Read Siyin Chin Luke 12 Bible Online

Luke 12 - Siyin Chin bible

Luke 12

¹Mihing tul tam mamate kiphulungin khat le khat peang kisiik tha in a om laitak Jesus in a nungzuite munah a masa phitbelin hi bangin ci hi, “Pharisee te ii tol panin na kikeam vun — amate kihisak theamna ka cinopna hi.

²A kisiin theampo kihong tu a, thuku a minpiang kipholaak tu hi.

³Tua ahikom khuazing sungah a kison peuma suntangin kiza tu a, inn doituam kikhak sungah na kihuau uh peuma innkhum dawn panin ki au keak tu hi.

⁴“Ka lawmte awng, hong ci khi hi. Pumpi bek that thei a tua zawkciang a sia zaw a hong vawt thei ngawlte na kiita heak vun.

⁵Kiitak tu akua ziam ci sia kong lak tu hi. Pathian na kiita vun, ama in a thalup zawkciang meikuang sungah bum thei lai hi. Hong um tavun, na kiitak tu uh sia ama ahi hi!

⁶“Tonbawm nga ciang dangka san pheak nii taw kizuak hi ngawl ziam? Hi nave tonbawm khat zongh Pathian in mangil ngawl hi.

⁷Na lu tung a samzamte ngawngawn hong kisimsak siat sa ahi hi. Tua ahikom lau heak vun. No sia tonbawm tam mamate sangin manpha zaw nu hi.

⁸“A maan takin kong ci ciang, mipite mai ah keima ii mi ahi hunlam a pualaakte sia Mihing Tapa zongh in Pathian vantunglalangte mai ah tuabang ma in a pualaak tu hi.

⁹Ahihang mihonpi mai ah kei hong nialte sia Mihing Tapa in Pathian vantunglalangte mai ah nial tu hi.

¹⁰“Mihing Tapa langpanna kam khat a pau pawpo sia kimaisak thei hi; ahizong Thaa Thiangtho langpanna kamsia a pau khat pawpo kimaisak ngawl tu hi.

¹¹“Synagogue mai ah ahizong, ngam uk maangte le hong ukte mai ah ahizong, thusit tu in hong kipaipui ciang noma bangbangin kihung tu a, bang teng pau tu ci in thinngim heak vun.

¹²Banghang ziam cile Thaa Thiangtho in tua hun ciangin na pau natu hong hil tu hi.”

¹³Mihon sung panin pasal khat in Jesus tungah, “Syapa awng, ka pa ii nei le lamh hong nusiatte, ka suapuipa ii hong hop natu in hong sawlsak ta'n,” ci hi.

¹⁴Jesus in zo kik a, “Pasalpa awng, no nii ii kilaklaw ah neisate hawm tu le thukhen tu in akua in kei tungah thuneina hong pia ziam?” ci hi.

¹⁵Amate tungah hi bangin ci thua hi. “Duhopna namcinte panin, noma le noma kikeam tavun. Banghang ziam cile bangza po in a haubel hangin mihing khat ii nuntakna tatak sia neisa lamhsate hi ngawl hi.”

¹⁶Tua zawkciang Jesus in hi thusonteena amate tungah son hi: “Khatvei lai in, sumhau khat om a, a leitang tung panin thaw an tam mama piang hi.

¹⁷Ama le ama hi bangin ngaisun hi, ‘Ka an theampo ka koi natu ansaal nei ngawl khi hi. Bang law tu khi ziam?’

¹⁸‘Hi bangin vawt tong,’ ama le ama kici hi, ‘Ka ansaal luite pheltham tong ii, a lianzaw in ka sa tu a, tua munah ka an teng le ka vanh dang teng ka khol tu hi.

¹⁹Tuasia ciangin keima le keima hi bangin ka kici tu hi. Mihing hamphapa awng! Kum tam mama na khom tu na pha theampo nei zo ni hi. A ol nawno in nungta ta'n a, ne in dawn lel in. A nuam in om ta'n!’

²⁰Ahihang Pathian in ama tungah hi bangin ci hi, ‘Mihing mawmaw pa awng! Zan ciang mama in na nuntakna na aap kul tu hi; tua hile nangma atu na kholsa hi teng sia akua in tang tu ziam?’ ” ci hi.

²¹Tuaciang in Jesus ii a thukhupna ah, “Pathian muna ah hauna ahi ngawl leitung haunate amate atu a kholte sia tu a ih son sia pa bang ahi hi,” ci hi.

²²Tua zawkciang Jesus in a nungzuite munah, “Tua ahikom nuntak natu a kisamh ante atu ahizong, pumpi atu a kisamh puante atu ahizong, tuate huvau in, thinngim heak vun kong ci hi.

²³Nuntakna in an sangin thupizaw pek a, tuaciang pumpi in puante sangin thupi zaw hi.

²⁴Va-akte en vun: amate in anciite tu ngawlin, an le la ngawlin, ansaal le beamte a nei bua hi. Pathian in amate vaak hi! Vacimte sangin note tam mama in manpha zaw pek nu hi!

²⁵No sungah akua in thinngimna taw na khan uh tawm na khangkhan thei uh ziam?

²⁶A son thamman ngawl tuabang thuno khat zongh, na vawt thei bua uh le, nadang tungtaang ah banghangin thinngim nu ziam?

²⁷Unok paakte en vun, bangbangin khang ziam: amate in na le seam ngawl a, khau le zom ngawl hi. Ahizong a tatak ci leang Solomon Kumpipa a haubel sia zongh hi paakte sangin a hoi zaw puansilh nei ngawl hi.

²⁸Tuni in hing a zing ciang a vul, a kihal lopate a zeam sia Pathian ahi hi. Ama in no sia puan taw hong khu seseam ngawl tu ziam? Na nei uh upna sia bangza in no ziam!

²⁹“Tua ahikom bang ka ne tu, bang ka dawn tu ci in thintoi heak vun.

³⁰(Banghang ziam cile leitung ah, Pathian a he ngawlte in, hi bang teng thinbot in nei uh hi.) Na Pa in hite na kisap hunlam uh hong he hi.

³¹Ama Ngam na zong masa vun. Tua hile ama in hite theampo zongh hong pia thua tu hi.

³²“Tuu honnote awng, lau heak vun. Banghang ziam cile na Pa in Ngam hong pia nuam hi.

³³Na neisa theampo zuak vun a, na nga uh sumte a zawngte pia vun. Na hauna uh sia van ah na khol vun, tua munah a man sulh ngeingawl tu hi. Banghang ziam cile tua munah ngutate in ngu thei ngawl a, nget in ne thei ngawl hi.

³⁴Banghang ziam cile na sum na paai omna munah, na thin na lung uh zongh om tu hi.

³⁵“Hong tung tu thu khat pawpo atu in, a kingingta sa in om vun. A diang tawm tu in puansilh kholsa le meiinn vaak sa in om vun.

³⁶Mopoai panin a topa hong cia kik tu a ngak naseamte bang na hi vun. Ama hong cia a, kongkha hong kih ciangin, amate in thakhat thu in kongkha hon tu uh hi.

³⁷Ama hong cia kik ciangin a kinging sa in a om, a khuaphawk naseamte, a topa in a mu ciang amate bangzata in thupha a nga tu ziam? A maan takin kong ci ciangin, a topa in a laktong puasilh suut tu a, amate a tosak zawkciang anvaak tu hi.

³⁸Zankim laitak ahizong, tua zawkciang ahizong, ama hong cia hun in, a kinging sa a om naseamte in bangzata in thupha a nga tu ziam?

³⁹Inn nei khat in nguta hong pai tu hun he khol le a inn sia nguta in phuulsak ngawl tu ci in na tel uh hi.

⁴⁰No zongh a kinging sa in om vun, banghang ziam cile, Mihing Tapa sia na muanmawk ngawl uh hun khat in hong pai tu hi,” ci hi.

⁴¹Peter in, “Topa awng, tu a thusonteena sia ko atu na ci ziam tua ahibuale ngual theampo atu ziam?” ci hi.

⁴²Topa in, “Tua ahile thumaan a, a ciim naseampa akua ziam? Tua pa in a inn a uk tu le, naseam dangte a hun ciang an pia tu in a topa ii sawlpa ahi hi.

⁴³A topa hong cia kik ciang, hi bangin naseampa nasep mu thong le naseampa bangzata in lungdam tu ziam?

⁴⁴A tatak ka ciciang, a topa in tua naseampa sia a neisa theampo a uk tu in koi tu hi.

⁴⁵Ahizong tua naseampa in a topa hong cia kik tu khuangei lai tu zam ci in, naseam dang pate le numeite vel ngawp tu in kithoai hen a, anne tuidawn zukham in om le,

⁴⁶a topa sia muanmawk ngawl ni khat, a heak ngawl hun khat ciangin hong heak kik tu hi. A topa in ama saat zazaan tu a, thu ni ngawlte ii thuak teng thuaksak tu hi.

⁴⁷“A topa ii seam le a oai teng, tel napi a, a seam tu in, a kithoai ngawl tua naseampa nasia takin, velna kithuaksak tu hi.

⁴⁸Ahizong a topa ii deina tel ngawlin, vel thuak natu ngamtatna a nei le, ama sia a nasia lei ngawlin kivel tu hi. Tam a kipiate tung panin tam kingen tu hi; tam seseam a kipiate tung pan, a tam seseam kingen tu hi.

⁴⁹“Leitung a hal tu in kong pai a, tu in a kuangsa hile ka oai hi!

⁵⁰Kibaptize na ka nga tu khat om a, tuasia a kimanthiang mateng in bangza in ka thin patau ziam!

⁵¹Leitung ah kilemna puak tu in hong pai hong sa nu ziam? Hi ngawl hi, kilemna hi ngawlin, kikhenna pia tu in kong pai hi.

⁵²Tu panin kipan mihing nga a pha innkuan khat sia kikhen tu a, a lang ah thum pang tu a, a lang ah nii pang tu hi.

⁵³Pate in tapate langpan tu a, tapate in pate langpan tu hi; nute in tanute langpan tu a, tanute in nute langpan tu hi; tonupite in mote langpan tu a, mote in tonupite langpan tu hi,” ci in zo kik hi.

⁵⁴Mipite tungah Jesus in hi bangin ci hi. “Nitumna sang pan meeikaai khat na mu uh ciang nguazu vak thakhat thu in na ci uh a, zu takpi hi.

⁵⁵Tuaciang thangsang panin vui hong vak na phaw uh ciangin, nisa vak, na ci uh a, sa takpi hi.

⁵⁶A kihisak theamte awng! van le lei en in khuahunte na sonkhol thei uh hi; tua ahile banghangin tu hun ii a khiakna tel ngawl nu ziam?

⁵⁷“Thumaan thutang vawt tu in banghang khensat ngawl nu ziam?

⁵⁸Mihing khat pawpo in na tungah thu hong vawt in zum tungah hong then le thukhenzum na thet ma in, na kituu uh thute ama taw kilemtua tu in hanciam vun. Tua ahibuale thukhenmangte mai ah hong kai in, tuate in palikte khut sungah hong aap tu a, thong sungah hong khum tu hi.

⁵⁹A maan tak kong ci ciang, tua munah na om tu a, na liausum a cin dong thong na taak tu uh hi,” ci hi.