Read Siyin Chin Luke 19 Bible Online

Luke 19 - Siyin Chin bible

Luke 19

¹Jesus in Jericho khua sungah tumin kaantan hi.

²Tua munah shiadong pipa ahi sumhaupa Zacchaeus kici khat om hi.

³Ama in Jesus sia a koibang mi hi a, ci in mu nuam ahihang a tuntom khat ahikom mihonte hangin Jesus a mu thei bua hi.

⁴Ama in mihonpite mai ah tai a, tua mun kaantan in hong pai tu Jesus mu nuamin theiteak kung khat tungah kaato hi.

⁵Jesus in tua mun a thet ciangin a tung ento in, “Zacchaeus awng, a manlangin hong tuaksuk ta'n, tuni in nangma inn ah hong taam tu khi hi,” ci hi.

⁶Zacchaeus hong tuaksuk paih a, lungdamna lianpi taw Jesus muak hi.

⁷A mu mihing theampo phun tek a, “Hisia pa in, mawneipa khat ii inn ah zintung thong hi!” ci uh hi.

⁸Zacchaeus ding a, Topa tungah hi bangin ci hi. “En in, Topa awng! Ka neisa a lang mizawngte ka pia tu hi; tuaciangin khat po ka theam ngei le a zaa li in ka lo kik tu hi,” ci hi.

⁹Jesus in ama tungah, “Ngupna sia tuni in hi bangkua ah hong theng hi; banghang ziam cile hisia pa zongh Abraham ii suan khat ahi hi.

¹⁰Mihing Tapa sia a bo a mangte zong tu le a ngum tu in hong pai hi,” ci hi.

¹¹Mipite in hi thu ngai in a om laitakin, Jesus in thusonteena khat son thua hi. Ama tua laitakin, Jerusalem theng dektak zo ahikom mipite in Pathian Ngam hong kilangh pal tu hi vak ci in muangmaw uh hi.

¹²Tua ahikom ama in, “Khatvei lai in ulian khat sia ngam khualapi khat ah kumpi suak tu in pai a, tuasia zawkciang cia kik sawm hi.

¹³A vai din ma in a naseamte sawm sam a, khamh dangka khat tek pia in hi bangin ci hi. “Ka om ngawl sung teng in hisia taw bangza na meetsak thei uh ziam kisin vun,” ci hi.

¹⁴Tu in a ngammite in ama ensan uh a, kamtaite in delsak a, ‘Ko hisia pa ka kumpi tu in dei ngawl khu hi,’ cisak uh hi.

¹⁵“Tua pa kumpi kisuaksak a, hong heak kik hi. Sum bangza tek meetsak ziam cisia a heak thei natu in, thakhat thu in a naseamte a mai ah samsak hi.

¹⁶A masa in khat hong pai a, ‘Topa awng, nong aap khamh dangka khat ii tung panin, a dang sawm ka meetsak hi,’ ci hi.

¹⁷Ama in, ‘Pha mama hi. Nang in naseam pha khat na hi hi! Thunote tung zongh ah thumaan na hi ciang, khuapi sawm kong uksak tu hi,’ ci hi.

¹⁸A niina naseampa hong pai a, ‘Topa awng, kei khat nong piak sia ii tung pan khamh dangka nga ka meetsak hi,’ ci hi.

¹⁹Hisia pa ii tungah, ‘Nang sia khuapi nga hong uksak tu khi hi,’ ci hi.

²⁰Naseam dang khat hong pai a, ‘Topa awng, hi lai ah na khamh dangka om hi, mainawlna puan sungah ka na phual hi.

²¹Nang sia mihing haksa mama khat na hikom kong kiita hi; nangma neisa ahi ngawlte na la a, na poai ngawlna tung pan a at pa na hi hi,’ ci hi.

²²Ama in, ‘Naseam taktai ngawlpa awng! Nangma kammal taw ma in, nangma hong kiman kik tu hi. Kei mihing haksa khat hi a, ka neisa ngawl bul la a, ka poai sa ngawl bul a atpa ka hi nong he hi.

²³Tua ahile banghangin ka sum sia dangka kholna zum ah koi ngawl ni ziam? Tua hile kong cia kik ciang a meet taw nga kik tu khi hi,’ ci hi.

²⁴Tua zawkciangin a kungah a dingte munah, “A khamh dangka ama tung pan laaksak vun a, dangka sawm a nei naseampa pia vun,”

²⁵Ahihang amate in, ‘Topa awng, ama in sawm nei zo hi,’ ci uh hi.

²⁶Ama in zo kik a, ‘A tatakin ka ci ciangin, bang khat po a nei mihing sia ii tungah a tamzaw kipia tu hi; ahihang bangma a nei ngawl mihing khat ii tung panin a nei sun po kilaaksak lai tu hi,’ ci hi.

²⁷Tu in a kumpipa tu in hong dei ngawl ka ngalte, hi munah hong paipui tavun a keima mai ah that vun,’ ci hi,” ci in son hi.

²⁸Jesus in hi teng ci in Jerusalem zuan tu in amate mai ah pai hi.

²⁹Olive mual ah a om Bethphage khua le Bethany khua nai a thet ciangin, a nungzuite nii paisak khol a, hi bangin thupia hi:

³⁰“Na mai ah a om khua ah pai tavun. Khua sung na tum uh ciang, bangma hunin a tungah a kito ngeingawl lai laano khat kikhit in a om na mu tu uh hi. Hong suut tavun a, hi sungah hong paipui tavun.

³¹Khat po in banghangin suut nu ziam ci in hong dongh le Topa in tulmaw hi ci vun,” ci hi.

³²Amate a pai uh ciangin na theampo Jesus ii son bangin a om mu uh hi.

³³Amate in laano ii khau a suut ciangin, a neipa in, “Banghangin suut nu ziam?” ci in dongh hi.

³⁴“Topa in tulmaw hi,” ci in zo kik hi.

³⁵Amate in laano Jesus kungah paipui hi. Tua zawkciangin amate in a laktong puasilh suut a, laano tungah dapin, Jesus suanhto hi.

³⁶Laano tungah to in a pai ciangin, mihonpite in a laktong puasilh uh lampi tungah pha uh hi.

³⁷Ama Jerusalem nai ah hong thet ciang Olive Mual sang paisukna munah, ama nungzui mihonpite in nalamdangte a mu hu in, awnging tak taw lungdamko in, Pathian pok uh a,

³⁸“Topa min taw hong pai Kumpipa tungah Pathian in thupha pia tahen! Vantung ah thinnopna om tahen a, Pathian minthang tahen!” ci uh hi.

³⁹Tuasia ciangin mihon sung a kihel Pharisee mi pawlkhat in Jesus tungah, “Sya awng, na nungzuite a thim natu in sawl in!” ci uh hi.

⁴⁰Jesus in “A tatakin ka ci ciang, amate in a thim uh le, suangtumte mama in au tu in hong kipan tu hi,” ci hi.

⁴¹Ama khuapi taw a kinai vaialna hong theng a, khuapi a mu ciangin kapin,

⁴²“Thinnopna om thei natu in tuni in bang kisamh ziam ci in he thei thong lete maw! Ahizong tua thu mu thei ngawl ni hi!

⁴³Hun khat hong theng tu a, na ngalte in na kiimkot panin phung leecian bangin hong uumci tu a, hong khakcip in, mun theampo panin hong sim tu hi.

⁴⁴Amate in na khuapi lalthamsak tu a, na tate uh taw hong moncip siat tu hi; suangtum khat beak zongh a omna ngei ah hong om nawn buatu hi, banghang ziam cile Pathian in no hong ngum tu in hong pai hunlam na phawk bua uh hi,” ci in kaamal lo hi.

⁴⁵Tua zawkciang Jesus Biakinn sungah tum in sumzuakte not tu kipan a,

⁴⁶hi bangin ci hi, “Laithiangtho sung a ki atna ah, Pathian in ‘Ka biakinn sia thungetna inn kici tu hi,’ ci hi. Ahihang note in ngutate bukna mun na suaksak uh hi,” ci hi.

⁴⁷Ni simin Jesus in Biakinn sungah thuhil hi. Thiampi liante, Thukham hil syate, le mihon lampuite in ama thatlum nuam uh hi;

⁴⁸ahihang, amate in tuabang a pian thei natu in, lampi a mu bua uh hi, banghang ziam cile mihonte in, kammal no khat zongh a zaak khial tu uh uuk ngawlin, ama pauna ngai top uh hi.