Read Siyin Chin Luke 14 Bible Online

Luke 14 - Siyin Chin bible

Luke 14

¹Jesus sia Phariseete lampui khat ii inn ah Sabbath ni khat, an ne tu in pai hi; tua munah a om mihingte in Jesus encik uh hi.

²A khut le a peang a tum pasal khat Jesus kungah pai a,

³tuasia ciang Jesus in Thukham hil syate le Phariseete munah hi bangin dongh hi. “Ih Thukham in Sabbath ni in ciina damsak tu oai ziam, oai ngawl ziam?”

⁴Ahihang amate a pau nuam bua uh a, Jesus in pasalpa sam in damsakin ciasak hi.

⁵Tua zawkciang amate tungah “No sungah na tapa uh khat ahizong, na khuital uh khat ahizong Sabbath ni in tuikhuk sungah taak luilam le tua Sabbath ni mama in thakhat thu kaito kik ngawlin na om tu uh ziam?” ci hi.

⁶Ahizong amate in hi thu huvau a zo thei bua uh hi.

⁷Leangnate pawlkhat in tona nuambel teng a teal uh Jesus in a mu ciang, a om theampo ii zaak tu in hi thusonteena son hi.

⁸“Mopoai siim tu in hong kisap ciang, tona nuambelna ah to paih heak vun. No sang in a thupi zaw mihing khat po zongh kisamh tha tu a,

⁹no hong sam khawm innteakpa in no kungah hong pai in, ‘Ama na tona awn in,’ hong cile nuammaw sa in a niambel tona dangkhat ah na to uh hong kul tu hi.

¹⁰Tua sangin hong kisap ciangin a niam belna ah to le uhte na innteakpa hong pai tu a, ‘lawmpa awng, hong pai in tona a nuam zawna ah hong to ta'n,’ hong cile leangna dangte theampo ii mai ah maipha na nga tu uh hi.

¹¹Banghang ziam cile ama le ama a kiliansakte kiniamsak tu a, ama le ama a kiniamkhiak te kiliansak tu hi.”

¹²Tua zawkciang Jesus in a innteakpa tungah, “Zing an ahibuale nitak an neakpui tu in na sap uh ciang, na lawmte, na suapuite, na mealheakte le na innpaam sumhaute sam heak in — banghang ziam cile, amate zongh in, hong sam kik tu a, tuabang teng taw in na vawtna bang hong kipia kik tu hi.

¹³Anneakpoai na vawt ciangin, a zawngte, a koncipte, a peangbaite, le mittawte na sam tavun;

¹⁴tua hile thupha na saang tu hi, banghang ziam cile amate in hong thuk kik zo ngawl tu hi. Mihing phate thaw kik ni ciangin Pathian in hong thuk kik tu hi,” ci hi.

¹⁵Sabuai ah a to mihing khat in hi thu a zaak ciangin Jesus tungah “Pathian Ngamsung poai vawtna ah a to tute sia bangzata in thupha nga ziam?” ci hi.

¹⁶Jesus in ama tungah, “Khatvei lai in mihing khat in, poai lian khat vawt a, tua munah ama in mihing tam mama sam hi.

¹⁷Anneak tu hun hong thet ciangin leangnate munah hi bang a sonna tu in a naseampa sawl hi, “Hong pai tavun, na theampo a kinging sa in om zo hi!”

¹⁸Ahihang amate khat zawkciang khat in kamzong tek hi. A masabel pa in a naseampa tungah, ‘Lo khat ka lei a, pai in ka vil kul tu hi; hong hesuak tavun,’ ci hi.

¹⁹A dang khat in, ‘Khuital kap nga ka lei a, nasep ka hil kul tu hi; hong hesuak tavun,’ ci hi.

²⁰A dang khat in, ‘Ka zi nei zawk hiat hi a, tua hu in hong pai thei ngawl tu khi hi,’ ci hi.

²¹Naseampa a topa kungah pai kik a, hi thu teng son hi. A topa thin uuk mama a, a naseampa munah, ‘A manlang in khua sung lam theampo ah va pai ta'n a, a zawngte, a koncipte, mittawte, le peangbaite hong ciapui ta'n,’ ci hi.

²²Hai ngawlin naseampa in, ‘Topa awng, nong thupiak bangin ka seam zo hi, ahizong a tamzaw lai om thei natu mun awng lai hi,’ ci hi.

²³Tuasia ciang a topa in naseampa tungah, ‘Ngamsung lampi liante le lampinote ah va pai ta'n a, ka inn sung a dim tu in, mihingte hong tumsak ta'n.

²⁴A tatak ka ci ciang, khual ka hil maksakte kuama in ka nitak an tep ngawl tu hi!’ ” ci hi.

²⁵Khatvei mihonpite Jesus taw tonin, a paikhop laitak, amate tungah,

²⁶“A kuama po kei nung hong zui tu sia in, a pa, a nu, a zi, a tate, a suapuipate, a suapuinute le, ama le ama mama sang zonghin kei hong it zaw buale kei nungzui a suak thei buatu hi.

²⁷Ama thinglamtee pua in hong zui ngawl po ka nungzui a suak thei buatu hi.

²⁸No sung panin mihing khat in, tausaang khat sak a sawm le, ama in a masa phitbel in, ngeal phot tu a, sum bangza bo tu ziam ci in tuat tu hi, a sak zawk natu sum a kicing in a nei le a nei ngawl en phot tu hi.

²⁹A nei buale a phungkawng a cian zawkciang, tua tausaang a man zo buatu hi; hi thu a mu a hete theampo in a nuisan uh hi.

³⁰‘Hisia pa in inn sa tu kipan ahihang a man zo bua hi,’ ci tu uh hi.

³¹Kumpipa khat in mihing tulsawm taw, mihing tulkul a nei kumpi dang khat sim a sawm le, a nalh zawk natu, tha a khom nei ziam, ci sia to in, khensat phot tu hi.

³²Tha a khom a nei buale, kumpipa dangkhat ii kungah a kikhualat lai in, kilemna thu kikum tu in, kamtaite paisak tu hi.

³³Tuabang ma in note khat pawpo in na neisa theampo na nusia bua uh le, ka nungzui na suak thei buatu uh hi” ci hi.

³⁴“Ci al sia pha hi, ahihang a alna a bo le ki alsak kik thei nawn ngawl hi.

³⁵Leitang atu le pha ngawl, eaklei zong kizangh thei ngawl a; kivawk hi. Bil nei po in hi thu na za tavun!” ci in Jesus in thukhup hi.