ngawl po in a he bua hi,” ci hi.

²³Tuaciang Jesus in, a nungzuite sang nga in, hi bangin ci tuam hi, “Na mu uh nate hu in, bangza in hampha nu ziam!

²⁴Kei kong cina pan, kamsaang tam mamate le kumpite in, no ii mute mu nuam ahihang mu ngawl uh hi, za nuam ahihang za ngawl uh hi,” ci hi.

²⁵Thukham hil sya khat hong pai in Jesus aitaa nuam a, “Sya awng, tawntung nuntakna ka nga natu in bang ka vawt tu ziam?” ci in dongh hi.

²⁶Jesus in zo kik a, “Laithiangtho in bang ci ziam, nang tua thu bangbangin na tel ziam” ci hi.

²⁷Tua pa in zo kik a, “Na Topa Pathian sia na thin theampo, na thaa theampo, na thahatna theampo le na ngaisutna theampo taw na it in. Tuaciangin nangma le nangma na ki it bangma in, na innpaamte na it in,” ci hi.

²⁸Jesus in, “Na ci teng maan hi, tuabangin ngamta lete na nungta tu hi,” ci in zo kik hi.

²⁹Ahihang Thukham hil syapa in, ama le ama kitangsak nuam ahikom, hi bangin Jesus dongh thua hi, “Ka innpaam pa sia akua ziam?” ci hi.

³⁰Jesus in zo kik a, “Khatvei lai in pasal khat, Jerusalem panin Jericho khua ah a paisuk laitakin, ngual suam phalakte in suam a, a pum tung a om teng sutin, saat zazaan a, a thi dektakin nusia uh hi.

³¹Thiampi khat tua lampi tawnsuk luilam ahihang, tua a liampa a mu ciangin, lampi langkhat ah pial in, paisan hi.

³²Tuabang ma in, Levi mi khat hong pai a, mihing liampa a mu ciangin, lam langkhat tawnin paisan hi.

³³Ahihang khualhaw Samaria pa khat hong pai a, mihing liampa a mu ciangin, a thinsung ah hesuakhuai sakna taw kidim hi.

³⁴Ama kungah zuan a, a liammate sathau le sapittui noisak in, tuamsak hi. Tua zawkciangin, a liampa sia a laa tungah suanhto a, zintun inn khat ah paipui in ou hi.

³⁵A zing ciangin, ama in ngun dangka pheak nii la in, zin innneipa pia hi. ‘Ama na ousak in. Kong pai kik ciangin, ama tungah na bona dang theampo zongh kong pia tu hi,’ ” ci hi.

³⁶Tuaciang Jesus in thukhupna in, “Nang ii ngaisutna ah, tua mihing thumte sung pan akuabel in, mihing suamte ii sukcippa tungah innpaamte ngamtat tu bangin, ngamta na sa ziam?” ci hi.

³⁷Thukham hil syapa in, “Ama tungah a thuthiam sia hi,” ci in zo kik hi. Jesus in, “Tua ahile va pai ta'n a, tuabangin seam ta'n,” ci in zo kik hi.

³⁸Jesus le a nungzuite a papai uh ciang, khuano khat theng a, Martha a kici numei khat in a inn ah zin do hi.

³⁹Ama in Mary a kici suapuinumei khat nei a, tua nu in Topa peang kungah to in, ama hilnate ngai hi.

⁴⁰Martha sia nasep theampo ama ki awn ahikom diksa ngawlin hong pai a, “Topa awng, ka suapuinu in na theampo kei sep tu in, hong nusiat sia samh sa ngawl ni ziam?” Kei hong hu natu in hong sawlsak ta'n!” ci hi.

⁴¹Topa in zo kik a, “Martha, Martha awng, Na tam mama tungah thinngim in buai ni hi.

⁴²Ahihang a kisamh khat bek om hi. Mary in vawt tu a kilawm sia teal zo hi. Ama tung pan tuasia kilaaksak ngawl tu hi,” ci hi.