Read Siyin Chin Luke 11 Bible Online

Luke 11 - Siyin Chin bible

Luke 11

¹Ni khat ni in Jesus in mun khat ah thungen hi. A man ciangin a nungzuite khat in, “Topa awng, John ii a nungzuite a hil bangin, ko zongh thunget natu hong hil ta'n,” ci hi.

²Jesus in amate tungah, “Thu na nget uh ciangin hi bangin ci vun: ‘Pa awng, Na min thiangtho ki upat tahen; Na Ngam hong piang tahen,

³Ni simin ka khamkhop tu an hong pia ta in,

⁴Ko tung hong khialte ka maisak uh bangma in, kote khialna zongh hong maisak ta in, Ze etna haksa hong thuaksak heak in,’ ” ci hi.

⁵Jesus in a nungzuite munah, “Sonteena in no sung pan khat in, na lawmte inn khat ah, zankim laitak pai in, ‘Lawm awng, anluum thum hong puk ta'n.

⁶Ka lawmte khat khualhaw in ka inn ah hong tung a ka piak tu nei ngawl khi hi!’ ci le uhte tuasia ciang,

⁷na lawmpa in a inn sung panin hong zo kik hen a, ‘Hong nawngkaisak heak in! Kongkha kikalh zo a, ka tate zongh lum siat zo hi; tho kik in bang khat po kong piak tu suak thei ngawl hi, ’

⁸hong cile bangbang hi tu ziam? A ngualtamh khat na hikomin hong tho kik a, anluum hong piak ngawl hang maizum ngawlin ngen kenkon po lete ama in, tho in na kitaangsap theampo hong pia tu hi.

⁹Tua ahikom a tatakin kong ci ciang: Ngen vun, hong kipia tu hi; zong vun, na mu tu uh hi; king vun, kongkha hong kihon tu hi.

¹⁰Banghang ziam cile a ngente theampo in nga tu a, a zongte theampo in mu tu hi; a king pawpo tungah kongkha kihon tu hi.

¹¹Pa ahi note khat po in, na tapa ii ngasa hong nget ciang, ngul na pia tu uh ziam?

¹²Aktuui hong nget ciangin, aikam na pia tu uh ziam?

¹³Na phat ngawl uh kawm panin, na tate atu na pha piak tu na he uh hi. Tua ahile vantung a om na Pa uh in, a ngente tungah Thaa Thiangtho pia kan ngawl tu ziam!” ci hi.

¹⁴Jesus in a pau thei ngawl doai khat notkeak hi; doai hong pusua zawkciang mihingpa pau thei hi. Mihonpi in lamdang sa uh a,

¹⁵ahizong pawlkhatte in, “A nawkeak thei natu vaang a pia pa sia, doaite sung pan a lianbel Beelzebul ahi hi,” ci uh hi.

¹⁶A dang pawlkhatte in Jesus aitaa a, ama nasepna tungtaang ah Pathian lungkimpuina a om le a om ngawl a tel nopna in, nalamdang lakna khat ngen uh hi.

¹⁷Ahihang Jesus in amate ngaisutna teng tel ahikom, amate tungah hi bangin, ci hi, “Ngam khat sia ama le ama kikhen in a kido le bangma hun in kip ngeingawl tu hi; innkuan khat zongh kikhen in a kilem buale tamhtham tu hi.

¹⁸Tua ahikom Satan ngamsung teng zongh pawl tuatuamin kikhen hen a, khat le khat kido le, bang tanvei kip tu ziam? Note in kei sia Beelzebul ii vaangletna taw doaite not hi hong ci nu hi.

¹⁹Kei in tuabangin doaite not ka hile, na nungzuite in bangbangin not ziam? Noma ii nungzuite in, na khial uh hunlam lak hi!

²⁰No ci bang hi ngawl hi. Pathian vaang taw doaite not ka hi zaw hi, tuaciang Pathian Ngam sia no sungah hong theng zo hi, ci in hi thu mama in lak hi.

²¹“Pasal thahat khat in a ngalhiamte taw kithoai sa in a inn a cing le, a neisa theampo bit tu hi.

²²Ahihang a hat zaw khat in ama simin a zo le, a suan a muan ngalhiam theampo sut tu a, tua pa ii neisa ngalvanh teng ama in ngual hawmsak tu hi.

²³“Khat pawpo kei sang hong pang ngawl sia in kei hong langpan takpi ahi hi; khat pawpo in kei hong khoptua pui buale a tatakin a thethaang ahi hi.

²⁴“Thaa ngilo khat in mihing khat sung pan a pusua zawkciangin, munko na ah vak in, tawlngak natu zong hi. Tawlngak natu a mu buale ama le ama hi bangin, ‘Ka inn ah cia kik tong,’ kici hi.

²⁵Tuabangin a cia kik ciangin, a inn sia a thiangtho in kipuua sa in a om mu hi.

²⁶Tuaciang in ama sangin a ngilo zaw thaa dang sali hong ciapui a, amate in tuasung ah teang uh hi. A tawpna ah tua mihingpa sia, a masa lai sangin lawmawk zaw hi,” ci hi.

²⁷Jesus in hi teng a ci zawkciang, mihonpi sung panin numei khat in, “Nang hong hing a noaitui hong pia numei in, bangza in thupha nga ziam!” ci hi.

²⁸Ahizong Jesus in, “Tua sangin Pathian kammal za a, a zuite in bangza in thupha nga zaw ziam!” ci in, zo kik hi.

²⁹Mipite in Jesus kiim pan in, hong uumci uh ciangin, “Tu hun mihingte bangzata in ngilo ziam! Nalamdang lakna khat hong ngengen hi. Ahizong Jonah ii nalamdang lakna sia simngawl, a dang bangma kipia ngawl tu hi.

³⁰Nineveh khua mite atu in kamsaangpa Jonah sia, lim lakna khat ahi bangma in, Mihing Tapa zong tu hun mihingte atu in, lim lakna khat hi tu hi.

³¹Thukhenna Ni ciangin, Sheba Kumpinu hong ding tu a, tu hun mihingte hong mawsak tu hi. Banghang ziam cile ama ii ngam panin Solomon Kumpipa ii ciimna taw hilnate ngai tu in khual hong haw hi. A tatakin ka ci ciang, Solomon sangin a lianzaw khat hi sungah om hi.

³²Thukhenna Ni ciangin, Nineveh khua mite hong ding tu a, no hong mawsak tu hi, banghang ziam cile amate in Jonah thuhilna a zaak uh ciangin a mawna uh panin, kisiik kik uh hi; a tatakin ka ci ciang, hi sungah Jonah sangin a lianzaw khat om hi!

³³“Kuama in mei a vaak ciang phual ngawl a, kuang taw zonghin khup ngawl hi. Tua hi ngawl zaw in, hong sungtang po ii mu thei tu in, meivakna khuam tungah kikoi hi.

³⁴Na mittangte uh sia na pumpi atu meivak taw kibang hi. Na mittang uh a ciidam le, na pumpi uh sia khuavak taw kidim hi; ahizong na mittang uh a pha buale na pumpi bup uh sia khuazing sungah om tu hi.

³⁵Tua ahikom na pumpi sungah khuavak sia khuazing na suaksak heak vun.

³⁶Na pumpi bup uh sia, khuavak taw kidim a khen khat po khuazing sungah a om bua nale, meivak sia na tungah hong taan bangma in, a vekpi taang tu hi,” ci hi.

³⁷Jesus in a pau tu teng a man zawkciang, Pharisee khat in an ne tu in sam hi. Tua ahikom ama pai in an ne tu in to hi.

³⁸Pharisee pa in Jesus anneak ma in a khut sil ngawlin om a mu ciang lamdang sa hi.

³⁹Tua ahikom Topa in ama tungah, “Tu in no Phariseete na kuang na hai uh a puasang panin na thiangsak uh hi. Ahihang na sungsang uh ah ngitlona le ngoltolna taw na kidim uh hi.

⁴⁰A mawmawte awng! A puasang a vawt Pathian in a sungsang zongh vawt hi ngawl ziam?

⁴¹Ahihang na kuang le na haite ii sung a omte sia a zawngte pia le uhte no atu in na theampo sia zeksa huvau in thiang tu hi.

⁴²“No Phariseete atu bangza in lauhuai ziam! Pathian atu in, ante, lonamsia, bokbawnkha le khuahun zui in a piang an tuatuamte tung pan sawm a khat na pia uh hi. Ahihang Pathian it natu le thutang khenna ngaingon nu hi. A dangte zongh ngaingon tuan ngawlin hite na sep tatak tu uh ahi hi.

⁴³“No Phariseete atu in, bangza in lauhuai ziam! Synagogue sungah a kikhealsia tokhumte na thangai uh a, vanh zuakna munah kizatak piaknate dik na sa uh hi.

⁴⁴Bangza in lauhuai ziam! No sia a kilangh ngawl thaan, ngual in a tungtawn a, a heak ngawlin a sicilte taw na kibang uh hi,” ci hi.

⁴⁵Thukham hil sya khat in, “Sya awng hi teng na ci ciangin ko zongh hong selno na hi hi,” ci hi.

⁴⁶Jesus in zo a, “No thukham hil syate atu zongh bangza in lauhuai ziam! Mihingte ii nungzaang ah vanhngitte na suanh uh a, ahihang tua vanhngitte puak zawk natu in, na khutme dawn beak zongh taw na hu nuam bua uh hi.

⁴⁷No atu in bangza in lauhuai ziam! Na taanghpupite ii suamlup kamsaangte atu in a hoi mama thaante na vawt uh hi.

⁴⁸Tua ahikom noma ii na sepna in na taanghpupite ii ngamtatnate a lungkimpui na suak uh hi. Amate in kamsaangte suamlum a, note in a thaan uh na vawtsak uh hi.

⁴⁹Hi thu hu in Pathian ii Ciimna in hi bangin ci hi. ‘Kamsaangte le kamtaite ka paisak tu hi. Amate in pawlkhat thatlum tu a, a dangte vawtsia tu uh hi.’

⁵⁰Tua ahikom simlei kibitphua pan kipan a kisuamlum kamsaang theampo hangin, tu hun a mihingte daan kipia tu hi,

⁵¹Abel kisuamlupna pan kipan biaknatau le Thiangtho Mun, kilaklaw ah Zechariah a kisuamlupna dong huam tu hi. Hi hi, hong son khi hi, tu hun a mihingte tuate theampo hu in, daan kipia tu hi!.

⁵²“Thukham hil syate awng, no atu in, bangza in lauhuai ziam! Heakna kikholna inn kongkha tawtangte na keam uh hi; tua inn sungah noma tatak na tum nuam bua uh a, tum tu in a hanciamte na khaktan uh hi!” ci hi.

⁵³Jesus in tua mun a nusiat ciangin, Thukham hil syate le Phariseete in ama nasia takin a maw natu zong uh a, thu tam mama dongh uh hi.

⁵⁴a kampau khialna khat po taw a mat thei natu, aitaa tu in hanciam uh hi.